بۇگىن استانادا اۋىر اتلەتيكادان جاسوسپىرىمدەر مەن جاستار اراسىندا ازيا چەمپيوناتى باستالادى. قۇرلىقتىڭ 25 ەلىنەن 300-دەن استام اتلەت بىلەك كۇشىن سىنايدى.
10 شىلدەگە دەيىن جالعاساتىن دودا «Qazaqstan» جەڭىل اتلەتيكالىق سپورت كەشەنىندە وتەدى. بەدەلدى قۇرلىق چەمپيوناتىنا وزبەكستان, قىتاي, ءۇندىستان, ۆەتنام, تايلاند, وڭتۇستىك كورەيا, كۋۆەيت سىندى ەلدەر ۇزدىكتەرىن اكەلىپ وتىر. ەلىمىزدىڭ ءۇمىتىن 36 سپورتشىمىز ارقالاپ شىقپاق.
17–20 جاس ارالىعىنداعى اتلەتتەر اۋىر اتلەتيكانىڭ كلاسسيكالىق جاتتىعۋلارى – جۇلقي جانە سەرپە كوتەرۋ تۇرىنەن باق سىناسادى. جەڭىمپازدار جەكەلەگەن جاتتىعۋلاردا دا, قوس سايىستىڭ جالپى قورىتىندىسىمەن دە مەدال ەنشىلەيدى.
بۇعان دەيىن ەلىمىزدە اۋىر اتلەتيكادان ءىرى حالىقارالىق جارىسقا سوڭعى رەت 2014 جىلى الماتىدا ءوتتى. 11 جىل بۇرىن الاتاۋ بوكتەرىندە الەم چەمپيوناتى جالاۋىن جەلبىرەتكەن ەدى. ۇيىمداستىرۋشىلار استاناداعى ازيا چەمپيوناتى – ەلىمىزدە اۋىر اتلەتيكا دامۋدىڭ جاڭا كەزەڭىنە قادام باسقانىن ايقىندايدى دەيدى. ەكىنشىدەن, بۇل وتاندىق سپورتتاعى جۇيەلى وزگەرىستەردىڭ ناتيجەسى.
ازيا بىرىنشىلىگىندە 17 جاسقا دەيىنگى جاسوسپىرىمدەر زىلتەمىر كوتەرسە, 20 جاسقا دەيىنگى جاستار اراسىنداعى سايىس تا قىزىققا تولى بولماق. ەل ءۇمىتىن ارقالايتىن ساڭلاقتار اراسىندا جاھاندىق دودالاردا ولجا سالعان وعلاندار دا بار. ۇلتتىق قۇرامانىڭ اعا جاتتىقتىرۋشىسى البەرت حاكيمۋلين اتلەتتەر ناۋرىز ايىنان بەرى 6 وقۋ-جاتتىعۋ جيىنىنا قاتىسقانىن ايتتى.
– قۇراما ساپىندا بۋىن الماسۋ ءجۇرىپ, جاستار دا ءوز الەۋەتىن سىناۋعا مۇمكىندىك الدى. بىلتىر دوحادا وتكەن ازيا چەمپيوناتىنا قاتىسىپ جۇلدە العان, بيىلعى كوكتەمدە پەرۋدە جالاۋى جەلبىرەگەن الەم چەمپيوناتىنان مەدالمەن ورالعان سپورتشىلارعا دا ءۇمىت ارتامىز. ولاردىڭ ىشىندە جاستار اراسىندا الەم چەمپيونى ەدىگە ەمبەردى, جاسوسپىرىمدەردىڭ الەمدىك دوداسىندا التىن العان ەراسىل ساۋلەبەكوۆ سىندى ۇزدىكتەر بار. بۇلار التىن مەدال ءۇشىن ايانىپ قالمايدى, – دەدى باپكەر.
ارۋجان سايان
استانا