2025 جىلدىڭ باسىنان بەرى قازاقستاندا ەنگىزىلگەن وتباسىنىڭ تسيفرلىق كارتاسى (وتسك) ارقىلى الەۋمەتتىك-ەڭبەك سالاسىنداعى مەملەكەتتىك قىزمەتتەردى پرواكتيۆتى تۇردە كورسەتۋ جۇيەسى قارقىندى جۇمىس ىستەۋدە. ەسەپتى كەزەڭدە 259,5 مىڭ ازاماتقا مەملەكەتتىك قولداۋ شارالارى تۋرالى SMS-حابارلاما جىبەرىلىپ, ولاردىڭ 202,1 مىڭى ءوتىنىشسىز-اق جاردەماقى مەن تولەمدەر الۋ مۇمكىندىگىن پايدالانعان, دەپ حابارلايدى Egemen.kz.
وتسك – بۇل قازاقستان ازاماتتارى مەن وتباسىلارىنا قاتىستى مالىمەتتەردى بىرىكتىرەتىن تسيفرلىق جۇيە. قازىرگى تاڭدا كارتادا 20 ميلليوننان استام ازامات نەمەسە 6,2 ميلليوننان استام وتباسى تۋرالى اقپارات جيناقتالعان. بۇل مالىمەتتەر مەملەكەتتىك ورگانداردىڭ قولدانىستاعى اقپاراتتىق جۇيەلەرى ارقىلى اۆتوماتتى تۇردە جاڭارتىلىپ وتىرادى.
«وتسك ەنگىزۋدىڭ باستى ماقساتى – قازاقستاندىقتاردىڭ مەملەكەتتىك قولداۋ جۇيەسىنە تەڭ قولجەتىمدىلىگىن قامتاماسىز ەتۋ. وسىعان بايلانىستى قر الەۋمەتتىك كودەكسىندە وتباسىنىڭ تسيفرلىق كارتاسى الەۋمەتتىك ساياساتتىڭ ورتا جانە ۇزاق مەرزىمدى مىندەتتەرى مەن باعىتتارىن ايقىنداۋ قۇرالى رەتىندە بەلگىلەنگەن. سونداي-اق, وتسك ازاماتتاردىڭ الەۋمەتتىك مارتەبەسىنە بايلانىستى كەپىلدەندىرىلگەن مەملەكەتتىك قولداۋدىڭ قانداي دا ءبىر ءتۇرىن الۋعا قۇقىلى ەكەندىگى تۋرالى كۇندەلىكتى «ەلەكتروندىق حابارلاما» بولىپ تابىلادى», دەپ حابارلادى ەڭبەك جانە حالىقتى الەۋمەتتىك قورعاۋ مينيسترلىگى.
قازىرگى تاڭدا تسيفرلىق كارتا ارقىلى ازاماتتار ءوتىنىشسىز رەسىمدەي الاتىن الەۋمەتتىك تولەمدەردىڭ 11 ءتۇرى قولجەتىمدى. ولار:
ەڭبەككە قابىلەتتىلىكتەن ايىرىلعان جاعدايدا تولەم; جۇمىسسىز قالعان جاعدايدا تولەم; اسىراۋشىسىنان ايىرىلعاندا تولەم; بالا تۋىنا جانە بالا كۇتىمىنە بايلانىستى جاردەماقىلار; مۇگەدەكتىگى بار بالانى تاربيەلەۋشىگە جاردەماقى; مۇگەدەكتىككە بايلانىستى جاردەماقى; كوپبالالى وتباسىلارعا ارنالعان جاردەماقى; «التىن القا» جانە «كۇمىس القا» يەلەرىنە بەرىلەتىن جاردەماقى; اتاۋلى الەۋمەتتىك كومەك; جەرلەۋگە ارنالعان بىرجولعى تولەم; زەينەتاقى تولەمدەرى.سونىمەن قاتار, كارتا «قانداس» مارتەبەسىنىڭ اياقتالۋ مەرزىمى تۋرالى, سونداي-اق جۇمىسسىزدارعا ارنالعان جۇمىسپەن قامتۋ شارالارى جايىندا اۆتوماتتى تۇردە ەسكەرتۋ حابارلامالارىن جولدايدى.مەملەكەتتىك قولداۋ شارالارىنا قۇقىعى انىقتالعان ازاماتتارعا 1414 بىرىڭعاي بايلانىس ورتالىعىنان SMS-حابارلاما جولدانادى. قىزمەتتى پايدالانۋ ءۇشىن ازامات تەك كەلىسىمىن ءبىلدىرۋى قاجەت. بۇدان كەيىن ءوتىنىش اۆتوماتتى تۇردە رەسىمدەلىپ, تولەمدەر الۋشىنىڭ بانك شوتىنا اۋدارىلادى.