پاۆلوداردىڭ اقسۋ قالاسىندا پروباتسيا قىزمەتىنىڭ ەسەبىندە تۇرعان, سوتتالعان ازامات ەلەكتروندىق باقىلاۋ قۇرالىن بۇلدىرگەنى ءۇشىن باس بوستاندىعىنان ايىرىلدى, دەپ حابارلايدى Egemen.kz.
2024 جىلدان باستاپ قوعامنان وقشاۋلاۋمەن بايلانىستى ەمەس جازا تۇرلەرىن وتەپ جاتقان ادامدارعا قاتىستى ەلەكتروندىق باقىلاۋ جۇيەسى بەلسەندى تۇردە قولدانىلۋدا. الايدا, بارلىق سوتتالعاندار قويىلعان تالاپتاردى ورىنداي بەرمەيتىنى وكىنىشتى.
- مىسالى, اقسۋ قالاسىنىڭ پروباتسيا قىزمەتىندە ەسەپتە تۇرعان سوتتالعان ازامات سوت جۇكتەگەن مىندەتتەردى جۇيەلى تۇردە بۇزعان. ەلەكتروندىق بىلەزىك تاعىلعانىنا قاراماستان, ول پروباتسيا قىزمەتىن حاباردار ەتپەستەن بەلگىلەنبەگەن ۋاقىتتا بىرنەشە رەت قالا شەگىنەن ءوز بەتىمەن شىعىپ كەتكەن. سونىمەن قاتار, ول قاساقانا ەلەكتروندىق باقىلاۋ قۇرالىن زاقىمداعان,- دەپ حابارلايدى پاۆلودار وبلىسى پوليتسيا دەپارتامەنتىنەن.
اتالعان دەرەككە بايلانىستى اقسۋ قالاسىنىڭ پروباتسيا قىزمەتى ءتيىستى ۇسىنىس ەنگىزىپ, اقسۋ قالاسىنىڭ مامانداندىرىلعان اۋدانارالىق سوتى بۇل ۇسىنىستى قولدادى. جازانىڭ وتەلمەگەن بولىگىن باس بوستاندىعىنان ايىرۋ جازاسىنا اۋىستىردى. سوتتالعان ازامات جازاسىن ودان ءارى وتەۋ ءۇشىن باس بوستاندىعىنان ايىرۋ ورىندارىنا جىبەرىلدى.
پاۆلودار وبلىسى