قىتايلىق «Yili Chuanning Biological Co.» كومپانياسى الماتى وبلىسىندا جۇگەرىنى تەرەڭ وڭدەۋ سالاسىندا اۋقىمدى ينۆەستيتسيالىق جوبانى جۇزەگە اسىرادى, دەپ حابارلايدى Egemen.kz.
«قىتاي – ورتالىق ازيا» اتتى ەكىنشى يندۋستريالىق-ينۆەستيتسيالىق ىنتىماقتاستىق فورۋمى اياسىنداعى ماڭىزدى وقيعالاردىڭ ءبىرى – الماتى وبلىسىنىڭ اكىمدىگى مەن قىتايدىڭ «Yili Chuanning Biological Co.» كومپانياسى اراسىندا ىنتىماقتاستىق تۋرالى مەموراندۋمعا قول قويىلۋى بولدى. وسىنىڭ ناتيجەسىندە ەڭبەكشىقازاق اۋدانىندا جۇگەرى مەن بيدايدى تەرەڭ وڭدەۋگە باعىتتالعان اگروونەركاسىپتىك پارك اشىلادى.الماتى وبلىسىنىڭ اكىمدىگى اگروونەركاسىپتىك سەكتورعا ستراتەگيالىق ينۆەستورلاردى تارتۋ بويىنشا جۇيەلى جۇمىستاردى جالعاستىرىپ كەلەدى. اتالعان كومپانيا قىتايدىڭ جەتەكشى بيوفارماتسەۆتيكالىق كاسىپورىندارىنىڭ ءبىرى.
جوبا اياسىندا زاماناۋي بيوتەحنولوگيالار ەنگىزىلىپ, امينقىشقىلدار, پروبيوتيكتەر مەن بيولوگيالىق ىدىرايتىن ماتەريالدار (ونىڭ ىشىندە قاپتاما جانە مەديتسينالىق بۇيىمدار) وندىرىلەدى. جالپى ينۆەستيتسيا كولەمى – شامامەن 500 ميلليون اقش دوللارى. جوبانىڭ جىلدىق وندىرىستىك قۋاتى – 400 مىڭ توننا جۇگەرى مەن 500 مىڭ توننا بيداي, ال قۇرىلاتىن جاڭا جۇمىس ورىندارىنىڭ سانى 1 000 ادامعا دەيىن جەتۋى مۇمكىن.
كاسىپورىن «شەلەك» يندۋستريالىق ايماعىندا ورنالاسادى. قازىرگى ۋاقىتتا كومپانيا ماماندارى جوبانى كەزەڭ-كەزەڭىمەن ىسكە اسىرۋ ستراتەگياسىن ازىرلەۋمەن قاتار, وندىرىستىك الاڭنىڭ ينفراقۇرىلىمى, لوگيستيكاسى جانە ەكونوميكالىق پارامەترلەرى بويىنشا كەشەندى تالداۋ جۇمىستارىن جۇرگىزىپ جاتىر.
الماتى وبلىسى