استانالىق اكەلى-بالالى ءىت ماماندار اۋىل بالاسىنا الەمدىك بىلىمگە جول اشتى. بۇلاي دەۋىمىزگە دە نەگىز جوق ەمەس. سەبەبى استانادا وقۋشى مەن ونىڭ اكەسى بىرىگىپ, جاساندى ينتەللەكت نەگىزىندە جۇمىس ىستەيتىن ءبىلىم بەرۋ پلاتفورماسىن جاساپ شىققان. UniMentor AI دەپ اتالاتىن بۇل باستاما – اۋىلداعى قاراپايىم وقۋشىنىڭ گارۆارد, وكسفورد سىندى بەدەلدى ۋنيۆەرسيتەتتەرگە تۇسۋىنە كومەكتەسەتىن زاماناۋي قۇرال. العاشقى بەس مىڭ قولدانۋشىسى بار ستارتاپ جىل سوڭىنا قاراي كەڭ كولەمدە ىسكە قوسىلماق.
وتباسىلىق جوبادان – ۇلتتىق يدەياعا
بۇگىندە شەتەلگە وقۋعا ءتۇسۋ تۋرالى كەڭەس بەرەتىن مامانداردىڭ قىزمەتى قىرۋار قارجىعا تۇسەتىنى بەلگىلى. مۇنداي كومەكتى ەكىنىڭ ءبىرى الا المايتىنى جاسىرىن ەمەس. وسى ماسەلەنى باسىنان وتكەرگەن ەرجان قۇدايبەرگەنوۆ پەن ونىڭ ۇلى جاڭگىرحان باۋىرجان وسى سالانىڭ قولجەتىمدىلىگىن ارتتىرۋدى ماقسات ەتىپ, بىرەگەي شەشىمگە كەلدى: بارشا بالاعا قولجەتىمدى اقىلدى كەڭەسشى جاساۋ.
ء«بىز ۇلىم ەكەۋمىز وعان لايىق ۋنيۆەرسيتەت ىزدەگەندە, كەڭەسشىلەردىڭ قىزمەتى مىڭداعان دوللار تۇراتىنىن كوردىك. بۇل قالا بالالارى ءۇشىن دە, اۋىلداعى بالالار ءۇشىن ءتىپتى قيالداعى دۇنيە ەكەنىن تۇسىندىك. سوندىقتان بارىنە بىردەي مۇمكىندىك بەرەتىن اقىلدى كومەكشى جاساپ شىعۋعا بەكىندىك», – دەيدى جوبانىڭ اۆتورى ەرجان قۇدايبەرگەنوۆ.
جاساندى ينتەللەكت كومەكتەسەدى
UniMentor AI – وقۋشىنىڭ ءبىلىمى, ءتىلى, قىزىعۋشىلىعى مەن قارجىلىق مۇمكىندىگىن ەسكەرە وتىرىپ, وعان لايىق شەتەلدىك وقۋ ورىندارىن ۇسىناتىن پلاتفورما. جۇيە موتيۆاتسيالىق حاتتاردى تالداپ, ەسسەدەگى مازمۇن مەن لوگيكالىق قۇرىلىمعا قاتىستى ناقتى ۇسىنىستار بەرەدى. سونداي-اق, سۇحبات سۇراقتارىن مودەلدەيتىن ارنايى ءبولىم بار – ياعني, AI وقۋشىنى شىنايى قابىلداۋ كوميسسياسىمەن سويلەسكەندەي سىناپ, جاۋاپتارعا كەرى بايلانىس بەرەدى.
جوبا نەگىزىنەن وقۋشىلاردىڭ دەرەكتەرىنە سۇيەنگەن. ونى جاڭگىرحان ءوزى ۇيرەنگەن Data Science داعدىلارى ارقىلى جاساپ شىققان. GeekBrains پلاتفورماسىنان ونلاين وقىپ شىققان ءجاسوسپىرىم تەك تەحنيكالىق مودەلدەرمەن شەكتەلمەي, شىنايى قولدانۋعا ىڭعايلى جۇيە قۇرا ءبىلدى.
پايدالانۋشىلار اراسىندا – اۋىل جاستارى دا بار
بۇگىندە UniMentor AI-دى العاشقى 5000 وقۋشى سىناقتان وتكىزىپ جاتىر. ولاردىڭ قاتارىندا نازارباەۆ زياتكەرلىك مەكتەپتەرىمەن قاتار, اۋىل مەكتەپتەرىنىڭ وقۋشىلارى دا بار. ياعني بۇل جوبا قالا مەن اۋىل اراسىنداعى ءبىلىم تەڭسىزدىگىن جويۋعا باعىتتالعان.
ايىنا نەبارى $9,99–19,99 تولەم ارقىلى وقۋشىلار وزىنە شەتەلدىك قابىلداۋ كەڭەسشىسىن جالداعانداي كومەك الا الادى. ال الەم بويىنشا مۇنداي قىزمەتتەرگە جىلىنا $2 000–8 000 جۇمسالاتىنىن ەسكەرسەك, UniMentor AI – قارجىلىق جاعىنان دا ءتيىمدى ءارى تەڭدەسى جوق بالاما.
جوبا رەسمي تۇردە اقش-تىڭ كەنتۋككي شتاتىندا تىركەلگەن. بۇل – حالىقارالىق قۇقىقتىق كەڭىستىكتە قاۋىپسىز جۇمىس ىستەۋدىڭ زاماناۋي ءتاسىلى. الايدا نەگىزگى عىلىمي-زەرتتەۋ توبى مەن تەحنيكالىق ىسكە اسىرۋشى كوماندا استانادا جۇمىس ىستەپ جاتىر. كۇزدە جوبانىڭ iOS جانە Android قوسىمشالارى شىقپاق. سونىمەن قاتار, 5000-نان استام گرانت پەن شاكىرتاقىنى ىزدەۋگە ارنالعان Scholarship Finder ءمودۋلى دە دايىندالۋدا.
جوبانىڭ ماقساتى – جىل سوڭىنا دەيىن 15 مىڭ بەلسەندى قولدانۋشىعا جەتۋ.
UniMentor AI – بۇل تەك وتباسىلىق باستاما ەمەس. بۇل – اۋىل بالاسىنا الەمدىك بىلىمگە جول اشاتىن ناقتى تەتىك. بۇگىنگى تاڭدا «اقىلدى كەڭەسشىنى» اۋىلداعى مەكتەپتەرگە جەتكىزۋ – ءبىلىم تەڭدىگىن قامتاماسىز ەتۋدىڭ زاماناۋي جولى. وسىنداي باستامالار ارقىلى قازاقستان تەحنولوگيالىق دامۋ مەن ادامي كاپيتالدى ينۆەستيتسيالاۋدىڭ جارقىن ۇلگىسىن كورسەتىپ وتىر.