پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا وندىرىستە جازاتايىم جاعدايلاردىڭ الدىن الۋ, ەڭبەك ادامدارىنىڭ قاۋىپسىزدىگىن قامتاماسىز ەتۋ جانە ەڭبەك سالاسىن تسيفرلاندىرۋ ماسەلەسى قارالدى. سونىمەن قاتار تۋريستەردىڭ ەلىمىزدەگى دەمالىسىن جايلى ەتۋ جايى دا ءسوز بولدى.
پرەمەر-مينيستر مەملەكەت باسشىسىنىڭ 2025 جىلدى «جۇمىسشى ماماندىقتارى جىلى» دەپ جاريالاپ, ەڭبەك ادامىنىڭ بەدەلىن ارتتىرۋعا قاتىستى ناقتى مىندەتتەر قويعانىن اتاپ وتە كەلە, وندىرىستە ەڭبەكتى قورعاۋ ماسەلەسى باستى نازاردا ەكەنىنە توقتالدى.
ال ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا قابىلدانىپ جاتقان ءىس-شارالاردىڭ ناتيجەسىندە ەلىمىزدە وندىرىستە بولاتىن جازاتايىم وقيعالاردىڭ سانى ازايعانى تۋرالى باياندادى. ماسەلەن, 2025 جىلعى 1 مامىرداعى مالىمەت بويىنشا 2024 جىلدىڭ سايكەس كەزەڭىمەن سالىستىرعاندا كاسىپورىنداردا جاراقات الۋ جاعدايى 16,9%-عا تومەندەگەن.
وسى ورايدا پرەمەر-مينيستر ەڭبەكتى قورعاۋ ماسەلەلەرىن زاماناۋي تاسىلدەرگە نەگىزدەۋدى تاپسىردى.
«ادام ءومىرى مەن دەنساۋلىعى – ەڭ باستى قۇندىلىق. سوندىقتان ەڭبەكتى قورعاۋ جۇيەسى جۇمىس ورنىندا قاۋىپسىزدىكتى قامتاماسىز ەتۋدىڭ زاماناۋي تاسىلدەرىنە نەگىزدەلۋى كەرەك. مەملەكەت باسشىسى كاسىپورىنداردا ەڭبەك قاۋىپسىزدىگى ماسەلەلەرىن شەشۋدى ناقتى تاپسىردى. ەرتە ەسكەرتۋ جانە حابارلاۋ جۇيەلەرى اپات قاۋپى تۋىنداعان جاعدايدا جەدەل ارەكەت ەتۋگە مۇمكىندىك بەرەدى. جازاتايىم وقيعالاردى ازايتۋ ءۇشىن جۇمىس بەرۋشىلەر جاراقاتتانۋعا, اسىرەسە ادام ولىمىنە الىپ كەلەتىن جاعدايلاردى بولدىرمايتىن ەڭبەك قاۋىپسىزدىگىن, اۆتوماتتاندىرۋ مەن تسيفرلاندىرۋدى قامتاماسىز ەتۋگە مىندەتتى», دەپ اتاپ ءوتتى و.بەكتەنوۆ.
پرەمەر-مينيستر ەڭبەكتى قورعاۋ شارالارىن ۇيىمداستىرۋدىڭ بىرىڭعاي ءتاسىلىن ازىرلەۋ قاجەتتىگىن جانە بۇل بارلىق مەملەكەتتىك ورگانداردىڭ, اكىمدىكتەر مەن كاسىپورىنداردىڭ بىرلەسىپ اتقاراتىن اۋقىمدى جۇمىسىنا اينالۋعا ءتيىس ەكەنىن اتاپ ءوتتى. سونىمەن قاتار ەڭبەك زاڭناماسىنىڭ بۇزىلۋىنا قاتىستى, ونىڭ ىشىندە كاسىپورىنداردىڭ تسيفرلىق كارتاسىن پايدالانا وتىرىپ مونيتورينگ جۇرگىزۋدى كۇشەيتۋگە باسا نازار اۋدارىلدى. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنە مەملەكەتتىك ورگاندارمەن بىرلەسىپ, وسى جىلدىڭ 1 جەلتوقسانىنا دەيىن ەڭبەكتى قورعاۋ سالاسىنداعى ءبىرتۇتاس تسيفرلىق ەكوجۇيەنى قۇرۋدى قامتاماسىز ەتۋ تاپسىرىلدى.
