جەمقورلىق قوعام دەرتى دەپ بەكەر ايتپايدى. ويتكەنى ول ەلدىڭ دامۋىن تەجەيدى. ادام ساناسىندا ءبارىن اقشا شەشەدى دەگەن وي قالىپتاسسا, قوعامدا ادىلدىك, سەنىم جوعالادى. جەمقورلىق ارالاسقان جۇمىس تا ساپاسىز بولادى. ال ودان جاپا شەگەتىن – قاراپايىم حالىق پەن مەملەكەت. سوندىقتان پاراقورلىقپەن كۇرەس ءار ازاماتتىڭ مىندەتى بولۋعا ءتيىس جانە قوعامدا سىبايلاس جەمقورلىققا توزىمسىزدىك مادەنيەتى قالىپتاسۋى كەرەك.
وسىنداي ۇرانمەن شىمكەنتتە «Amanat» پارتياسىنىڭ جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق كەڭەستىڭ كوشپەلى وتىرىسى ءوتتى. كەڭەس توراعاسى, ءماجىلىس دەپۋتاتى ەرجان سايروۆ جەرگىلىكتى اتقارۋشى ورگاندار تاراپىنان مەملەكەتتىك باعدارلامالار اياسىندا وتكىزىلەتىن ساتىپ الۋلار مەن ەڭبەكاقى, ۇستەماقىلاردى تولەۋ كەزىندە پاراقورلىق پەن بيۋدجەت قاراجاتىن جىمقىرۋ فاكتىلەرى ءجيى كەزدەسەتىنىن ايتتى. ول مەملەكەتتىك قىزمەتتە سىبايلاس جەمقورلىققا جول بەرمەس ءۇشىن ناقتى شارالارعا كوشۋ قاجەتتىگىن اتادى. سونىڭ ىشىندە قوعام دەرتىمەن كۇرەستە شىمكەنت ءالى دە جۇمىستى كۇشەيتە ءتۇسۋ كەرەك دەدى. كەڭەس توراعاسى دەنساۋلىق پەن ءبىلىم سالاسىندا جەمقورلىق جايلاعانىن اتاپ ءوتتى. سوندىقتان باقىلاۋ مەن ءتارتىپتى قولعا الۋعا شاقىردى. دەگەنمەن جەمقورلىقتىڭ الدىن الۋ, كۇرەس شاراسىندا شىمكەنتتەن ۇيرەنەر نارسە كوپ ەكەنىن دە تىلگە تيەك ەتتى. اسىرەسە ءبىلىم سالاسىندا بۇل باعىتتا تىندىرىمدى ىستەر بار ەكەنىنە توقتالدى.
ە.سايروۆ مالىمدەگەندەي, 2022–2024 جىلدارى شاھاردا سىبايلاس جەمقورلىققا قارسى قىزمەت 270 قىلمىستىڭ بەتىن اشقان. ونىڭ ىشىندە پارا الۋ, ۇرلىق, قىزمەتتىك وكىلەتتىكتى اسىرا پايدالانۋ دەرەكتەرى بار. وسى قىلمىستاردان بولعان زاۋال 7,4 ملرد تەڭگەنى قۇراپ, ونىڭ 5,9 ملرد تەڭگەسى مەملەكەتكە قايتارىلدى. كەڭەس توراعاسى سىبايلاس جەمقورلىققا قارسى كۇرەس بويىنشا پارتيانىڭ سايلاۋالدى باعدارلاماسىن ىسكە اسىرۋدا شىمكەنت كوش باستاپ تۇرعانىن ايتتى.
جيىندا ءماجىلىس دەپۋتاتى نۇرلان اۋەسباەۆ قالا اكىمدىگىنىڭ باسقارمالارى جەمقورلىققا قارسى كۇرەس شاراسىندا كوزبوياۋشىلىق جاسايتىنىن, اشىقتىق, تازالىق جەتىسپەيتىنىن اتاپ ءوتتى.
«قوعام دەرتىمەن كۇرەس ءجۇرىپ جاتقانىمەن سىبايلاس جەمقورلىق قىلمىستارى ءالى دە تىيىلماي تۇر. ونداي قىلمىسقا جەرگىلىكتى اتقارۋشى ورگاندار مەن پوليتسيا وكىلدەرى كوپ باراتىنى انىقتالدى. سوندىقتان ولاردىڭ الدىن الۋ قاجەت. ول ءۇشىن پارتيانىڭ سايلاۋالدى باعدارلاماسىنداعى سىبايلاس جەمقورلىققا قارسى كۇرەس شاراسىن قاتاڭ ورىنداۋ كەرەك», دەدى ول.
باسقوسۋدا ءسوز العان قالا اكىمى عابيت سىزدىقبەكوۆ پارتيانىڭ سايلاۋالدى باعدارلاماسىنىڭ مەگاپوليستە قالاي جۇزەگە اسىرىلىپ جاتقانىنا توقتالدى. شاھار باسشىسىنىڭ ايتۋىنشا, ماسليحاتتاعى پارتيا فراكتسياسىنىڭ 21 مۇشەسى باعدارلاما تارماقتارىنا جەكە-جەكە بەكىتىلگەن. 2024 جىلعا جوسپارلانعان 95 تارماقتىڭ بۇگىنگى تاڭدا 90-ى ورىندالعان. باعدارلاما اياسىندا 1,3 ملن شارشى مەتردەن اسا تۇرعىن ءۇي پايدالانۋعا بەرىلىپ, 2 127 ازامات پاتەرمەن قامتىلدى. «قامقور» وڭىرلىك باعدارلاماسى اياسىندا تاعى 150 ازامات باسپانالى بولدى. 2 878 مەديتسينا قىزمەتكەرى سيمۋلياتسيالىق ورتالىقتاردا بىلىكتىلىگىن ارتتىردى. سونىمەن قاتار 30 284 ادام جۇمىسپەن قامتىلسا, «كەدەرگىسىز كەلەشەك» جوباسى ارقىلى 43 640 مۇمكىندىگى شەكتەۋلى ازاماتتىڭ ءوتىنىشى قاناعاتتاندىرىلدى. وسىلاي دەگەن اكىم بۇل باعدارلامانىڭ ناقتى ىسكە اسىپ جاتقانىن كورسەتەتىن كورسەتكىشتەر ەكەنىن مالىمدەدى.
سونداي-اق كەڭەس بارىسىندا شىمكەنت قالاسى اكىمدىگى جانىنداعى سىبايلاس جەمقورلىققا قارسى كۇرەس جونىندەگى كوميسسيا جۇمىسىنىڭ ناتيجەلەرى تالقىلاندى.
شىمكەنت