ءماجىلىس دەپۋتاتى اسىلبەك نۇرالين ەلوردا مەن ءىرى قالالارداعى كولىك كەپتەلىسىن ازايتۋ ماقساتىندا مەملەكەتتىك ورگاندار مەن ۇلتتىق كومپانيالاردا جۇمىس كۇنىنىڭ باستالۋ ۋاقىتىن تاڭعى 7:00–8:00-گە جىلجىتۋدى ۇسىندى, دەپ حابارلايدى Egemen.kz.
دەپۋتاتتىڭ ايتۋىنشا, استانا مەن باسقا دا ءىرى قالالاردا كولىك قوزعالىسىنىڭ كۇردەلەنۋى كۇن ساناپ ارتىپ كەلەدى. جولداردىڭ شامادان تىس جۇكتەلۋى مەن قوعامدىق كولىكتىڭ تۇراقسىز ءجۇرۋى قالا تۇرعىندارى مەن ينفراقۇرىلىمعا ايتارلىقتاي سالماق تۇسىرەدى.
«بولجامدارعا سايكەس, الداعى جىلدارى ەلوردا حالقىنىڭ سانى 2 ميلليون ادامعا جەتۋى مۇمكىن. قازىرگى تاڭدا جۇمىس ورىندارىنىڭ باسىم بولىگى مەن الەۋمەتتىك ينفراقۇرىلىم نىساندارى قالانىڭ ورتالىق بولىگىندە شوعىرلانعان. جاقىن ماڭداعى ەلدى مەكەندەردەن قالاعا ءبىر ۋاقىتتا اعىلعان ادامدار كولىك كوللاپسىنا سەبەپ بولادى», دەدى دەپۋتات.
ونىڭ ايتۋىنشا, ستاتيستيكالىق مالىمەتتەرگە سايكەس, استانادا جۇمىس ىستەيتىندەردىڭ 50 پايىزدان استامى مەملەكەتتىك مەكەمەلەردە ەڭبەك ەتەدى.
«وسىعان بايلانىستى, ورتالىق اتقارۋشى ورگاندار, ۇلتتىق كومپانيالار مەن ولاردىڭ ۆەدومستۆولىق ۇيىمدارىنىڭ قىزمەتكەرلەرى ءۇشىن كولىك اعىنىن قايتا ءبولۋ مۇمكىندىگىن قاراستىرۋ قاجەت. سونداي-اق اگلومەراتسيالىق كولىك ساياساتى اياسىندا اتالعان ساناتتاعى مەكەمەلەر ءۇشىن جۇمىس ۋاقىتىن وزگەرتۋ مۇمكىندىگىن قاراستىرۋ كەرەك. زەرتتەۋلەر تاڭعى ۋاقىت ەڭبەك ونىمدىلىگى تۇرعىسىنان تيىمدىرەك ەكەنىن كورسەتىپ وتىر. جۇمىس ۋاقىتىن ساعات 9:00-دەن 7:00–8:00-گە جىلجىتۋ ۇسىنىلىپ وتىرعان شارالارعا ساي كەلەدى», دەدى اسىلبەك نۇرالين.
وسىعان بايلانىستى ول كولىك سالاسىنداعى پروفيلاكتيكالىق ءىس-شارالاردى ازىرلەۋ, بيۋدجەتتەردە ءىرى قالالاردىڭ ينفراقۇرىلىمىن جاڭعىرتۋعا قوسىمشا قاراجات قاراستىرۋ جانە جول ايرىعىن, وتكەلدەردى جوسپارلاۋ مەن سالۋ جانە جول قوزعالىسىن ۇيىمداستىرۋدا ورتالىق پەن وڭىرلەر اراسىنداعى ۇيلەستىرۋدى كۇشەيتۋ ءۇشىن ۆەدومستۆوارالىق جۇمىس توبىن قۇرۋدى ۇسىندى.
ايتا كەتەيىك, بۇعان دەيىن استانا اكىمدىگى جۇمىس كۇنىن تاڭعى 7:30-دان باستاۋدى قاراستىرعان بولاتىن. اكىمدىك مالىمەتىنشە, جۇمىس كەستەسىن وزگەرتۋ شامامەن 30 مىڭ ادامدى قامتىپ, تاڭعى كولىك كەپتەلىسىن ازايتۋعا كومەكتەسەدى.