«ەڭبەكتى قورعاۋ ماسەلەسىندە جۇمىس بەرۋشىلەردىڭ وزدەرىنىڭ ءرولى مەن قاتىسۋى وتە ماڭىزدى. جۇمىس بەرۋشىلەردىڭ جۇمىسكەرلەرمەن جازاتايىم وقيعالاردان مىندەتتى ساقتاندىرۋ شارتتارىن جاساسۋىن قامتاماسىز ەتۋ قاجەت. جالپى, كاسىپورىنداردا جاراقاتتانۋعا مۇلدەم توزبەۋشىلىك قاعيداتىن, سونداي-اق حالىقارالىق ستاندارتتارعا سايكەس كەلەتىن كاسىبي تاۋەكەلدەردى باعالاۋ مەن باسقارۋ جۇيەسىن بەلسەندى تۇردە ەنگىزۋ كەرەك», دەدى پرەمەر-مينيستر.
ەڭبەك جانە حالىقتى الەۋمەتتىك قورعاۋ مينيسترلىگىنە مۇددەلى مەملەكەتتىك ورگاندارمەن بىرلەسىپ, وسى جىلدىڭ 1 قاراشاسىنا دەيىن جۇمىس بەرۋشىلەردىڭ وندىرىستە جاراقات الۋ فاكتىلەرىن جاسىرۋىنا جول بەرمەۋ بولىگىندە زاڭنامالىق تۇزەتۋلەر ازىرلەۋ تاپسىرىلدى. سونداي-اق ونەركاسىپ جانە قۇرىلىس مينيسترلىگىنە جۇمىس بەرۋشىلەرمەن بىرلەسىپ, جىل سوڭىنا دەيىن ونەركاسىپ ورىندارى مەن قۇرىلىس سەكتورىندا وندىرىستىك قاۋىپسىزدىك پەن ەڭبەكتى قورعاۋعا ارنالعان ارنايى جابدىقتاردى مىندەتتى تۇردە ورناتۋدى قامتاماسىز ەتۋ جۇكتەلدى. ال توتەنشە جاعدايلار مينيسترلىگى وسى جىلدىڭ سوڭىنا دەيىن كاسىپورىندارعا ونەركاسىپتىك قاۋىپسىزدىك نورمالارىنا سايكەستىگى تۇرعىسىنان تەكسەرۋ جۇرگىزۋگە ءتيىس.
سونىمەن قاتار ۇكىمەت وتىرىسىندا ەلىمىزدە تۋريستەردىڭ جايلى جانە قاۋىپسىز بولۋىن قامتاماسىز ەتۋ ماسەلەسى قارالىپ, تۋريزم جانە سپورت ءمينيسترى ەربول مىرزابوسىنوۆ قازاقستاننىڭ تۋريستىك سالاسى جىل سايىن دامىپ, ءوز الەۋەتىن ارتتىرىپ كەلە جاتقانىن باياندادى. ماسەلەن, 2024 جىلى ىشكى تۋريستەر سانى 10,5 ملن ادامدى, شەتەلدىك كەلۋشىلەر 15,3 ملن-دى قۇراعان. بۇگىندە 87 ەل ءۇشىن ۆيزاسىز رەجىم قاراستىرىلعان, 107 شەت مەملەكەتتىڭ ازاماتتارى ۆيزانى ەلەكتروندى تۇردە راسىمدەۋگە مۇمكىندىگى بار.
ىشكى ىستەر ءمينيسترى ەرجان سادەنوۆ ۆەدومستۆو تاراپىنان تۋريستەر ءۇشىن قولايلى جاعداي جاساۋ بويىنشا بارلىق قاجەتتى جۇمىس جۇرگىزىلىپ جاتقانىن حابارلادى. اتاپ ايتقاندا, ساياحاتتاۋشىلاردىڭ ءبىزدىڭ ەلگە كىرۋ جانە بولۋ راسىمدەرى جەڭىلدەتىلگەن. بۇگىنگى تاڭدا شەتەلدىكتەر تىركەلۋ ءۇشىن پوليتسياعا بارۋدان بوساتىلدى, قابىلداۋشى تاراپ بۇل راسىمدەۋدى ونلاين جۇزەگە اسىرا الادى. شەتەلدىك قوناقتار ءۇشىن قازاق, ورىس, اعىلشىن جانە قىتاي تىلدەرىندە قاجەتتى جانە پايدالى اقپاراتتى قامتيتىن ارنايى ءموبيلدى سايت اشىلدى. وڭىرلەردە تۋريستەردىڭ قاۋىپسىزدىگىن قامتاماسىز ەتۋ ءۇشىن شەت تىلدەرىن مەڭگەرگەن تۋريستىك پوليتسيا قىزمەتكەرلەرى جۇمىس ىستەيدى. تۋريستىك ورىنداردا بەينەباقىلاۋ جۇيەسى ورناتىلعان, جەكە تاسىمالداۋمەن اينالىساتىن ادامدارمەن پروفيلاكتيكالىق جۇمىس جۇرگىزىلەدى, ترانزيتتىك كولىك جۇرگىزۋشىلەرىنە كومەك كورسەتىلەدى.
«مەملەكەت باسشىسى تۋريزم يندۋسترياسى ەكونوميكالىق ءوسىمنىڭ ماڭىزدى درايۆەرى ەكەنىن بىرنەشە رەت اتاپ ءوتتى. ءبىز قازاقستاننىڭ شەتەلدىك تۋريستەرگە دوستىق پەيىلى بار, ەمىن-ەركىن دەمالۋعا قولايلى ەل رەتىندە تارتىمدىلىعىن ارتتىرۋ ءۇشىن قاجەتتى جاعداي جاساۋىمىز كەرەك. بۇل باعىتتا اۋقىمدى جۇمىس اتقارىلىپ جاتىر. حالىقارالىق اۋە قاتىناستارىنىڭ, تەمىرجول جانە اۆتوكولىك باعىتتارىنىڭ گەوگرافياسى كەڭەيتىلىپ جاتىر. شەتەلدىك ازاماتتار ءۇشىن كوشى-قون راسىمدەرىن جەڭىلدەتۋ قولعا الىندى. كەلگەن قوناقتاردىڭ ەمىن-ەركىن ءارى قاۋىپسىز دەمالىسىنا ەرەكشە كوڭىل ءبولىنىپ وتىر», دەپ اتاپ ءوتتى و.بەكتەنوۆ.
پرەمەر-مينيستر الماتى, شىعىس قازاقستان جانە جەتىسۋ وبلىستارىندا كورشىلەس ەلدەردەن كەلگەن تۋريستەردى قابىلداۋ جۇمىستارى جۇرگىزىلگەنىن اتاپ ءوتتى. بۇل تاجىريبەنى كەڭىنەن تاراتۋ قاجەت.
«تۋريستىك ونىمدەردى ناقتى تۋريستىك توپتاردىڭ, اسىرەسە شەكارالاس وڭىرلەردەگى تۋريستەرگە بەيىمدەگەن ءجون. مۇنىڭ شاعىن جانە ورتا بيزنەستىڭ قىزمەتىنە عانا ەمەس, سونداي-اق باعدارلامالىق-تسيفرلىق ونىمدەرگە دە قاتىسى بار. تۋريستىك لوكاتسيالاردا ساپالى ۇيالى بايلانىس پەن ينتەرنەت بولۋعا ءتيىس. قوناقۇيلەر مەن تۋريستەر ءجيى باراتىن باسقا دا ورىنداردا قىزمەت كورسەتۋ ساپاسى مەن قاۋىپسىزدىك دەڭگەيىنە, سونداي-اق باعا ساياساتىنىڭ قولايلى بولۋىنا نازار اۋدارۋ كەرەك. تۋريستەر ءۇشىن كەلگەن ساتتەن باستاپ, بۇكىل ساپار مارشرۋتى بويىنشا جانە ەلدەن كەتكەنگە دەيىن قولايلى جاعدايلاردى قامتاماسىز ەتۋ قاجەت», دەپ اتاپ ءوتتى ۇكىمەت باسشىسى.
وتىرىس بارىسىندا پرەمەر-مينيستر سالا باسشىلارىنا بىرقاتار تاپسىرما بەردى. اتاپ ايتقاندا, تۋريزم جانە سپورت مينيسترلىگى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, ۇلتتىق تۋريستىك پورتالدىڭ, eQonaq كوشى-قون سەرۆيسىنىڭ, تاكسي قىزمەتتەرىنىڭ جانە تۋريستەرگە ارنالعان باسقا دا پايدالى رەسۋرستاردىڭ فۋنكتسيونالىن كەڭەيتۋ جۇمىسىن جۇرگىزۋدى تاپسىردى. ال ىشكى ىستەر, توتەنشە جاعدايلار, دەنساۋلىق ساقتاۋ مينيسترلىكتەرى تۋريستەردىڭ قاۋىپسىزدىك شارالارىن كۇشەيتىپ, شەتەل ازاماتتارى ءۇشىن كوپتىلدى جەدەل جەلىنى ەنگىزۋ ماسەلەسىن پىسىقتاۋى قاجەت. سونداي-اق تۋريزم مينيسترلىگىنە مۇددەلى مەملەكەتتىك ورگاندارمەن جانە اكىمدىكتەرمەن بىرلەسىپ, ءبىر اي مەرزىمدە شەتەلدىك تۋريستەردىڭ قازاقستاندا جايلى ءارى قاۋىپسىز بولۋىن قامتاماسىز ەتۋ بويىنشا ءىس-شارالار كەشەنىن ازىرلەۋ جۇكتەلدى.