ەلىمىزدە العاش رەت اباي اتىنداعى ۇلتتىق وپەرا جانە بالەت تەاترىنىڭ ساحناسىندا الەمدەگى ەڭ كونە ءارى ەڭ اتاقتى كونتسەرتتىك رويال وندىرۋشىلەرىنىڭ ءبىرى – «Bösendorfer» برەندىنىڭ ءرويالى تانىستىرىلدى. ايگىلى كومپانيانىڭ تاريحى ەكى عاسىرعا جۋىق ۋاقىتتى قامتيدى.
قازاق ونەرىندەگى ەلەۋلى ءىس-شارا استانا جانە الماتى قالالارىندا الما-كەزەك جالعاسىپ ءوتتى. سيقىرلى ساز توگىلگەن مۋزىكا اسپابىن ەل ساحناسىنا الدىرۋعا ۇيىتقى بولعان ءىس-شارانىڭ رەسمي سەرىكتەسى, ەلىمىزدەگى «Bösendorfer» برەندىنىڭ وكىلى «راينو» جشس ديرەكتورلارى – ەرجان قۇشانوۆ پەن راحيم توقسانباەۆ.
تانىستىرىلىم اياسىندا برەندتىڭ كوشباسشىلىق ءونىمى — «Bösendorfer 280 Vienna Concert» كونتسەرتتىك ءرويالى كورسەتىلدى. بۇل اسپاپ كۇشەيتىلگەن رەزونانستىق دەكاسىمەن جابدىقتالعان جانە ۆەنالىق ءداستۇر مەن زاماناۋي تەحنولوگيالاردىڭ ءمىنسىز ۇيلەسىمىن بەينەلەيدى. بۇعان دەيىن اتالعان برەند ەل نارىعىندا بۇرىن-سوڭدى ۇسىنىلماعان ەدى.
رويالدەردىڭ العاشقى ۇلگىلەرىنىڭ ءبىرى احمەت جۇبانوۆ اتىنداعى رەسپۋبليكالىق مۋزىكا مەكتەبىنە ورناتىلدى. 2025 جىلى جاسالعان جاڭا مودەلدىڭ ۇزىندىعى – 2,8 مەتر جانە بۇل قازىرگى ۋاقىتتا ەلىمىزدەگى ەڭ ۇزىن كونتسەرتتىك رويال.
«بۇل — ءبىزدىڭ اۋستريالىق ارىپتەستەرىمىزبەن قولعا العان العاشقى جوبامىز. بيىل بۇل اسپاپتاردى وقۋ ورىندارىنا, كونتسەرتتىك ۇيىمدارعا جانە مۋزىكالىق مەكتەپتەرگە كەڭىنەن جەتكىزۋدى جوسپارلاپ وتىرمىز», دەپ اتاپ ءوتتى كومپانيا وكىلى راحيم توقسانباەۆ.
اتالعان تانىستىرىلىم ەلىمىزدەگى مۋزىكالىق مادەنيەت پەن كاسىبي ءبىلىم بەرۋدىڭ دامۋىنا ماڭىزدى ۇلەس قوسادى. «Bösendorfer» برەندىنىڭ ەلگە كەلۋى ۇستازدار مەن ستۋدەنتتەر جانە كونتسەرتتىك ورىنداۋشىلار ءۇشىن شىعارماشىلىقتىڭ جاڭا مۇمكىندىگىن اشپاق.
ءىس-شارا جابىق فورماتتا, ارنايى شاقىرىلعان قوناقتاردىڭ قاتىسۋىمەن, كامەرالىق اتموسفەرادا ءوتتى. مارتەبەلى مەيمانداردىڭ قاتارىندا «Bösendorfer» كومپانياسىنىڭ باس ديرەكتورى س.گريۋبميۋللەر جانە برەندتىڭ توپ-مەنەدجمەنت وكىلدەرى بولدى. بۇل كەزدەسۋ حالىقارالىق برەند پەن ەلىمىزدىڭ مادەني ينفراقۇرىلىمى اراسىنداعى كاسىبي ديالوگتى نىعايتۋ تۇرعىسىنان اسا ماڭىزدى وقيعاعا اينالدى.
الماتى