مۇنداي قارقىنمەن تاياۋ ارادا باس قالاعا تاعى ءبىر اۋداندى قۇرۋعا تۋرا كەلمەك. بۇل تۋرالى قالا بەلسەندىسى, Qazaqstan Ardagerleri قاۋىمداستىعىنىڭ توراعاسى باقىتبەك سماعۇل ايتتى, دەپ جازادى Egemen.kz.
- استانا تۇرعىندارىنىڭ سانى جىل سايىن شامامەن 100 مىڭ ادامعا كوبەيىپ تۇرادى. ال, "اكىمشىلىك-اۋماقتىق قۇرىلىس تۋرالى" زاڭ بويىنشا اۋداندىق ماڭىزى بار قالالارعا قويىلاتىن حالىق سانىنىڭ تومەنگى شەگى 10 مىڭ ادامدى قۇرايدى. باسقاشا ايتقاندا, استاناعا جىل سايىن وسىنداي ونعا جۋىق قالا قوسىلادى. مىسالعا, 2025 جىلعى 1 مامىرداعى جاعداي بويىنشا استانالىقتاردىڭ سانى 1 ملن 558,5 مىڭنان استى. سونىڭ ىشىندە بيىلعى نەبارى 4 ايدا ەلورداعا 23 346 ادام تۇپكىلىكتى كوشىپ كەلگەن, – دەدى باقىتبەك سماعۇل.
اجارلى استانا اركىمدى وزىنە ماگنيتتەي تارتادى. مۇنداي قارقىنمەن, ب.سماعۇلدىڭ باعالاۋىنشا, ەلوردالىقتاردىڭ سانى تەك بيىل تۇتاس سارايشىق اۋدانىنىڭ حالقىنا تەڭ كولەمدە ءوسىپ شىعا كەلەدى. ولاي بولسا, الدا استانادا تاعى ءبىر جاڭا اۋدان پايدا بولۋى مۇمكىن.
ونىڭ دەرەگىنشە, قازىرگى كەزدە استانا قالاسىنىڭ جالپى اۋدانى 797,3 مىڭ شارشى شاقىرىم. بۇل سينگاپۋر, باحرەين, اندوررا, مالتا, مالديۆ سياقتى ەلدەر تۇتاس سياتىن الىپ اۋماق. نەمەسە بۇل تەرريتورياعا 1 626-دان استام ۆاتيكان سىيىپ كەتەدى ەكەن.
- مۇنشا ۇلكەن اۋماقتى شىپ-شىرعاسىن شىعارماي باسقارىپ, زامانعا ساي دامىتۋ ءۇشىن اباي بابامىز وسيەت ەتكەندەي, ىستىق قايرات, نۇرلى اقىل, جىلى جۇرەك قاجەت, نەمەسە عابيت مۇسىرەپوۆ ايتقانداي, ء"تىس تە كەرەك, ءىس تە كەرەك, بىلەك تە كەرەك, جۇرەك تە كەرەك". ءبىر قىزىقتى جايتتى ءبىلدىم, ەگەر جاڭا استانا جاريالانعان الدىڭعى 26 جىل ىشىندە ونىڭ 4 اۋدانى عانا قۇرىلسا, ال, پرەزيدەنتىمىزدىڭ جارلىعىمەن ەلوردانىڭ تىزگىنىن 2022 جىلى ج.قاسىمبەك ۇستاعالى, باس قالانىڭ اۋداندارىنىڭ سانى 6-عا دەيىن ءوسىپتى, – دەدى قوعام قايراتكەرى.