دۇنيە جۇزىندە 26 ماۋسىم – حالىقارالىق ناشاقورلىققا قارسى كۇرەس كۇنى رەتىندە اتاپ وتىلەدى. بۇل داتا قازاقستان ءۇشىن دە ماڭىزدى. ويتكەنى ناشاقورلىق بولاشاق ۇرپاقتىڭ تامىرىنا بالتا شابۋمەن بىردەي. وسى ورايدا جۋىردا شىمكەنتتە «تازا ءومىر – سەنىڭ تاڭداۋىڭ» اتتى مەرەكەلىك كەش ءوتتى. ءىس-شارانى قالالىق جاستار رەسۋرستىق ورتالىعى ۇيىمداستىردى. وسى جيىندا 26 مامىر مەن 26 ماۋسىم ارالىعىندا وتكەن ناشاقورلىققا قارسى كۇرەس ايلىعىنىڭ قورىتىندىسى جاريالاندى, دەپ حابارلايدى Egemen.kz.
ءبىر اي بويى جاۋاپتى مەكەمە جاستار اراسىندا ەسىرتكى, لۋدومانيا, بۋللينگ سەكىلدى زياندى ادەتتەردىڭ الدىن الۋ بويىنشا اقپاراتتىق-ءتۇسىندىرۋ جۇمىستارىن جۇرگىزدى. سالاماتتى ءومىر سالتىن ناسيحاتتادى. وسىنداي ماڭىزدى ءىس-شارالار ىشىندە تانىمدىق كەزدەسۋ, تاقىرىپتىق ترەنينگ, كورمە, فلەشموب مەن اكتسيالار ۇيىمداستىرىلدى.
جيىندا شىمكەنت قالاسى پروكۋرورىنىڭ ورىنباسارى مارلەن سلامبەكوۆ, شىمكەنت قالاسى پوليتسيا دەپارتامەنتى باستىعىنىڭ ورىنباسارى ۇلىقبەك مىلتىقوۆ جانە قالالىق ىشكى ساياسات جانە جاستار ىستەرى جونىندەگى باسقارماسىنىڭ باسشىسى ايگەرىم جۇماعۇلوۆا ءسوز سويلەپ, جاستار اراسىندا سالاماتتى ءومىر سالتىن ۇستانۋدىڭ ماڭىزدىلىعىنا توقتالدى. وسكەلەڭ ۇرپاقتى دەنساۋلىققا زيان كەلتىرەتىن ارەكەتتەردەن اۋلاق بولۋعا شاقىردى.
سونىمەن قاتار, ايلىق شەڭبەرىندە بەلسەندىلىك تانىتقان ەرىكتىلەر مەن جاستار ۇيىمدارىنىڭ وكىلدەرى ارنايى العىس حاتتارمەن, ءتۇرلى جۇلدەلەرمەن ماراپاتتالدى.
سونداي-اق كەشتە شىمكەنت قالاسىنىڭ ءبىلىم, دەنە شىنىقتىرۋ جانە سپورت, جۇمىسپەن قامتۋ جانە الەۋمەتتىك قورعاۋ باسقارمالارى, قۇقىق قورعاۋ ورگاندارى كوپشىلىك نازارىنا تاقىرىپقا بايلانىستى تانىمدىق اقپاراتتار ۇسىندى.
شىمكەنت