تابيعي مونوپوليا سۋبەكتىلەرىنىڭ ەرەجەسىن بۇزعان «پاۆلودارەنەرگو» اق-عا قاتىستى اكىمشىلىك ءىس قوزعالىپ, 3,1 ملن تەڭگە مولشەرىندە ايىپپۇل سالىندى, دەپ حابارلايدى Egemen.kz.
تابيعي مونوپوليالاردى رەتتەۋ كوميتەتىنىڭ پاۆلودار وبلىسى بويىنشا دەپارتامەنتى «پاۆلودارەنەرگو» اق-نىڭ ساتىپ الۋ ءتارتىبىن ساقتاۋ ماسەلەلەرى بويىنشا كەزەكتەن تىس تەكسەرۋ وتكىزگەن. تەكسەرۋگە «QazkovEnergy» جشس-نىڭ ءوتىنىشى سەبەپ بولعان.
- تەكسەرۋ «پاۆلودارەنەرگو» كومپانياسى 2025 جىلى جۇرگىزگەن ساتىپ الۋلاردىڭ زاڭدىلىعىنا قاتىستى بولدى. ناتيجەسىندە قر «تابيعي مونوپوليالار تۋرالى» زاڭىنىڭ 26-بابىنىڭ 2-تارماعىنىڭ 18-تارماقشاسىندا, سونداي-اق تابيعي مونوپوليا سۋبەكتىلەرىنىڭ قىزمەتىن جۇزەگە اسىرۋ ەرەجەلەرىنىڭ 135 جانە 152-تارماقتارىندا كوزدەلگەن تالاپتاردىڭ بۇزىلۋى انىقتالدى. ساتىپ الۋدى جۇرگىزۋ ءتارتىبىن ساقتاماۋشىلىق بايقالدى,-دەپ حابارلادى دەپارتامەنتتەن.
سۋبەكتىگە قاتىستى قر «اكىمشىلىك قۇقىق بۇزۋشىلىقتار تۋرالى» كودەكسىنىڭ 164-بابىنىڭ 4-بولىگى بويىنشا اكىمشىلىك ءىس قوزعالعان. تەرگەۋ ناتيجەسىندە كاسىپورىنعا جەڭىلدەتىلگەن تارتىپتە 3 145 600 تەڭگە مولشەرىندە اكىمشىلىك ايىپپۇل سالىندى.
سونىمەن قاتار, دەپارتامەنت تاراپىنان ساتىپ الۋ ناتيجەلەرىن جويۋ جانە قولدانىستاعى زاڭناما تالاپتارىنا سايكەس قايتا ساتىپ الۋ پروتسەدۋراسىن جۇرگىزۋ قاجەتتىلىگى تۋرالى تالاپ بەرىلدى.
پاۆلودار وبلىسى