بۇگىن, 10 ماۋسىمدا قر مادەنيەت جانە اقپارات ءمينيسترى ايدا بالاەۆا قازاقستانداعى بەلارۋس رەسپۋبليكاسىنىڭ توتەنشە جانە وكىلەتتى ەلشىسى الەكسەي بوگدانوۆپەن كەزدەستى, دەپ حابارلايدى Egemen.kz مادەنيەت جانە اقپارات مينيسترلىگىنىڭ ءباسپاسوز قىزمەتىنە سىلتەمە جاساپ.
كەزدەسۋ بارىسىندا ەكى تاراپ الداعى بىرلەسكەن ءىس-شارالاردى تالقىلادى.
اتاپ ايتقاندا, قازاقستاندا بەلارۋس مادەنيەتىنىڭ كۇندەرىن وتكىزۋ تۋرالى باستاما كوتەرىلدى. ايدا بالاەۆا بۇل ءىس-شارانىڭ اياسىن كەڭەيتۋدى ۇسىندى. ءداستۇرلى كونتسەرتتەر مەن كورمەلەردەن بولەك, شەبەرلىك ساباقتارىن, شىعارماشىلىق كەزدەسۋلەردى, عىلىمي كونفەرەنتسيالاردى جانە مادەنيەت سالاسىنداعى ءوزارا بايلانىستاردىڭ وزگە دە تۇرلەرىن قامتۋ تۋرالى ايتىلدى.
سونىمەن قاتار, ء«لىستاپاد» كينوفەستيۆالى اياسىندا قازاقستان كينوسىنىڭ كۇندەرى وتەدى. قازىرگى ۋاقىتتا ءىس-شارانى وتكىزۋگە قاتىستى ماسەلەلەر مەن كورسەتىلەتىن فيلمدەردىڭ ءتىزىمى ناقتىلانۋدا. بۇدان بولەك, 10–11 شىلدە كۇندەرى ۆيتەبسك قالاسىندا وتەتىن حالىقارالىق «سلاۆيان بازارى» فەستيۆالىنە دە قازاقستاندىق ونەرپازدار قاتىسادى.
كەزدەسۋ سوڭىندا مينيستر قازاقستان تاراپى ەكى ەلدىڭ مۋزەي, تەاتر مەن ارحيۆ قىزمەتتەرى اراسىنداعى ىنتىماقتاستىقتى نىعايتۋعا, سونداي-اق بىرلەسكەن كينووندىرىس پەن كونتسەرتتىك جوبالاردى دامىتۋعا ۇلەس قوسۋعا دايىن ەكەنىن ءبىلدىردى. ەكى تاراپ جۇمىس توبىن قۇرۋعا كەلىستى. بۇل باستامالار ەكى ەل اراسىنداعى دوستىق پەن ءوزارا تۇسىنىستىكتى نىعايتا تۇسەدى.