قازاقستانداعى «كەلەشەك مەكتەپتەرى» ۇلتتىق جوباسى اياسىندا ءبىلىم بەرۋ ينفراقۇرىلىمىن جاڭعىرتۋ باعىتىندا باتىس قازاقستان وبلىسىندا قارقىندى قۇرىلىس جۇمىستارى ءجۇرىپ جاتىر. جوبا شەڭبەرىندە بىرنەشە جاڭا ءبىلىم وشاقتارى سالىنادى, دەپ حابارلايدى Egemen.kz.
بايتەرەك اۋدانىنىڭ دوستىق اۋىلىندا 1200 ورىندىق ءىرى مەكتەپتىڭ قۇرىلىسى قولعا الىنعان. زاماناۋي ءپان كابينەتتەرىمەن جابدىقتالاتىن بۇل ءبىلىم ورداسى اۋىل بالالارىنا ساپالى ءبىلىم الۋعا مۇمكىندىك بەرمەك. سونىمەن قاتار, بايقونىس اۋىلىندا 300 ورىندىق مەكتەپ سالىنىپ جاتىر. جاڭا وقۋ ورنى اپاتتى جاعدايداعى مەكتەپتىڭ ورنىن باسىپ, وقۋشىلارعا قاۋىپسىز جانە قولايلى جاعداي ۇسىنادى.
قۇرىلىس نىساندارىمەن ارنايى تانىسقان وبلىس اكىمىنىڭ ورىنباسارى قايىرجان مەندىعاليەۆ پەن وبلىستىق ءبىلىم باسقارماسىنىڭ باسشىسى ەلدوس سافۋللين جوبالاردىڭ ساپاسىنا جانە مەرزىمىندە اياقتالۋىنا ەرەكشە نازار اۋداردى.
ورال قالاسىندا دا وڭ وزگەرىستەر بايقالادى. جاڭگىر حان كوشەسىندە 600 ورىندىق مەكتەپتىڭ قۇرىلىسى ءجۇرىپ جاتىر. بۇل جوبا قالاداعى ءۇش اۋىسىمدا وقىتۋ ماسەلەسىن شەشۋگە باعىتتالعان جانە وڭىردەگى ءبىلىم ساپاسىن ارتتىرۋعا ىقپال ەتەدى.