جامبىل وبلىسىندا ءىرى ينۆەستيتسيالىق جوبالاردىڭ ءبىرى – تەمىرجول دەپوسى ءساتتى ىسكە قوسىلدى, دەپ جازادى Egemen.kz.
شۋ قالاسىندا وتكەن سالتاناتتى شاراعا جامبىل وبلىسىنىڭ اكىمى ەربول قاراشوكەەۆ, قازاقستاننىڭ فرانتسياداعى توتەنشە جانە وكىلەتتى ەلشىسى گۇلسارا ارىستانقۇلوۆا, قر كولىك مينيسترلىگى مەن «قازاقستان تەمىر جولى» ۇك» اق وكىلدەرى جانە جوبا جەتەكشىلەرى قاتىستى.
– جامبىل وبلىسى ءۇشىن اسا ماڭىزدى وقيعانىڭ كۋاسى بولىپ وتىرمىز. شۋ اۋدانىندا جاڭا دەپونىڭ اشىلۋى ەلىمىزدىڭ تەمىرجول ينفراقۇرىلىمىن دامىتۋعا جانە ترانزيتتىك الەۋەتىن نىعايتۋعا زور سەرپىن بەرەتىنى انىق, – دەدى وبلىس اكىمى قۇتتىقتاۋ سوزىندە.
ەربول قاراشوكەەۆ مەملەكەت باسشىسىنىڭ تاپسىرماسىنا سايكەس وبلىستا اۋقىمدى ينۆەستيتسيالىق جوبالار تابىستى جۇزەگە اسىپ جاتقانىن اتاپ ءوتتى. سونىمەن قاتار بيزنەس قاۋىمداستىقتىڭ ءوڭىردىڭ ەكونوميكالىق الەۋەتىنە دەگەن سەنىمى جوعارى ەكەنىن جەتكىزدى.
جامبىل وبلىسىنىڭ ينۆەستيتسيالىق قورجىنىندا جالپى قۇنى 3,7 ترلن تەڭگەنى قۇرايتىن, 2025-2028 جىلدار ارالىعىندا جۇزەگە اسىرىلاتىن 62 جوبا بار. ونىڭ ىشىندە بيىل 175,2 ملرد تەڭگەگە 30 جوبا ىسكە قوسىلىپ, 1000-نان استام جاڭا جۇمىس ورنى اشىلادى دەپ جوسپارلانۋدا.
تەمىرجول دەپوسىنىڭ قۇرىلىسىن فرانتسيانىڭ جەتەكشى كومپانيالارىنىڭ ءبىرى – Alstom ەكى جىل ىشىندە تابىستى اياقتادى. جوبانىڭ جالپى ينۆەستيتسيا كولەمى 4 ملرد تەڭگەدەن اسادى. نىسان ىسكە قوسىلعاننان كەيىن جەرگىلىكتى تۇرعىندار ءۇشىن 100 جاڭا جۇمىس ورنى اشىلادى دەپ كۇتىلۋدە.
جاڭا دەپو «قازاقستان تەمىر جولى» ۇك» اق پايدالاناتىن KZ4 جانە KZ8 ەلەكتروۆوزدارىنا تەحنيكالىق قىزمەت كورسەتۋگە ارنالعان. بۇل جوبا ءوڭىردىڭ الەۋمەتتىك-ەكونوميكالىق دامۋىنا ەلەۋلى ۇلەس قوسادى دەپ كۇتىلۋدە.
كاسىپورىن قىزمەتى حالىقارالىق ستاندارتتارعا تولىق سايكەس جۇزەگە اسىرىلادى. مامانداردىڭ ايتۋىنشا, مۇندا ونەركاسىپتىك جانە ەكولوگيالىق قاۋىپسىزدىك تالاپتارى قاتاڭ ساقتالادى. زاماناۋي قۇرال-جابدىقتارمەن جابدىقتالعان دەپو اي سايىن 120-عا جۋىق, جىلىنا 1 500-گە جۋىق ەلەكتروۆوزدى ساپالى جوندەۋدەن وتكىزۋگە قاۋقارلى.
قازاقستاننىڭ فرانتسياداعى توتەنشە جانە وكىلەتتى ەلشىسى گۇلسارا ارىستانقۇلوۆا ەكى ەل اراسىنداعى بەرىك ستراتەگيالىق ارىپتەستىك اياسىندا بىرلەسكەن جوبالاردىڭ ءساتتى جۇزەگە اسىپ جاتقانىن اتاپ ءوتتى.
Alstom كومپانياسىنىڭ باتىس جانە ورتا ازياداعى باسقارۋشى ديرەكتورى جەروم بويە قازاقستان تاراپىنان كورسەتىلگەن سەنىم مەن ەكىجاقتى ىنتىماقتاستىق ءۇشىن العىسىن ءبىلدىردى.
وبلىس اكىمى قوناقتارمەن بىرگە كاسىپورىندى ارالاپ, جۇمىسىنا تابىس تىلەدى.