پرەمەر-مينيستر ولجاس بەكتەنوۆ پرەزيدەنت تاپسىرمالارىن, ونىڭ ىشىندە ۇكىمەتتىڭ كەڭەيتىلگەن وتىرىسىندا بەرىلگەن تاپسىرمالارىن ورىنداۋ اياسىندا نەگىزگى ەنەرگەتيكالىق جانە اقپاراتتىق-كوممۋنيكاتسيالىق جوبالاردى جۇزەگە اسىرۋ ماسەلەلەرى بويىنشا كەڭەس وتكىزدى.
«پرەزيدەنت قاسىم-جومارت توقاەۆ قازاقستاننىڭ ەلەكتر ەنەرگياسىمەن ءوزىن-ءوزى تولىق قامتاماسىز ەتۋىنە قول جەتكىزۋ جانە رەزەرۆتەردى قالىپتاستىرۋ مىندەتىن قويدى. نەگىزگى ەنەرگەتيكالىق جوبالاردى جۇزەگە اسىرۋ – ەكونوميكانىڭ تۇراقتىلىعىن قامتاماسىز ەتۋگە باعىتتالعان ستراتەگيالىق مىندەت. ەنەرگوجۇيەنىڭ تۇراقتى ءارى بولجامدى جۇمىسى ونەركاسىپتىك ءوسىم مەن وڭىرلەردىڭ دامۋىنا نەگىز بولىپ, جاڭا جوبالاردىڭ, ونىڭ ىشىندە تسيفرلىق شەشىمدەر مەن جاساندى ينتەللەكتىنى ەنگىزۋ باعىتىنداعى جوبالاردىڭ ىسكە قوسىلۋىنا جاعداي جاسايدى. جاڭا قۋاتتاردىڭ بەلگىلەنگەن مەرزىمدە ىسكە قوسىلۋىن قامتاماسىز ەتۋ قاجەت», دەپ اتاپ ءوتتى و.بەكتەنوۆ.
ەنەرگەتيكا مينيسترلىگىنىڭ دەرەكتەرى بويىنشا قازىرگى ۋاقىتتا ەلىمىزدە 230 ەلەكتر ستانساسى جۇمىس ىستەيدى, ونىڭ 156-سى جالپى قۋاتى 3 گۆت-تان اساتىن جاڭارتىلاتىن ەنەرگيا كوزدەرىنىڭ (جەك) وبەكتىلەرى. 2024 جىلدىڭ قورىتىندىسى بويىنشا تۇتىنۋ كولەمى 119,9 ملرد كۆت/ساعات بولسا, ەلەكتر ەنەرگياسىن ءوندىرۋ 117,9 ملرد كۆت/ساعاتتى قۇرادى.
ەنەرگەتيكا ءمينيسترى ەرلان اقكەنجەنوۆ تاپشىلىقتى جابۋ جانە قۋاتتاردى جاڭارتۋ ءۇشىن 2035 جىلعا دەيىن قوسىمشا 26 گۆت-تان استام ەنەرگيا ءوندىرۋدى كوزدەيتىن گەنەراتسيانى دامىتۋ بويىنشا كەشەندى باعدارلاما جۇزەگە اسىرىلىپ جاتقانىن باياندادى. بۇگىندە 10 گۆت قۋات كوزىن ىسكە قوسۋ جوبالارى ءارتۇرلى كەزەڭدە پىسىقتالىپ جاتىر. قولدانىستاعى ستانسالاردى جاڭعىرتۋ ەسەبىنەن تاعى شامامەن 5 گۆت قامتاماسىز ەتۋ جوسپارلانعان.
«سامۇرىق-قازىنا» قورىنىڭ باسقارما توراعاسى نۇرلان جاقىپوۆ تۇركىستان وبلىسىندا قۋاتى 1 گۆت بولاتىن بۋ-گاز قوندىرعىسىنىڭ قۇرىلىسىن سالۋ جونىندەگى جوبانىڭ جۇزەگە اسىرىلۋ بارىسى تۋرالى باياندادى. نىساندى TURAN ارنايى ەكونوميكالىق ايماعىنىڭ قۇرامىنا ەنگىزۋ جوسپارلانىپ وتىر.
باتىس ايماقتىڭ ەنەرگەتيكالىق جۇيەسىن ەلدىڭ ءبىرتۇتاس ەلەكتر ەنەرگەتيكالىق جۇيەسىمەن بىرىكتىرۋ جانە وڭتۇستىك ايماقتىڭ قۋاتىن ارتتىرۋ جۇمىستارى تۋرالى «KEGOC» اق باسقارما توراعاسى ءنابي ايتجانوۆ باياندادى. پرەزيدەنتتىڭ تاپسىرمالارىن ورىنداۋ اياسىندا جالپى قۇنى 356 ملرد تەڭگەدەن اساتىن ەكى ءىرى باستاما جۇزەگە اسىرىلۋدا.
