سالا مينيسترلىگىنىڭ مالىمەتىنشە بۇگىندە اۋىل شارۋاشىلىعى القاپتارىنىڭ 2 ميلليون گەكتارى وڭدەلگەن. زيانكەستەرمەن كۇرەس شارالارىنا 443 ارنايى بۇرىككىش تەحنيكا, سونىڭ ىشىندە 49 درون جۇمىلدىرىلعان. زەرتتەۋ جۇمىستارىن 3,5 مىڭنان استام ادام جۇرگىزىپ جاتىر, دەپ حابارلايدى Egemen.kz.
جەرگىلىكتى جەرلەردەگى جۇمىستى وبلىس اكىمدەرىنىڭ ورىنباسارلارى باسقاراتىن جەدەل شتابتار ۇيلەستىرىپ وتىر.
شەكارا ماڭىنداعى اۋماقتار باقىلاۋدا تۇر. ناقتى اتاعاندا, 2-6 ماۋسىم ارالىعىندا قازاقستان مەن قىرعىزستاننىڭ شەكارا ماڭى اۋماقتارىندا بىرلەسكەن زەرتتەۋلەر جۇرگىزىلسە, 9-13 ماۋسىمدا قحر ماماندارىمەن بىرلەسكەن زەرتتەۋلەر ءوتتى. قازىرگى ۋاقىتتا قىرعىزستان مەن قىتاي تاراپىنان شەگىرتكەلەردىڭ ۇشىپ كەلۋى مەن كوشۋ قاۋپى جوق.
رەسەيمەن جانە وزبەكستانمەن شەكارالاس اۋماقتاردا شەگىرتكەلەردىڭ تارالۋ وشاقتارى انىقتالماعان.
شەگىرتكەلەردى باقىلاۋ جانە ولارعا قارسى كۇرەس شارالارى جوسپارلى تۇردە جالعاسىپ جاتىر.