كاتونقاراعايدىڭ تورىندە ءۇش كۇنگە سوزىلعان «التاي – تۇركى الەمىنىڭ التىن بەسىگى» اتتى فەستيۆال ءوتتى. وعان موڭعوليا, ساحا, تىۆا, قىرعىزستان, وزبەكستان, تۇركيا سىندى باۋىرلاس ەلدەردەن ونەردىڭ جارىق جۇلدىزدارى قۇرمەتتى قوناق رەتىندە شاقىرىلدى. وسى كۇندەرگە ورايلاستىرىپ, قازاقتىڭ قابىرعالى قالامگەرلەرى قاليحان ىسقاق پەن ديداحمەت ءاشىمحاننىڭ مەرەيتويلارى دا اتاپ ءوتىلدى, دەپ جازادى Egemen.kz.
رۋحاني شارا ديداحمەت ءاشىمحاننىڭ شىعارماشىلىعى مەن ءومىر جولىنا ارنالعان كونفەرەنتسيامەن باستالعان. ودان كەيىن اقىن-جازۋشىلار مەن اۋدان جۇرتى قاليحاننىڭ اۋىلى – توپقايىڭنىڭ ءور جاعىندا ۇيىمداستىرىلعان جىر كەشىندە باس قوستى.
شىتىرلاپ جانعان الاۋ اينالاسىنداعى ەرەكشە كەشكە مەملەكەتتىك كەڭەسشى ەرلان قارين, وبلىس اكىمى نۇرىمبەت ساقتاعانوۆ, اباي وبلىسىنىڭ اكىمى بەرىك ءۋالي قاتىستى.
ء«تور التاي قاليحانى مەن ديداحمەتىن جىرلايدى» رەسپۋبليكالىق فەستيۆالىندە 12 اقىن جىردان شاشۋ شاشتى.
يت تۇمسىعى وتپەس ورماندى بەتكەيدەن ارى اسساڭ, جارقىراپ بۇركىت شىڭى كورىنەر ەدى...
ەرتەسىندە كاتونقاراعايدا جىڭگىر توي باستالدى. بايگە, كوكپار, اۋدارىسپاق...
كوكپاردان ءبىرىنشى ورىندى ۇلان اۋدانىنىڭ كومانداسى قانجىعاعا باستى. ەكىنشى ورىندى سامار اۋدانىنىڭ كوكپارشىلارى ەنشىلەسە, ءۇشىنشى ورىندى ريددەر قالاسىنان كەلگەن جىگىتتەر قاناعات تۇتتى.
ءبىرىنشى ورىن العان كوكپارشىلاردىڭ قۋانىشتارى قويىندارىنا سىيمادى
بۇل كۇنى ساۋدا دا قىزىپ تۇرعان.
اۋدان-اۋدانداردان قولونەر شەبەرلەرى كورمە اكەلگەن. گلۋبوكوە اۋدانىنان كەلگەن شەبەر نۇرجان ەسحوجين تورسىقتىڭ پايداسى تۋرالى ايتتى.
ءتۇس اۋا 25 شاقىرىمدىق الامان بايگەنى كورۋگە جينالعان جۇرتتا قيساپ بولمادى.
مارەگە ءبىرىنشى بولىپ كەلگەن تۇلپار يەسىن سۋ جاڭا اۆتوكولىك كۇتىپ تۇرعان. ايتا كەتەيىك, مىڭ ورىنعا شاقتالعان يپپودروم فەستيۆال قارساڭىندا كاسىپكەرلەردىڭ كۇشىمەن جوندەلدى. سونداي-اق, ۇلتتىق ويىنداردىڭ جۇلدەسى دە كاسىپكەرلەردىڭ دەمەۋشىلىگىمەن جۇزەگە استى.
مارە سىزىعىن ءبىرىنشى بولىپ كەسكەن شاباندوزداردى جۋرناليستەر قاۋىمى سۇراقتىڭ استىنا الدى. الامان بايگەدە ءبىرىنشى بولىپ تارباعاتاي اۋدانىنىڭ سايگ ۇلىگى كەلدى. ەكىنشى ورىندى كۇرشىم, ءۇشىنشى ورىندى زايسان اۋدانىنىڭ ارعىماعى الدى.
تۇسكە قاراي جۇرت ايتىس كورۋگە جينالدى. ينە شانشىر ورىن جوق. كەيبىرەۋلەر جەرگە توسەنىش سالىپ, جامباستاپ جاتىپ تاماشالادى.
اقىندار التايدىڭ تاريحىنان تارتىپ بۇگىنىنە دەيىن جىرعا قوستى. تارتىستى ايتىس كورگەن كورەرمەننىڭ ايىزى ءبىر قاندى-اۋ.
ءدۇبىرلى شارادا جۇرتتىڭ ءبىرى توي كورسە, ەندى ءبىرىنىڭ قوناق كۇتۋدەن قولدارى قالت ەتپەدى...
ال كەشكى گالا كونتسەرت وتە جوعارى دەڭگەيدە ءوتتى. تۇركى الەمىنىڭ تۇتاس تاريحى جيناقتالعان پرولوگپەن باستالعان كونتسەرت راسىمەن دە التاي – تۇركى جۇرتىنىڭ التىن بەسىگى ەكەندىگىن سەزدىرىپ تۇردى.
وبلىس اكىمى نۇرىمبەت ساقتاعانوۆ حالىقتى قۇتتىقتاپ, شارانىڭ ماڭىزدىلىعىن ايتتى. ساحا ەلىنەن كەلگەن ەڭ كىشكەنتاي ونەرپاز ارحان ۋيگۋعا دومبىرا سىيلادى. جەتى جاستاعى ونەرپاز «دومبىرا» انىمەن تانىمال.
كەش سوڭىن ادەتتەگىدەي مۋزارت توبى ء«وز ەلىم» انىمەن جاپتى.
شىعىس قازاقستان وبلىسى,
كاتونقاراعاي اۋدانى