سەمەي قالاسىندا «كيسي GPS: Gylym. Pikir. Sayasat» ۇلتتىق ساراپتاما الاڭىنىڭ وتىرىسى ءوتىپ, وندا ۇلتتىق قۇرىلتاي شەشىمدەرىنىڭ جۇزەگە اسىرىلۋى, بۇل ۇدەرىستەرگە قوعامنىڭ قاتىسۋى جانە ولاردى باقىلاۋ ماسەلەلەرى تالقىلاندى, دەپ حابارلايدى Egemen.kz.
جەرگىلىكتى پەداگوگيكالىق جانە عىلىمي-اكادەميالىق قاۋىمداستىق, ۇكىمەتتىك ەمەس ۇيىم وكىلدەرىنىڭ قاتىسۋىمەن وتكەن ءىس-شارانى پرەزيدەنت جانىنداعى قازاقستاننىڭ ستراتەگيالىق زەرتتەۋلەر ينستيتۋتى ۇيىمداستىردى.
پىكىرتالاس بارىسىندا ۇلتتىق قۇرىلتاي شەشىمدەرىنىڭ جۇزەگە اسىرىلۋىنا قاتىستى وزەكتى ماسەلەلەر, ونىڭ ىشىندە قوعامدىق قاتىسۋ مەن باقىلاۋ تەتىكتەرى, ازاماتتىق قوعامنىڭ, قوعامدىق كەڭەستەر مەن عىلىمي قاۋىمداستىقتىڭ مەملەكەتتىك ساياساتتى ازىرلەۋ جانە مونيتورينگتەۋ ۇدەرىستەرىندەگى ءرولى تالقىلاندى.
الاڭ قاتىسۋشىلارىن ونلاين فورماتتا قارسى الا وتىرىپ, پرەزيدەنت جانىنداعى قسزي ديرەكتورى جاندوس شايماردانوۆ قوعامدىق باقىلاۋ مەن مونيتورينگتىڭ مەملەكەتتىك ساياساتتىڭ اشىقتىعى, ەسەپتىلىگى جانە تيىمدىلىگىن ارتتىرۋدىڭ اجىراماس قۇرالدارى ەكەنىن اتاپ ءوتتى.
ء«بىز تالقىلاۋلاردى استانادا ەمەس, وڭىرلەردە وتكىزۋ تۋرالى ويلاستىرىلعان شەشىم قابىلدادىق, ويتكەنى قسزي وڭىرلىك ساراپتامالىق الەۋەتتى دامىتۋعا ەرەكشە كوڭىل بولەدى. ۇلتتىق قۇرىلتايدىڭ شەشىمدەرى ناقتى جۇزەگە اسىرىلاتىن دا, پراكتيكالىق سىن-قاتەرلەرگە تاپ بولاتىن دا – ءدال وسى جەرگىلىكتى جەرلەر. سوندىقتان ءبىز ەكىنشى تالقىلاۋدى تاريحي-مادەني مۇراسى باي, ستراتەگيالىق ەكونوميكالىق الەۋەتى جوعارى ءارى ينۆەستيتسيالىق تارتىمدىلىعى ارتىپ كەلە جاتقان ءوڭىر – اباي وبلىسىندا وتكىزۋدى ءجون كوردىك», دەدى قسزي ديرەكتورى.
قسزي ديرەكتورىنىڭ ورىنباسارى الۋا جولدىبالينا الاڭ قاتىسۋشىلارىن اشىق ديالوگقا شاقىرىپ, وڭىرلىك ساراپشىلاردى ىنتىماقتاستىققا ۇندەدى.
«وتكەن جىلى ينستيتۋتتا وڭىرلەرمەن جۇمىس ىستەۋگە باعىتتالعان ارناۋلى ءبولىم قۇرىلىپ, ونىڭ نەگىزىندە وڭىرلىك وكىلدەر جەلىسى قالىپتاستىرىلدى. بۇگىندە ءبىزدىڭ وكىلدەر ەلىمىزدىڭ 9 وڭىرىندە جۇمىس ىستەپ جاتىر», – دەدى ا.جولدىبالينا.
وسى تاقىرىپتى جالعاستىرا وتىرىپ, Alikhan Bokeikhan University رەكتورى الەكساندر كويچۋباەۆ بۇل جەتەكشى وڭىرلىك جوعارى وقۋ ورنىندا ىسكە اسىرىلىپ جاتقان, ۋنيۆەرسيتەتتى ۇلتتىق دەڭگەيگە شىعاراتىن باستامالار تۋرالى ايتتى.
پىكىرتالاس بارىسىندا ساراپشىلار, عالىمدار, ۇكىمەتتىك ەمەس ۇيىم وكىلدەرى وڭىرلەردەگى قوعامدىق باقىلاۋ مەن ساراپتامالىق الەۋەتتى كۇشەيتۋگە قاتىستى يدەيالارىمەن جانە باستامالارىمەن ءبولىستى.
اباي وبلىستىق قوعامدىق كەڭەسى توراعاسىنىڭ ورىنباسارى, ۇەۇ قاۋىمداستىعىنىڭ ۆيتسە-پرەزيدەنتى نيكولاي يساەۆ ءوز سوزىندە ءوڭىر وكىلدەرىن ورتالىق مەملەكەتتىك ورگاندار جانىنداعى قوعامدىق كەڭەستەردىڭ قۇرامىنا ەنگىزۋدى ۇسىندى.
قازاقستاننىڭ ۇلتتىق جاراتىلىستانۋ عىلىمدارى اكادەمياسىنىڭ اكادەميگى, پروفەسسور زەينۋللا توقاەۆ اگروونەركاسىپ كەشەنىنىڭ نەگىزى رەتىندە اگرارلىق عىلىمدى دامىتۋ قاجەتتىگىن اتاپ ءوتتى. ارداگەرلەر كەڭەسىنىڭ مۇشەسى اسقات ديۋسەمباەۆ سەمەيدىڭ پورتتى قالا رەتىندەگى الەۋەتىنە جانە ەرتىس وزەنىندەگى جولاۋشىلار مەن جۇك تاسىمالىن جانداندىرۋ مۇمكىندىگىنە نازار اۋداردى.
وڭىرلىك ساراپشىلار قاۋىمداستىعىنىڭ وكىلدەرى ايتقان ۇسىنىستار مەن باستامالار ۇلتتىق قۇرىلتاي قىزمەتىنىڭ مازمۇنىن كەڭەيتۋگە نەگىز بولۋدا.
ايسارا حۋانىشقىزى,
ل.گۋميلەۆ اتىنداعى ەۇۋ-ءدىڭ 2-كۋرس ستۋدەنتى