eGov.kz پورتالىندا جانە eGov Mobile ءموبيلدى قوسىمشاسىندا قۇجاتتى قاشىقتان قايتا راسىمدەۋگە مۇمكىندىك بەرەتىن پيلوتتىق جوبا ىسكە قوسىلدى. باستامانى قازاقستان رەسپۋبليكاسىنىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەن قازاقستان رەسپۋبليكاسىنىڭ ىشكى ىستەر مينيسترلىگى بىرلەسىپ جۇزەگە اسىردى, دەپ حابارلايدى Egemen.kz.
قىزمەتتى eGov.kz پورتالىندا قالاي الۋعا بولادى؟
قىزمەتكە تاپسىرىس بەرۋ ءۇشىن eGov.kz ەلەكتروندىق ۇكىمەت پورتالىندا اۆتوريزاتسيادان ءوتىپ, قاجەتتى قىزمەتتى تاڭداپ, بيومەتريالىق سايكەستەندىرۋدەن ءوتۋ, مالىمەتتەردى تولتىرۋ, قول قويۋ ءادىسىنىڭ ءبىرى ارقىلى ءوتىنىمدى راستاۋ جانە مەملەكەتتىك باج سالىعىن بانك قوسىمشاسى ارقىلى تولەۋ قاجەت.
قىزمەتتى eGov Mobile ءموبيلدى قوسىمشاسىندا قالاي الۋعا بولادى؟
ءموبيلدى قوسىمشا ارقىلى ءوتىنىم بەرۋ ءۇشىن قوسىمشادا اۆتوريزاتسيادان ءوتۋ, ءتيىستى قىزمەتتى تاڭداپ, بيومەتريالىق سايكەستەندىرۋدەن ءوتۋ, قاجەتتى دەرەكتەردى تولتىرۋ, قۇجاتتى الۋ ورنىن كورسەتۋ, مەملەكەتتىك باج سالىعىن تولەۋ جانە ءوتىنىمدى Face/Touch ID ارقىلى راستاۋ قاجەت.
«جەكە كۋالىك پەن پاسپورتتى بەرۋ» قىزمەتىن كىمدەر پايدالانا الادى؟
بۇل قىزمەتتى تەك جەكە كۋالىك يەسى عانا الا الادى. باسقا ادامنىڭ اتىنان, ءتىپتى سەنىمحات نەمەسە قامقورشىلىق نەگىزىندە دە ءوتىنىم بەرۋ مۇمكىن ەمەس.
جەكە كۋالىكتى ونلاين اۋىستىرۋ قانداي جاعدايلاردا مۇمكىن؟
جەكە كۋالىكتى ونلاين تۇردە تەك ونىڭ قولدانىلۋ مەرزىمى اياقتالعان جاعدايدا عانا اۋىستىرۋعا بولادى – قۇجات مەرزىمى اياقتالعانعا دەيىن 30 كۇن بۇرىن نەمەسە مەرزىمى وتكەننەن كەيىن 10 كۇن ىشىندە.
دايىن قۇجاتتى قايدان جانە قاشان الۋعا بولادى؟
جاڭا جەكە كۋالىكتى ءوتىنىش بەرۋشى الدىن الا كورسەتكەن تىركەۋ پۋنكتىنەن الۋعا بولادى. قۇجاتتى دايىنداۋدىڭ ستاندارتتى مەرزىمى – 15 جۇمىس كۇنى.
«جەكە كۋالىك پەن پاسپورتتى بەرۋ» قىزمەتى ءۇشىن مەملەكەتتىك باج سالىعى قانشا؟
قىزمەتتىڭ ستاندارتتى ءتۇرى ءۇشىن مەملەكەتتىك باج – 0,2 اەك. قۇجاتتى جەدەل راسىمدەۋ قاجەت بولعان جاعدايدا, ۇدەتىلگەن قىزمەت تۇرلەرى قولجەتىمدى: 3 جۇمىس كۇنىندە – 1 771 تەڭگە, 1 جۇمىس كۇنىندە – 3 372 تەڭگە.
ونلاين ءوتىنىم بەرۋ كەزىندە قانداي اقپاراتتىق قاۋىپسىزدىك شارالارى قاراستىرىلعان؟
ءوتىنىمدى بەرۋ ءراسىمى زاماناۋي دەرەكتەردى قورعاۋ ادىستەرى مەن قوسىمشا سايكەستەندىرۋ فاكتورلارى قاراستىرىلعان قورعالعان Digital ID جۇيەسى ارقىلى جۇزەگە اسىرىلادى. الدىمەن جۇيە ءوتىنىم بەرۋشىنىڭ جسن مەن تەلەفون ءنومىرىن ءموبيلدى ازاماتتار بازاسى ارقىلى تەكسەرەدى. سودان كەيىن تىركەلگەن تەلەفون نومىرىنە ءبىر رەتتىك قۇپيا كود (OTP) جىبەرىلەدى. بۇدان ءارى پايدالانۋشى قوسىمشا قورعاۋ شاراسى رەتىندە بيومەتريالىق سايكەستەندىرۋدەن ءوتۋى قاجەت. مۇنداي ءتاسىل جوعارى دەڭگەيدەگى قاۋىپسىزدىكتى قامتاماسىز ەتەدى جانە ءۇشىنشى تۇلعالاردىڭ قىزمەتكە قول جەتكىزۋ مۇمكىندىگىن تولىعىمەن بولدىرمايدى.
بيومەتريالىق دەرەكتەر قانشالىقتى سەنىمدى قورعالعان؟
بارلىق بيومەتريالىق دەرەكتەر «ۇلتتىق اقپاراتتىق تەحنولوگيالار» اق-نىڭ قورعالعان كونتۋرىندا شيفرلانعان تۇردە ساقتالادى. Digital ID اقپاراتتىق جۇيەسى قر ءتسدياوم اقپاراتتىق قاۋىپسىزدىك كوميتەتىنىڭ تالاپتارىنا سايكەستىگى جونىندەگى اكتىگە يە.
ەگەر قولدانۋشى بيومەتريالىق سايكەستەندىرۋدەن وتە الماسا نە ىستەۋ كەرەك؟
كەيبىر جاعدايلاردا پايدالانۋشىلار بيومەتريالىق سايكەستەندىرۋدەن وتە الماۋى مۇمكىن. بۇل بەت-الپەتىنىڭ ەرەكشەلىكتەرىنە, وپەراتسيادان كەيىنگى وزگەرىستەرگە, تىرتىقتاردىڭ بولۋىنا, جاس ەرەكشەلىكتەرىنە نەمەسە ميميكاعا بايلانىستى بولۋى ىقتيمال.
مۇنداي جاعدايلار قىزمەت كورسەتۋدەن باس تارتۋ بولىپ سانالمايدى – بۇل قاۋىپسىزدىك شاراسى رەتىندە قاراستىرىلعان. ونلاين سايكەستەندىرۋدەن ءوتۋ مۇمكىن بولماعان جاعدايدا, جۇيە اۆتوماتتى تۇردە بالاما نۇسقا – حقكو ارقىلى راسىمدەۋدى ۇسىنادى. بۇل رەتتە ءوتىنىش بەرۋشى وزىنە ىڭعايلى كەز كەلگەن حقكو-عا جۇگىنە الادى.
ايتا كەتەيىك, قىزمەت تۋرالى تولىق اقپاراتپەن eGov.kz پورتالىنداعى قىزمەت تولقۇجاتىنان تانىسۋعا بولادى.