ەل پرەزيدەنتى 2027 جىلعا دەيىن ەلىمىزدە 2 ملرد اعاش وسىرۋگە تاپسىرما بەرگەن بولاتىن. وسى تاپسىرما اياسىندا 1,3 ملرد-تان استام كوشەت, ونىڭ ىشىندە ارال تەڭىزىنىڭ قۇرعاعان تابانىنا 48,7 ملن سەكسەۋىل كوشەتى ەگىلگەن, ال ەلدى مەكەندەر اۋماعىندا 15 ملن اعاش وتىرعىزىلعان, دەپ حابارلايدى Egemen.kz.
بۇل تۋرالى ۇكىمەت وتىرىسىندا ايتقان ەكولوگيا جانە تابيعي رەسۋرستار ءمينيسترى ەرلان نىسانباەۆتىڭ مالىمەتىنشە, 2024 جىلدان باستاپ ورمان مەليوراتسيالىق جۇمىستاردىڭ ەداۋىر كولەمى ءىرى كومپانيالاردىڭ قاتىسۋىمەن بيۋدجەتتەن تىس قاراجات ەسەبىنەن جۇزەگە اسىرىلعان. جەرسىنۋى مەن ومىرشەڭدىك دەڭگەيى جوعارى ساپالى وتىرعىزۋ ماتەريالىمەن قامتاماسىز ەتۋ ماقساتىندا ورمان تالىمباقتارىن قۇرۋ جۇمىستارى جۇرگىزىلىپ جاتىر.
قازالى قالاسىنداعى 33 گەكتار الاڭدا قۋاتتىلىعى جىلىنا 3 ملن كوشەت بولاتىن ورمان تالىمباعىنىڭ قۇرىلىسى اياقتالعان. بيىل اۋدانى 15 گەكتار جاڭا تالىمباقتى جوبالاۋ, سونداي-اق ورمان مەليوراتسياسىمەن اينالىساتىن قىزمەتكەرلەر ءۇشىن وندىرىستىك مودۋلدەردى جەتكىزۋ جۇمىستارى جاسالعان.