ۇزىندىعى 600 شاقىرىمنان اساتىن 500 كۆ «قاراباتان – ولكە» ەلەكتر جەتكىزۋ جەلىسىن سالۋ جوباسى اتىراۋ جانە اقتوبە وبلىستارىندا ەلەكترمەن جابدىقتاۋ ساپاسىن ارتتىرۋعا, سونداي-اق باتىس وڭىرلەردە جەك نىساندارىن قوسۋعا ينفراقۇرىلىمدىق جاعداي جاساۋعا باعىتتالعان.
وڭتۇستىك ايماقتىڭ ەلەكتر جەلىلەرىن نىعايتۋ اياسىندا ۇزىندىعى 475 شاقىرىمدى قۇرايتىن 500 كۆ «شۋ – جامبىل – شىمكەنت» باعىتى بويىنشا ەلەكتر جەتكىزۋ جەلىسىنىڭ قۇرىلىسى جانە نەگىزگى قوسالقى ستانسالاردى جاڭعىرتۋ جۇمىستارى جۇرگىزىلۋدە. بارلىق جۇمىستى 2027 جىلدىڭ ورتاسىندا اياقتاۋ جوسپارلانعان.
جالپى, ۇلتتىق ەلەكتر جەلىسىنىڭ سەنىمدى جۇمىسىن قامتاماسىز ەتۋ ماقساتىندا گەنەراتسيا قۋاتتارىن سالۋ بويىنشا اۋقىمدى جوسپارلار اياسىندا KEGOC جالپى قۇنى 2,3 ترلن تەڭگە بولاتىن 8 ءىرى ينۆەستيتسيالىق جوبانى جۇزەگە اسىرۋدى جوسپارلاپ وتىر.
سونداي-اق كەڭەس بارىسىندا اقپاراتتىق-كوممۋنيكاتسيالىق ينفراقۇرىلىمدى دامىتۋعا باعىتتالعان جوبالار قارالدى. ولجاس بەكتەنوۆ قازاقستان ەكونوميكاسىن تسيفرلىق ترانسفورماتسيالاۋ ۇدەرىسىندەگى وسىنداي باستامالاردىڭ ءرولىن اتاپ ءوتتى.
تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ مالىمەتىنشە, قازىرگى ۋاقىتتا قازاقستاندا 6 179 اۋىل بار, ونىڭ 42%-ى جوعارى جىلدامدىقتى دەرەكتەردى تاراتۋ تەحنولوگياسىمەن قامتاماسىز ەتىلگەن. اۋىلدىق ەلدى مەكەندەردى شىنى-تالشىقتى بايلانىس جەلىلەرىنە (شتبج) قوسۋ جوباسى اياسىندا 2027 جىلدىڭ سوڭىنا دەيىن ينتەرنەت 3 781 اۋىلعا جەتكىزىلەدى. ناتيجەسىندە, جەلىنىڭ جالپى ۇزىندىعى 160 مىڭ شاقىرىمنان اسادى جانە قامتۋ دەڭگەيى 90%-عا دەيىن وسەدى. سونىمەن قاتار ەلىمىزدىڭ ەۋروپا مەن ازيا اراسىنداعى تسيفرلىق ترانزيتتىك حاب رەتىندەگى ءرولىن نىعايتۋ ءۇشىن 2026 جىلدىڭ سوڭىنا دەيىن ەلدىڭ حالىقارالىق دەرەكتەر تاراتۋ ۇلەسىن ارتتىرۋ جوسپارلانىپ وتىر.
2027 جىلدىڭ سوڭىنا دەيىن رەسپۋبليكالىق جانە وبلىستىق اۆتوجولداردى قوسا العاندا, ەل بويىنشا كۇرە جولداردى ءموبيلدى بايلانىسپەن قامتۋ دەڭگەيىن 99%-عا دەيىن جەتكىزۋ جوسپارلانۋدا. سونىمەن قاتار سپۋتنيكتىك بايلانىستى دامىتۋعا دا باسا نازار اۋدارىلۋدا: 2025 جىلدىڭ سوڭىنا دەيىن قوسىمشا 328 شالعايداعى ەلدى مەكەن ينتەرنەتكە قوسىلادى. قازىرگى ۋاقىتتا قازاقستان «OneWeb», «Starlink», «Shanghai Spacecom Satellite Technology» جانە «Amazon Kuiper» كومپانيالارىمەن ىنتىماقتاستىق ورناتقان. بۇل باعىتتاعى جالپى ينۆەستيتسيا كولەمى 38,6 ملرد تەڭگەدەن اسادى
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ 2025–2030 جىلدار ارالىعىندا اكت سەكتورىنا جالپى كولەمى شامامەن 1,3 ترلن تەڭگە ينۆەستيتسيا تارتۋ جوسپارلانىپ وتىرعانىن باياندادى. كەڭەس قورىتىندىسى بويىنشا پرەمەر-مينيستر بىرقاتار تاپسىرما بەردى.