ترامپ: «دۇكەنىڭدى جاپ تا, وڭتۇستىك افريكاڭا قايت»

Truth Social الەۋمەتتىك جەلىسىندە جاريالاعان مالىمدەمەسىندە ترامپ:

«ەلەكتروموبيلدەر – جاقسى دۇنيە. بىراق ولاردى بارىنە كۇشتەپ تىقپالاۋدىڭ قاجەتى جوق. يلون – تاريحتاعى ەڭ كوپ سۋبسيديا العان ادام. سول سۋبسيديالار بولماسا, الدەقاشان كاسىبىن جاۋىپ, وڭتۇستىك افريكاعا كەتەر ەدى», دەپ جازدى اق ءۇي باسشىسى.

ترامپ سونىمەن قاتار يلون ماسك باسشىلىق ەتكەن دەپارتامەنتتىڭ (DOGE – مەملەكەتتىك تيىمدىلىك دەپارتامەنتى) شىعىندارىن تەكسەرۋدى ۇسىندى:

«زىمىراندار مەن سپۋتنيكتەردى ۇشىرۋعا دا, ەلەكتروموبيلدەر جاساۋعا دا تىيىم سالساق, ەل بيۋدجەتى ميللياردتاعان دوللار ۇنەمدەر ەدى. DOGE-گە وسى باعىتتى مۇقيات زەرتتەۋگە كەڭەس بەرەمىن», دەدى ول.

داۋدىڭ باسى – ترامپ ماقتانىشپەن One Big Beautiful Bill ء(بىر ۇلكەن ادەمى شوت) دەپ اتاعان زاڭ جوباسى. قۇجاتتا:

4 تريلليون دوللاردان استام سالىقتىق جەڭىلدىكتەردى ۇزارتۋ, شايپۇلعا سالىناتىن سالىقتاردى الىپ تاستاۋ, يمميگرانتتاردى جاپپاي دەپورتاتسيالاۋ كامپانياسىنا قارجى ءبولۋ, «التىن كۇمبەز» اتتى زىمىرانعا قارسى جاڭا قورعانىس جۇيەسىن سالۋ سياقتى باستامالار قامتىلعان.

سەنات زاڭ جوباسىن الدىن الا ماقۇلداپ, ەندى تۇپكىلىكتى داۋىس بەرۋگە كىرىسپەك.

 

ماسك: ء«بىز شوشقالار پارتياسىندا ءومىر ءسۇرىپ جاتىرمىز»

قوعامدا قىزۋ پىكىرتالاس تۋعىزعان زاڭ جوباسىنا قاتىستى ماسك ءوز پوزيتسياسىنان تايماي وتىر. X (بۇرىنعى Twitter) جەلىسىندە ول:

«مەملەكەتتىك قارىز شەگىن بەس تريلليون دوللارعا كوتەرەتىن مۇنداي جويقىن زاڭ – ەلدى بىرپارتيالىق جۇيەگە اينالدىرىپ جاتىر. بۇل – شوشقالار پارتياسى! حالىقتى شىنايى ويلايتىن جاڭا پارتيا كەرەك»,  دەپ جازدى.

ايتا كەتەيىك, ماسك بۇعان دەيىن ترامپتان كەشىرىم سۇراعانىمەن, ء«بىر ۇلكەن, كوركەم زاڭدى» قولدامايتىنىن اشىق مالىمدەدى.

ترامپ پەن ماسك اراسىنداعى تارتىس تەك ەكى بەدەلدى تۇلعانىڭ ەرەگەسى ەمەس. بۇل – اقش-تاعى بيۋدجەتتىك ساياسات, مەملەكەتتىك سۋبسيديالار مەن تەحنولوگيالىق يندۋستريا بولاشاعىنا قاتىستى ءىرى قوعامدىق پىكىرتالاستىڭ ءبىر كورىنىسى. كاسىپكەر مەن ساياساتكەر اراسىنداعى مۇنداي ءسوز قاقتىعىسى الداعى سايلاۋ الدىنداعى ناۋقانعا دا اسەر ەتۋى مۇمكىن.