استانا قالاسىنداعى №112 مەكتەپتە (A102, 37-اۋديتوريا) Digital Generation IT مەكتەپ جانىنداعى جازعى لاگەرىنىڭ ءبىرىنشى اۋىسىمىنىڭ قورىتىندىسىنا ارنالعان سالتاناتتى ءىس-شارا ءوتتى. جازعى دەمالىس كەزىندە اقپاراتتىق تەحنولوگيالار باعىتى بويىنشا ءبىلىم العان 7-دەن 15 جاسقا دەيىنگى وقۋشىلار ءوز جەتىستىكتەرىن ورتاعا سالدى, دەپ جازادى Egemen.kz.
ءىس-شارا ساعات 10:00-دە باستالدى. العاشقى بولىمدە وقۋشىلار جاز بويى مەڭگەرگەن داعدىلارىن كورسەتىپ, ءتۇرلى باعىتتاعى جوبالارىن تانىستىردى. باعدارلاما اياسىندا بالالار باعدارلامالاۋ نەگىزدەرىن, 3D مودەلدەۋدى, سايت جاساۋدى, روبوتوتەحنيكانى جانە باسقا دا تسيفرلىق باعىتتاردى ۇيرەنگەن.
ءىس-شارانىڭ ەكىنشى بولىگىندە ءار مەكتەپتىڭ وقۋشىلارى جاساعان روبوتتار مەن سايتتار كورمەگە قويىلدى. جوبالار بالالاردىڭ وزىندىك ويلاۋ قابىلەتىن, تەحنيكالىق ءبىلىمىن جانە شىعارماشىلىق يكەمىن ايقىن كورسەتتى. ءار وقۋشى ءوز جۇمىسىن تانىستىرىپ, ونى جاساۋ بارىسىنداعى يدەيالارىمەن ءبولىستى.
كورمە سوڭىنان كەيىن وقۋشىلار اراسىندا روبو-سۋمو جانە درون جارىستارى ۇيىمداستىرىلدى. بۇل سايىستار وقۋشىلاردىڭ تەحنيكالىق قۇرىلعىلاردى باسقارۋ شەبەرلىگىن جانە توپپەن جۇمىس ىستەۋ قابىلەتتەرىن دامىتۋعا باعىتتالعان. كورەرمەندەر, اتا-انالار مەن مۇعالىمدەر بۇل جارىستاردان ەرەكشە اسەر الدى.
Digital Generation IT جازعى لاگەرى بالالاردىڭ تسيفرلىق ساۋاتتىلىعىن ارتتىرۋعا, شىعارماشىلىق قابىلەتتەرىن دامىتۋعا جانە كوماندالىق رۋح قالىپتاستىرۋعا باعىتتالعان. لاگەر شەڭبەرىندە 3D مودەلدەۋ مەن زاماناۋي تسيفرلىق قۇرالدار ارقىلى وقۋشىلاردىڭ بىلىمگە دەگەن قىزىعۋشىلىعى مەن ەركىن ويلاۋ داعدىسى تەرەڭدەي ءتۇستى.
باعدارلاماعا استاناداعى №95, 102, 107, 108, 109, 111 جانە 112 مەكتەپتەردىڭ وقۋشىلارى قاتىستى. الداعى ۋاقىتتا وسى مەكتەپتەردىڭ وقۋشىلارى اراسىندا جاڭا جوبالار مەن بىرلەسكەن جارىستار ۇيىمداستىرۋ جوسپارلانىپ وتىر.
ءىس-شارا سوڭىندا اتا-انالار مەن ۇستازدار لاگەردىڭ ماڭىزدىلىعىن اتاپ ءوتىپ, ۇيىمداستىرۋشىلارعا العىستارىن جەتكىزدى. وقۋشىلار بۇل لاگەردە تەك ءبىلىم عانا ەمەس, جاڭا دوستار, شابىت جانە بولاشاققا سەنىم تاپقانىن ايتتى.
اسەل مۇراتبەكقىزى, استانا قالاسى №112
ورتا مەكتەپتىڭ مۇعالىمى