الماتى قالاسىنداعى جەتىسۋ كوميۋنيتي ورتالىعىندا ايەلدەرگە ارنالعان «SkinCare» اتتى شەبەرلىك ساباعى ۇيىمداستىرىلدى. ءىس-شارا بەت تەرىسىنە كۇندەلىكتى كۇتىم جاساۋدىڭ ءتيىمدى تاسىلدەرىن ۇيرەتۋگە باعىتتالدى. شاراعا تاجىريبەلى كوسمەتولوگ قارلىعاش تەمىرباەۆا ارنايى شاقىرىلدى, دەپ جازادى Egemen.kz.
ماستەر-كلاسس بارىسىندا قاتىسۋشىلار تەرى كۇتىمىنىڭ نەگىزگى كەزەڭدەرىمەن, ءتۇرلى تەرى تيپتەرىنە ساي كوسمەتيكالىق ونىمدەردى دۇرىس تاڭداۋمەن تانىسىپ, ماماننان پراكتيكالىق كەڭەستەر الدى. سونىمەن قاتار, كاسىبي ۇسىنىستار نەگىزىندە جەكە سۇراقتارىنا جاۋاپ الىپ, تەرىنى ساۋ ۇستاۋدىڭ جولدارىن مەڭگەردى.
— ايەلدەردىڭ ءوز-وزىنە كۇتىم جاساۋ مادەنيەتىن قالىپتاستىرۋ – وتە ماڭىزدى. دۇرىس كۇتىم تەك سىرتقى سۇلۋلىققا ەمەس, جالپى دەنساۋلىققا دا تىكەلەي اسەر ەتەدى, — دەدى قارلىعاش تەمىرباەۆا.
شارا سەنىمدى ءارى جىلى اتموسفەرادا ءوتىپ, قاتىسۋشىلار تاراپىنان وڭ باعاسىن الدى. جيىن سوڭىندا ولار ۇيىمداستىرۋشىلارعا ريزاشىلىقتارىن ءبىلدىرىپ, مۇنداي تانىمدىق كەزدەسۋلەردىڭ الداعى ۋاقىتتا دا جالعاسىن تابۋىنا نيەت ءبىلدىردى.