الماتىدا حالىقارالىق ۆيتيليگو كۇنىنە وراي «ۆيتيليگو جانە تەرى ساۋلىعى» ورتالىعىندا اشىق ەسىك كۇنى ءوتتى, دەپ جازادى Egemen.kz.
ورتالىق ماماندارى پاتسيەنتتەرگە - وسى اۋرۋدان زارداپ شەگەتىن ازاماتتارعا, وزگە دە كەلۋشىلەرگە بۇل اۋرۋدىڭ ەرەكشەلىگى جانە قوعامدا بۇل دەرتكە شالدىققان ادامداردى قالىپتى قابىلداۋ, ەڭ باستىسى ۆيتيليگو جۇقپالى دەرت ەمەستىگى تۋرالى ءتۇسىندىرىپ, كەڭەستەر بەردى. بيىل شارا ءتورتىنشى رەت ۇيىمداستىرىلىپ وتىر.
«ۆيتيليگو بۇل اۋتويممۋندى سيپاتتاعى سوزىلمالى, قايتالاناتىن تەرى اۋرۋى. دەنەگە اق نەمەس ءتۇسسىز داق تۇرىندە شىعادى. ءالى تولىق زەرتتەلمەگەن. الەم حالقىنىڭ 1-2% وسى دەرتكە شالدىققان دەسەك بولادى. ۆيتيليگو ولىمگە اكەلمەيدى جانە ەشقانداي زيان كەلتىرمەيدى, الايدا كەيدە ناۋقاس ادامنىڭ جانە ونىڭ وتباسىنىڭ الەۋمەتتىك ومىرىنە كەرى اسەر ەتۋى, اۋىر پسيحولوگيالىق زارداپتارعا اكەلىپ سوقتىرۋى ىقتيمال. ءبىز سول ءۇشىن پاتسيەنتتەرمەن بۇل تۇرعىدا جۇمىس ىستەپ, ءجيى تۇسىندىرۋگە تىرىسامىز», - دەيدى «ۆيتيليگو جانە تەرى دەنساۋلىعى» ورتالىعىنىڭ ديرەكتورى انار ءابدىراحمانوۆا.
ايتا كەتەيىك, جىل سايىن 25 ماۋسىمدا دۇنيەجۇزىلىك ۆيتيليگو كۇنى اتاپ وتىلەدى. ول كۇننىڭ مىندەتى - بۇل اۋرۋ تۋرالى جۇرتشىلىقتىڭ حاباردارلىعىن ارتتىرۋ, پاتسيەنتتەرگە اۋرۋ سەبەبىنەن تۋىنداعان الالاۋشىلىقتى جەڭۋگە كومەكتەسۋ, ۆيتيليگونى ەمدەۋدىڭ زاماناۋي ادىستەرىنە قول جەتكىزۋ. الەمدە بۇل اۋرۋدان شامامەن 100 ميلليون ادام زارداپ شەگەدى.