سۋرەت پەن دىبىس سيمفونياسى

الەمدە ونەر مەن مۋزىكانى شەبەر ۇشتاستىرا بىلگەن ساناۋلى تۇلعالار بار. سولاردىڭ ءبىرى – وسى ليتۆالىق سۋرەتشى ءارى كومپوزيتور, شىعارماشىلىعىمەن ونەردىڭ شەكاراسىن كەڭەيتىپ, كوركەمدىك پەن مۋزىكانىڭ اراسىندا ەرەكشە ۇيلەسىمدى تابا ءبىلدى. ونىڭ تۋىندىلارى – تەك سۋرەت نەمەسە اۋەن عانا ەمەس, سەزىمنىڭ, رۋحتىڭ, ءارى شەكسىز قيالدىڭ جەمىسى.

اتالعان كورمە – ليتۆا مەن قازاقستان اراسىنداعى مادەني بايلانىستىڭ جارقىن كورىنىسى. وندا ءچيۋرليونيستىڭ ەڭ ايگىلى كەسكىندەمەلىك جۇمىستارى, سونداي-اق مۋزىكالىق مۇراسىنان ۇزىندىلەر ۇسىنىلدى. زال ىشىنە ورناتىلعان مۋلتيمەديالىق ينستاللياتسيالار ارقىلى كەلۋشىلەر شەبەردىڭ شىعارماشىلىق الەمىنە تەرەڭ ۇڭىلە الادى. اسىرەسە, «سوناتالار» سەرياسىنداعى كارتينالار مەن «جۇلدىز سيمفونياسى» سياقتى تۋىندىلار ۇلكەن اسەر قالدىردى.

كورمەنىڭ اشىلۋىنا ليتۆا ەلشىلىگىنىڭ وكىلدەرى, وتاندىق ونەرتانۋشىلار مەن ونەرسۇيەر قاۋىم قاتىستى. شارا شەڭبەرىندە چيۋرليونيس شىعارماشىلىعى تۋرالى لەكتسيالار مەن مۋزىكالىق قويىلىمدار دا ۇيىمداستىرىلدى.

ءچيۋرليونيستىڭ كەسكىندەمەلەرى – ميفولوگيانى, پەيزاجدى, ابستراكتسيا مەن ءسيمۆوليزمدى ءوز بويىنا جيناعان ەرەكشە الەم. ءستيلى تەرەڭ ەموتسيالارعا تولى, ال كومپوزيتسيالارى بۇگىنگى زاماناۋي ونەرمەن ۇندەسە دامىپ كەلەدى. ول نەبارى 36 جىل ءومىر سۇرسە دە, ارتىندا 400-گە جۋىق مۋزىكالىق شىعارما مەن 300-گە جۋىق سۋرەت قالدىرعان. بۇل تۋىندىلار تەك ليتۆانىڭ عانا ەمەس, بۇكىل ەۋروپا ونەرىنىڭ دامۋىنا اسەر ەتكەن.

اۆتور شىعارماشىلىعى ليتۆالىق مادەنيەتتىڭ رۋحاني تىرەگى سانالادى. ءچيۋرليونيستىڭ سيمفونيالارىنان ليتۆانىڭ تابيعاتى, ءومىرى, رۋحى مەن بولمىسى سەزىلەدى. ول كەزىندە كوپشىلىكتىڭ رۋحاني ويانۋىنا تۇرتكى بولىپ, ادامداردى شابىتتاندىرا ءبىلدى. بۇگىندە ەسىمى ليتۆانىڭ ۇلتتىق سيمۆولىنا اينالىپ وتىر.

كورمە زالىن ارالاپ ءجۇرىپ, ءوزىڭدى ەرتەگى الەمىندە ساياحاتتاپ جۇرگەندەي سەزىنەسىڭ. ءار تۋىندىنىڭ ارتىندا ءوز حيكاياسى, ءوز اڭىزى بارداي اسەر قالدىرادى. بۇل كورمە تەك كوزبەن كورۋ ءۇشىن ەمەس, جۇرەكپەن سەزىنۋ ءۇشىن جاسالعان. استاناداعى كورمە سول رۋحاني مۇرامەن جاقىنىراق تانىسۋعا, شابىت الۋعا جانە ونەردىڭ شەكسىزدىگىنە كوز جەتكىزۋگە مۇمكىندىك بەرەدى.

ارۋجان قۇسايىن,

اققۋ دونەش,

ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى