قازاقستان رەسپۋبليكاسى سەناتىندا «قۇقىق قورعاۋ قىزمەتى تۋرالى» زاڭىنا ەنگىزىلەتىن وزگەرىستەر مەن تولىقتىرۋلار تالقىلانىپ جاتىر. بۇل تۇزەتۋلەر قۇقىق قورعاۋ ورگاندارى قىزمەتكەرلەرىنىڭ الەۋمەتتىك قورعالۋىن ارتتىرۋعا, سونداي-اق اتتەستاتسيالاۋ جۇيەسىن جەتىلدىرۋگە باعىتتالعان, دەپ جازادى Egemen.kz
جاڭا تۇزەتۋلەرگە سايكەس اتتەستاتسيالاۋ تارتىبىنە قازاق ءتىلىن بىلۋگە ارنالعان تەست ەنگىزۋ ۇسىنىلدى. بۇل باستاما مەملەكەتتىك ءتىلدى مەڭگەرۋدى ىنتالاندىرۋ جانە قىزمەت ساپاسىن ارتتىرۋ ماقساتىندا قولعا الىنىپ وتىر.
سونىمەن قاتار زاڭ جوباسىندا قىزمەتكەرلەر مەن ولاردىڭ وتباسىلارىنا قاتىستى بىرقاتار الەۋمەتتىك كەپىلدىكتى زاڭمەن بەكىتۋ كوزدەلگەن. اتاپ ايتقاندا, حالىقارالىق ۇيىمدارعا نەمەسە مەملەكەتتىك ورگاندارعا ۋاقىتشا اۋىستىرىلعان ۋاقىتتا, بارلىق جەڭىلدىك پەن وتەماقى تولىق كولەمدە ساقتالادى. بۇعان دەيىن بۇل ەرەجە تەك ۇكىمەت قاۋلىسىمەن رەتتەلىپ كەلگەن.
بۇعان قوسا پروكۋراتۋرا قىزمەتكەرلەرىن فيزيكالىق جانە اتىس دايىندىعىنان نورماتيۆ تاپسىرۋدان بوساتۋ ۇسىنىلدى.
زاڭ جوباسىندا قىزمەتتىك مىندەتىن اتقارۋ بارىسىندا قازا تاپقان قۇقىق قورعاۋ ورگاندارى قىزمەتكەرلەرى مەن اسكەري قىزمەتشىلەردىڭ وتباسىلارىنا اي سايىنعى تولەمدەر تولەۋ قاراستىرىلعان.
بۇل وزگەرىستەر قۇقىق قورعاۋ قىزمەتكەرلەرىنىڭ مارتەبەسىن ارتتىرىپ, ولاردىڭ الەۋمەتتىك كەپىلدىكتەرىن ناقتىلاۋعا باعىتتالعان. زاڭ جوباسى ازىرگە جۇمىس توبىنىڭ تالقىلاۋىندا. الداعى ۋاقىتتا سەناتتىڭ قاراۋىنا ەنگىزىلەدى.
ارايلىم مىرزاحان, ەۇۋ 2 كۋرس ستۋدەنتى