2025 جىلعى 1 ماۋسىمداعى جاعداي بويىنشا ەلىمىزدە 45,2 مىڭ وتباسىنا, ياعني 242,4 مىڭ ادامعا اتاۋلى الەۋمەتتىك كومەك (ااك) تاعايىندالدى. بۇل ماقساتقا 13,4 ميلليارد تەڭگە بولىنگەن. جالپى 2025 جىلعا ااك تولەمدەرىن قارجىلاندىرۋ ءۇشىن رەسپۋبليكالىق بيۋدجەتتەن 132,9 ميلليارد تەڭگە قاراستىرىلعان, دەپ حابارلايدى Egemen.kz.
ااك اياسىندا كورسەتىلەتىن قولداۋ بىرنەشە باعىتتى قامتيدى:
تابىسى كەدەيلىك شەگىنەن تومەن ازاماتتارعا توقسان سايىن الەۋمەتتىك كومەك تاعايىندالادى; از قامتىلعان وتباسىلارداعى 1 جاستان 6 جاسقا دەيىنگى بالالارعا 1,5 اەك مولشەرىندە اي سايىن قوسىمشا تولەم تولەنەدى. بيىل 1 ماۋسىمداعى مالىمەت بويىنشا, مۇنداي قوسىمشا تولەم 74,5 مىڭ بالاعا تاعايىندالىپ, ونىڭ جالپى سوماسى 1,8 ميلليارد تەڭگەنى قۇرادى; جۇمىسقا ورنالاستىرۋ, كاسىپكەرلىك باستامالاردى قولداۋ ءۇشىن گرانتتار بەرۋ, كاسىبي دايارلىق پەن بىلىكتىلىكتى ارتتىرۋ كۋرستارىنا جولداۋ سەكىلدى جۇمىسپەن قامتۋدىڭ بەلسەندى شارالارى قاراستىرىلعان.ااك تاعايىنداۋعا ءوتىنىشتى تۇرعىلىقتى جەرى بويىنشا حالىقتى جۇمىسپەن قامتۋ ورتالىقتارىندا, اۋىل وكرۋگىنىڭ اكىمدەرى ارقىلى, سونداي-اق ەلەكتروندىق ۇكىمەت پورتالى — egov.kz ارقىلى ونلاين تۇردە بەرە الادى.
ەستەرىڭىزگە سالا كەتەيىك, 2025 جىلعى 1 قاڭتاردان باستاپ قازاقستاندا كەدەيلىك شەگى وڭىرلىك مەدياندىق تابىستىڭ 35%-ى دەڭگەيىندە, بىراق وڭىرلىك ەڭ تومەن كۇنكورىس دەڭگەيىنىڭ 70%-نان تومەن ەمەس مولشەردە ەسەپتەلەدى.