Tomorrow School: بولاشاققا جول اشقان مەكتەپ

مەكتەپتىڭ باستى ەرەكشەلىگى – ءداستۇرلى وقۋ جۇيەسىنەن بولەك, ءوز قارقىنىڭمەن, ءوز ۋاقىتىڭمەن وقۋعا مۇمكىندىك بەرۋى. Astana Hub اۋماعىندا ورنالاسقان كامپۋس تاۋلىك بويى اشىق, ال وقۋ پروتسەسى تاجىريبەگە نەگىزدەلگەن. 18 ايدىڭ ىشىندە ستۋدەنتتەر 50-دەن استام جوبانى جۇزەگە اسىرىپ, Python, JavaScript, Golang, Rust سياقتى 20 شاقتى باعدارلامالاۋ ءتىلىن مەڭگەرەدى. باعدارلامانى تامامداعان سوڭ, اركىم ءوز باعىتىن تاڭدايدى: ءبىرى – AI ينجەنەرىنە, ءبىرى – ويىن جاساۋشىعا, ەندى ءبىرى DevOps نەمەسە كيبەرقاۋىپسىزدىك مامانىنا اينالادى.

وقۋ – تەك كود جازۋ ەمەس. مۇندا ءبىرى – اعىلشىن ءتىلىن ۇيرەتسە, ءبىرى – كوپشىلىك الدىندا سويلەۋگە باۋليدى, ەندى ءبىرى AI قۇرالدارىن بيزنەستە قالاي قولدانۋعا بولاتىنىن كورسەتەدى. قاۋىمداستىقتىڭ كۇشى – ءدال وسى ءوزارا تاجىريبە الماسۋدا جاتىر.

Tomorrow School-دا وقىپ جاتقان ستۋدەنتتەردىڭ جاس ەرەكشەلىگى مەن تاجىريبەسى ءارتۇرلى. ماسەلەن, ستانيسلاۆ كۋلەشوۆ – 18 جاستا. بۇعان دەيىن باعدارلامالاۋمەن اينالىسپاعان ول بۇگىندە Telegram Mini App ارقىلى تاپسىرىس قابىلدايتىن قوسىمشا جاساپ, ءتىپتى شەتەلدىك تاپسىرىس تا الىپ ۇلگەرگەن.

ازامات جەڭىسوۆ – 20 جاستاعى AITU ستۋدەنتى. كيبەرقاۋىپسىزدىك ماماندىعىندا وقىعانىمەن, ناقتى تاجىريبەنى ءدال وسى مەكتەپتەن الىپ جاتقانىن ايتادى. ول ءتىپتى اعىلشىن تىلىنەن وقۋ كلۋبىن اشىپ, ءوز ءبىلىمىن باسقالارمەن ءبولىسىپ كەلەدى.

ال ءامىر جاقىشەۆ – ەكونوميست, 36 جاستا. ون جىلدان استام ءداستۇرلى كاسىپپەن اينالىسقان ول IT سالاسىن مۇلدە جات كورگەن. الايدا peer-to-peer فورماتىمەن تانىسقاننان كەيىن كوزقاراسى وزگەرىپ, بۇگىندە ول دا جاڭا باعىتتا دامىپ كەلەدى. قازىر ول كوپشىلىك الدىندا سويلەۋ كلۋبىن جۇرگىزىپ, Astana Hub-تىڭ اكسەلەراتسيالىق باعدارلاماسىنا قاتىسۋدا.

مەرەكە قۇرماشەۆتىڭ وقيعاسى – ناعىز ومىرلىك بەتبۇرىستىڭ مىسالى. بۇرىن سىرتقى جارناما سالاسىندا قىزمەت ەتكەن ول 30 جاسىندا ماماندىعىن تۇبەگەيلى وزگەرتىپ, IT-گە بەت بۇرعان. بىرنەشە اي ىشىندە ول نەيروجەلىلەردى قولداناتىن جەكە بيزنەس اشىپ, العاشقى كليەنتتەرىن دە تاپتى.

مەكتەپ جانىندا 13 ستۋدەنتتىك كلۋب جۇمىس ىستەيدى. بۇل – ستۋدەنتتەردىڭ ءوز باستاماسىمەن قۇرىلعان: AI Tools Club, Kazakh Club, LeetCode Club, Chess Club, Debate Club سىندى كلۋبتاردا ساباقتار ءوتىپ, كوشباسشىلىق داعدىلار قالىپتاسادى.

Tomorrow School ورتاسى تەك كامپۋس شەڭبەرىندە قالمايدى. ستۋدەنتتەر فۋتبول, شاحمات تۋرنيرلەرىن ۇيىمداستىرىپ, حاكاتوندارعا قاتىسىپ, Astana Hub-تىڭ جەتەكشى تۇلعالارىمەن جەكە كەزدەسۋلەرگە شاقىرىلادى. بۇل – ولاردىڭ بەلسەندىلىگى مەن دامۋعا دەگەن ىنتاسىنىڭ ناقتى كورسەتكىشى.

قازىر Tomorrow School-دىڭ جەتىنشى لەگىنە تىركەلۋ ءجۇرىپ جاتىر, ال ءوتىنىم قابىلداۋ 18 شىلدەگە دەيىن جالعاسادى.