ق. جۇبانوۆ اتىنداعى اقتوبە وڭىرلىك ۋنيۆەرسيتەتىندە «جاسىل بولاشاق: ەكولوگيالىق مادەنيەتتى بىرگە قالىپتاستىرامىز» اتتى وقۋشىلارعا ارنالعان ەكولاگەر ۇيىمداستىرىلدى. وعان اقتوبە قالاسىنداعى التى مەكتەپتىڭ 35 وقۋشىسى قاتىستى. جوبانىڭ ماقساتى – مەكتەپ وقۋشىلارى اراسىندا ەكولوگيالىق مادەنيەت پەن سانالى تۇتىنۋ داعدىلارىن ۇيرەتۋ, دەپ حابارلايدى Egemen.kz.
اقتوبەدەگى جوعارى وقۋ ورىندارى مەن مەكتەپتەر اراسىنداعى ارىپتەستىك بايلانىس اياسىندا ۇيىمداستىرىلعان وسى جوبادا قورشاعان ورتانى بۇلدىرەتىن تۇرمىستىق زاتتاردىڭ قولدانۋ دەڭگەيىن ازايتۋ, سيرەك وسىمدىكتەردى قورعاۋ, ەكوجۇيەنىڭ تەپە-تەڭدىگىن ساقتاۋداعى ادامداردىڭ جاۋاپكەرشىلىگى تاقىرىپتارى قامتىلىپ, ەكوسانا مەن ەكولوگيالىق مادەنيەت تۋرالى پىكىرتالاستار ءوتتى. «ەكوۆەرت» ستۋدەنتتىك كلۋبى مۇشەلەرى وقۋشىلارعا وسىمدىك قۇرامىنداعى نيترات مولشەرىن انىقتاۋدى ۇيرەتتى, قالدىقتاردى قاراپايىم وڭدەۋ تاجىريبەلەرى جاسالدى. بالالار ۋنيۆەرسيتەت جانىنداعى جىلىجايعا گۇل وتىرعىزىپ, توپىراق قۇرامىن بايىتۋ تاجىريبەسىن جۇرگىزدى. سپيكەرلەر قاتارىندا بولعان ەكولوگيا ساراپشىلارى, ستۋدەنتتىك ۇيىم جەتەكشىلەرى, وقىتۋشىلار الدىندا بالالار جوبالارىن قورعاپ, شىعارماشىلىق تاپسىرمالار ورىندادى.
«جازعى لاگەر جۇمىسى بالالاردى تابيعاتتى سۇيۋگە ۇيرەتەدى. ولار وسىمدىكتەر دۇنيەسىنىڭ ارالۋاندىعىن زەردەلەپ, كەيبىر تۇرلەرىنىڭ ازايىپ كەتۋىنە سەبەپ بولعان جايتتەردى تالدايدى. ءبىز, ەرەسەكتەر, بالالارعا سانالى تۇتىنۋ مەن قورشاعان ورتاعا قۇرمەتپەن قاراۋدى ەرتە باستان ۇيرەتۋىمىز كەرەك», دەيدى ق. جۇبانوۆ اتىنداعى اقتوبە وڭىرلىك ۋنيۆەرسيتەتى الەۋمەتتىك ماسەلەلەر جانە جاستار ساياساتى دەپارتامەنتىنىڭ ديرەكتورى بەكارىس ولجاباەۆ.
اقتوبە وبلىسى.