شاعىن جانە ورتا كاسىپكەرلىكتى دامىتۋ قازاقستان ۇكىمەتى العا قويعان نەگىزگى ماقسات پەن باسىم باعىتتاردىڭ ءبىرى. وسىعان بايلانىستى بيىل شىمكەنت قالاسىندا 260 ازاماتقا 400 ايلىق ەسەپتىك كورسەتكىشكە (اەك) دەيىنگى قايتارىمسىز گرانت بەرۋ جوسپارلانىپ وتىر. بۇل سوما – 1 ملن 572 800 تەڭگەنى قۇرايدى. ءوتىنىم قابىلداۋ رەسپۋبليكا كولەمىندە 21 مامىر مەن 3 ماۋسىم ارالىعىندا پورتال ارقىلى ونلاين تۇردە وتكەن بولاتىن, دەپ حابارلايدى Egemen.kz.
ءوز كەزەگىندە ءوتىنىم بەرگەن ۇمىتكەرلەر وزدەرىنىڭ بيزنەس-جوبالارىن 9-19 ماۋسىم ارالىعىندا كوميسسيا الدىنا جەكە شىعىپ قورعاپ شىعۋ كەرەك. ال كوميسسيا قۇرامىنا قالالىق ءماسليحات دەپۋتاتتارى, قوعامدىق كەڭەس مۇشەلەرى, جۋرناليستەر مەن كاسىپكەرلەر ەنىپ وتىر. جوبالاردى سۇزگىدەن وتكىزەتىن كوميسسيا مۇشەلەرى بىرىنشىدەن ونىڭ ومىرشەڭدىگىنە, ۇمىتكەردىڭ سول سالاداعى تاجىريبەسىنە, كەلەشەكتە ول جوبامەن قانشا جۇمىس ورىندارىن اشۋعا بولاتىنىنا, سونداي-اق جوبانىڭ وندىرىستىك الەۋەتىنە نازار اۋدارۋى ءتيىس.
ايتا كەتكەن ءجون 2024 جىلى شىمكەنت قالاسى بويىنشا قايتارىمسىز گرانت 428 تۇرعىنعا ماقۇلداندى. كوميسسيا وڭ شەشىم شىعارعان بيزنەس باستامالاردىڭ ىشىندە مال جانە قۇس شارۋاشىلىعىنا-44, قىزمەت كورسەتۋ سالاسىنا-100, كونديتەر جانە نان ونىمدەرىنە-56, تىگىس تىگۋگە-84, جارتىلاي فابريكاتتار وندىرىسىنە-31, جيھاز جاساۋعا-8, جالپى ءوندىرىس سالاسىنا-62 جانە قوعامدىق تاماقتانۋ ورنىن اشۋعا-43 جوبا ارنالدى.
جاۋاپتى سالا ماماندارىنىڭ ايتۋىنشا بيىل الەۋمەتتىك وسال توپتاردان 934 ازامات ءوتىنىم تاپسىرىپتى. ال كونكۋرس بارىسىندا كوميسسيا وتىرىسىنىڭ اشىقتىعىن قامتاماسىز ەتۋ ءۇشىن الەۋمەتتىك جەلىلەردىڭ رەسمي پاراقشالارى ارقىلى تىكەلەي ەفيرلەر ۇيىمداستىرىلادى. وسى تۇستا ەسكەرەر ءبىر ءجايت قايتارىمسىز گرانت قارجىسى نەسيەنى وتەۋگە, جىلجىمايتىن م ۇلىك ساتىپ الۋعا, الكوگول, تەمەكى سەكىلدى اكتسيزدەلەتىن ونىمدەر شىعارۋعا بەرىلمەيدى.
شىمكەنت