قازاقستاندا سوڭعى ونجىلدىقتا حالىق سانى 2,8 ميلليون ادامعا ارتتى. بۇل تۋرالى ەكونوميكالىق زەرتتەۋلەر ينستيتۋتىنىڭ جەتەكشى ساراپشىسى شىنار تولەشوۆا مالىمدەدى, دەپ جازادى Egemen.kz.
ساراپشىنىڭ ايتۋىنشا, دەموگرافيالىق وسىمدە ايماقتار بويىنشا ايتارلىقتاي ايىرماشىلىق بار.
«حالىق سانى ەڭ كوپ وسكەن وڭىرلەر – تۇركىستان, ماڭعىستاۋ جانە الماتى وبلىستارى مەن ءىرى قالالار. ال كەرىسىنشە, حالىق سانى ازايعان وڭىرلەر – سولتۇستىك قازاقستان (8,7%-عا), قوستاناي (6,3%) جانە شىعىس قازاقستان (3,3-عا)», دەدى شىنار تولەشوۆا.
شىنار تولەشوۆا پاندەميا جىلدارى كۇتپەگەن جەردەن تۋ كورسەتكىشى ءۇشىن ەڭ ءساتتى كەزەڭ بولعانىن اتاپ ءوتتى.
«2020 جىلى تۋدىڭ جيىنتىق كوەففيتسيەنتى ءبىر ايەلگە شاققاندا 3,13 بالانى, ال 2021 جىلى 3,32 بالانى قۇرادى. بۇل دەڭگەي تاۋەلسىز قازاقستاننىڭ دەموگرافيالىق تاريحىندا العاش رەت ورىن الدى. الايدا بەبي-بۋم جىلدارىنان كەيىن تۋ كورسەتكىشىنىڭ بىرتىندەپ تومەندەۋى بايقالىپ وتىر. بۇل – قالىپتى دەموگرافيالىق زاڭدىلىق, دەگەنمەن, بۇل ۇدەرىستى باقىلاۋدا ۇستاۋ قاجەت», دەپ ءتۇسىندىردى ساراپشى.
ساراپشىنىڭ سوزىنشە, پاندەميا جىلدارى ءولىم-ءجىتىم كورسەتكىشىنىڭ كۇرت ءوسۋى حالىقتىڭ ءومىر ءسۇرۋ ۇزاقتىعىنا تىكەلەي اسەر ەتكەن.
«2019 جىلى ءومىر ءسۇرۋ ۇزاقتىعى 73,39 جاس بولسا, 2020 جىلى بۇل كورسەتكىش 71,51 جاسقا, ال 2021 جىلى 70,38 جاسقا دەيىن تومەندەدى. 2024 جىلى ءومىر ءسۇرۋ ۇزاقتىعى 75,44 جاسقا جەتتى. ايەلدەر – ورتا ەسەپپەن 79,42 جاس, ەرلەر – 71,33 جاس ءومىر سۇرەدى. وكىنىشكە قاراي, ەرلەر مەن ايەلدەر اراسىنداعى ءومىر ءسۇرۋ ۇزاقتىعىنىڭ ايىرماشىلىعى 8 جاستى قۇراپ وتىر جانە بۇل سوڭعى ونجىلدىقتا وزگەرىسسىز ساقتالىپ كەلەدى», دەدى ش.تولەشوۆا.
سونىمەن قاتار دەموگرافيالىق ۇدەرىستەردىڭ تاعى ءبىر ماڭىزدى كورسەتكىشى – كوشى-قون. بۇل تۇرعىدا دا سوڭعى جىلدارى ايتارلىقتاي وزگەرىس بايقالادى.
«2012 جىلدان 2022 جىلعا دەيىن قازاقستاننان كوشىپ كەتۋشىلەر سانى كوبىرەك بولعان. الايدا 2023 جىلدان باستاپ بۇل كورسەتكىش وڭ باعىتتا وزگەرىپ, كوشىپ كەلۋشىلەر سانى ارتا باستادى. 2023 جىلى كوشى-قون سالدوسى 9 293 ادامدى, ال 2024 جىلى 17 164 ادامدى قۇرادى. بۇل – حالىق سانىنىڭ وسۋىنە كوشى-قوننىڭ دا وڭ اسەر ەتىپ وتىرعانىن كورسەتەدى», دەدى ساراپشى.
شىنار تولەشوۆانىڭ پايىمداۋىنشا, قازاقستانداعى دەموگرافيالىق وزگەرىستەر جالپى العاندا وڭ ءۇردىستى كورسەتىپ وتىر. بىراق وڭىرلىك تەڭسىزدىك, ەرلەر مەن ايەلدەر اراسىنداعى ءومىر ۇزاقتىعىنداعى الشاقتىق جانە تۋ كورسەتكىشىنىڭ تۇراقسىزدىعى سەكىلدى فاكتورلارعا ەرەكشە نازار اۋدارۋ قاجەت.