ورتالىق ازيا وڭىرلىك ەكونوميكالىق ىنتىماقتاستىعى (واوەى) جوعارى لاۋازىمدى تۇلعالارىنىڭ وتىرىسى شەڭبەرىندە 17 ماۋسىمدا قىرعىز رەسپۋبليكاسىنىڭ شولپان-اتا قالاسىندا ورتالىق ازيا ەلدەرىنىڭ مەملەكەتتىك-جەكەشەلىك ارىپتەستىك ء(مجا) سالاسىنداعى ۋاكىلەتتى ورگاندارىنىڭ قاتىسۋىمەن وڭىرلىك فورۋم ءوتتى. اتالعان فورۋم – ءمجا تەتىكتەرىن دامىتۋ, قاتىسۋشى ەلدەردىڭ وسى سالاداعى تاجىريبە الماسۋ, ەكونوميكالىق ءوسىمدى ىنتالاندىرۋ, ينفراقۇرىلىمدىق جوبالاردى ىسكە اسىرۋدا بىرلەسكەن باستامالاردى ىلگەرىلەتۋ جانە ءمجا سالاسىنداعى ءوزارا ءتيىمدى ىنتىماقتاستىقتى نىعايتۋدى كوزدەيدى, دەپ جازادى Egemen.kz.
فورۋمعا ازەربايجان, گرۋزيا, قازاقستان, قىرعىز رەسپۋبليكاسى, قحر, موڭعوليا, پاكىستان, تاجىكستان, تۇرىكمەنستان, وزبەكستان ەلدەرىنىڭ وكىلدەرى قاتىسىپ, مەملەكەتتىك-جەكە مەنشىك ارىپتەستىك سالاسىنداعى قۇقىقتىق بازانى جەتىلدىرۋ, ءمجا بويىنشا وقىتۋ, حالىقارالىق كەلىسىمدەردى دامىتۋ مەن ترانسشەكارالىق جوبالاردى ىسكە اسىرۋ ماسەلەلەرىن تالقىلادى.
ءمجا بويىنشا ترانسشەكارالىق جوبالارعا ارنالعان سەسسيادا «قازاقستاندىق مەملەكەتتىك-جەكە مەنشىك ارىپتەستىك ورتالىعى» اق باسقارما توراعاسىنىڭ ورىنباسارى ايدوس كوبەتوۆ بايانداما جاساپ, قازاقستاننىڭ نەگىزگى جەتىستىكتەرىن, سونىڭ ىشىندە ءساتتى ىسكە اسىرىلعان جوبالاردى, ءمجا سالاسىنداعى جۇرگىزىلگەن زاڭنامالىق رەفورمالاردى, سونداي-اق حالىقارالىق قارجى ينستيتۋتتارىمەن بىرلەسىپ ىسكە اسىرىلاتىن ەرەكشە ماڭىزى بار جوسپارلانعان جوبالاردى تانىستىردى.
فورۋمدا تالقىلانعان نەگىزگى باستامالاردىڭ ءبىرى – الماتى مەن ىستىقكول اراسىن جالعايتىن جاڭا اۆتوجول جوباسى بولدى. جوبانىڭ الدىن الا قۇنى شامامەن 150 ملن اقش دوللارىن قۇرايدى. بۇل كولىك ءدالىزى قازاقستان مەن قىرعىزستان اراسىنداعى ترانسشەكارالىق ىنتىماقتاستىقتى نىعايتۋعا, كولىك قولجەتىمدىلىگىن ارتتىرۋعا ءارى جەكە ينۆەستيتسيا تارتۋدىڭ جاڭا مۇمكىندىكتەرىن اشۋعا باعىتتالعان. جاڭا جول قۇرىلىسى وڭىرلىك دەڭگەيدە مەملەكەتتىك-جەكەمەنشىك ارىپتەستىك تەتىكتەرىن قولدانۋدىڭ ايقىن مىسالى رەتىندە قاراستىرىلىپ وتىر. جوبانىڭ ءساتتى ىسكە اسىرىلۋى ورتالىق ازيادا وسىعان ۇقساس ترانسشەكارالىق ينفراقۇرىلىمدىق باستامالاردى ىسكە قوسۋعا سەرپىن بەرەدى دەپ كۇتىلىپ وتىر.
وسىلايشا, چولپون-اتادا وتكەن فورۋم ورتالىق ازيا ەلدەرىنىڭ وڭىرلىك ىنتىماقتاستىقتى تەرەڭدەتۋگە دەگەن ۇمتىلىسىن راستاپ, قاتىسۋشىلار ءمجا تەتىكتەرىن ودان ءارى دامىتۋعا جانە ناقتى بىرلەسكەن باستامالاردى ىسكە اسىرۋعا دايىن ەكەندىكتەرىن ءبىلدىردى.