استانادا ۇلتتىق قورعانىس ۋنيۆەرسيتەتىنىڭ جەدەل-تاكتيكالىق باسقارۋ بۋىنى بويىنشا ءبىلىم العان ماگيسترانت-وفيتسەرلەرگە ديپلوم تاپسىرۋ سالتاناتى ءوتتى. بيىل جوعارى وقۋ ورنىن 150-دەن اسا ماگيسترانت ءساتتى اياقتادى. ەندى ولار قارۋلى كۇشتەر مەن وزگە دە اسكەرلەر جانە اسكەري قۇرىلىمداردىڭ كوماندالىق قۇرامىن تولىقتىرادى.
ۇلتتىق قورعانىس ۋنيۆەرسيتەتى – ەلىمىزدىڭ قارۋلى كۇشتەرىنىڭ اسكەري وقۋ ورىندارىنىڭ ءبىلىم بەرۋ جانە عىلىمي قىزمەتىن ۇيلەستىرەتىن ءىرى ۆەدومستۆوارالىق ادىستەمەلىك ءارى عىلىمي ورتالىق سانالادى. ۋنيۆەرسيتەت قۇرىلعالى بەرى 1,5 مىڭنان اسا جەدەل-تاكتيكالىق جانە جەدەل-ستراتەگيالىق باسقارۋ بۋىنىنىڭ اسكەري ماماندارى دايارلانعان.
– تۇلەكتەردى الدا اسكەري بولىمدەر مەن قۇرامالاردى باسقارۋ, ارميامىزدىڭ جاۋىنگەرلىك دايىندىعى مەن كاسىبيلىگىن ارتتىرۋ سىندى ماڭىزدى مىندەتتەر كۇتىپ تۇر. وسى جىلى ءبىزدىڭ وفيتسەرلەرمەن قاتار, قىرعىزستان جانە تاجىكستاننىڭ دا وفيتسەرلەرى ءبىلىم الدى. بۇل ءوزارا اسكەري ىنتىماقتاستىق پەن باۋىرلاستىقتى نىعايتۋعا سەپ بولادى, – دەدى قورعانىس ءمينيسترىنىڭ ءبىرىنشى ورىنباسارى – باس شتاب باستىعى سۇلتان كامالەتدينوۆ.
بيىل ءبىلىم ورداسىنان تۇلەپ ۇشقاندار قاتارىندا ءىىم ۇلتتىق ۇلانىنىڭ 19 وفيتسەرى بار. سونداي-اق قۇقىقتىق ءتارتىپ اسكەرى اتىنان پولكوۆنيك ارمان ىسقاقوۆ دوكتورانتۋرانى اياقتاپ, PhD عىلىمي دارەجەسىن الدى.
– اسكەري قىزمەت جولىنداعى تاعى ءبىر ماڭىزدى بەلەس ارتتا قالدى. ۋنيۆەرسيتەتتە العان جوعارى بىلىممەن قاتار, دوستىق, قولداۋ رۋحىن دا وزدەرىڭىزبەن بىرگە الىپ بارا جاتقاندارىڭىزعا سەنىمدىمىن. بۇل رۋح جىلدار وتە كەلە نىعايا ءتۇسىپ, ەلدەرىمىزدىڭ قورعانىس قابىلەتىن جانە بەيبىت دامۋىن قامتاماسىز ەتۋگە قىزمەت ەتەدى, – دەپ ۇلتتىق ۇلان باس قولباسشىسىنىڭ ورىنباسارى باۋىرجان ابجانوۆ تۇلەكتەرگە تىلەك ءبىلدىردى.
سالتاناتتى ءىس-شارا سوڭىندا قارۋلى كۇشتەر ۇلتتىق اسكەري-پاتريوتتىق ورتالىعى جانە ۇلتتىق ۇلاننىڭ ءان-بي ءانسامبلى بىرلەسە ونەر كورسەتتى. قۇرمەت قاراۋىلى روتاسىنىڭ ساربازدارى قارۋمەن ساپتىق كورىنىس جاساپ, كورەرمەندەرگە اسەرلى دەفيلە تارتۋ ەتتى. اسكەري ءداستۇر بويىنشا, تۇلەكتەر سالتاناتتى مارشپەن ساپ تۇزەپ, ۇلتتىق ۇلاننىڭ وركەسترى سۇيەمەلدەۋىمەن «اتامەكەن» پاتريوتتىق ءانىن ورىندادى.