قالا اكىمدىگىنىڭ رەسمي سايتىنىڭ مالىمدەۋىنشە وسىدان 5 جىل بۇرىن باستالعان «ەلوردا جاستارى» باعدارلاماسى بۇگىندە جەمىسىن بەرىپ وتىر. جوباعا قاتىسۋشىلاردىڭ ءبىرى ءانۋار نابيەۆ مەملەكەت باستاماسىنىڭ ارقاسىندا قالاي باسپانالى بولعانىن ايتىپ بەردى, دەپ حابارلايدى Egemen.kz.
ءانۋار قورعانباي ۇلى ايتۋىنشا اتالعان باعدارلامانىڭ تالاپتارى جاستارعا وتە ءتيىمدى.
«2019 جىلى جۇمىس ىستەيتىن جاستارعا ارنالعان جالعا بەرىلەتىن باسپانا باعدارلاماسىنا قاتىسىپ, 5 جىل بويى مەملەكەت بەرگەن پاتەردە تۇردىق. ول كەزدە 2 بالامىز بولدى. ۇلىم 3-تە, قىزىم 2-دە. بۇل ۋاقىت ءوز ءۇيىمىزدى ساتىپ الۋدا ماڭىزدى ءرول اتقاردى. سەبەبى ءبىز جالداۋ مەرزىمى اياقتالعانشا, ءوز ءۇيىمىزدى ساتىپ الۋعا باستاپقى اقشا جيناپ ۇلگەردىك», دەدى 33 جاستاعى ەلوردا تۇرعىنى.
ءا.نابيەۆ زايىبى ەكەۋى مەديتسينا سالاسىندا قىزمەت ەتەدى.
«5 جىل بويى ءبىز پاتەرگە ايىنا 7500 تەڭگە تولەيتىنبىز. ويىمشا, بۇل – وتە ءتيىمدى باعدارلاما. سەبەبى تابىسىمىزدى بولاشاق باسپانامىزدىڭ العاشقى جارناسىنا جيناۋعا مۇمكىندىك بولدى. بيىل ناۋرىز ايىندا 5 جىل تۇرعان پاتەردى تاپسىرىپ, «ەلوردا جاستارى» باعدارلاماسىمەن ەسىلدىڭ سول جاعالاۋىنان 3 بولمەلى پاتەر ساتىپ الدىق. بۇل – اسىرەسە جۇمىس ىستەيتىن جاستارعا بەرىلگەن ۇلكەن مۇمكىندىك. سوندىقتان وسىنداي باعدارلاما ءۇشىن مەملەكەتكە ايتار العىسىم شەكسىز», دەدى ءا.قورعانباي ۇلى.
ايتا كەتكەن ءجون, اتالعان باعدارلاما جاستارعا جەڭىلدىكپەن نەسيە بەرۋدى ۇسىنادى. نەسيەنىڭ ماكسيمالدى سوماسى – 20 ميلليون تەڭگە, مولشەرلەمەسى – جىلدىق 5 پايىز, باستاپقى جارناسى – 10 پايىز. ال تۇرعىن ءۇيدى باستاپقى جانە قايتالاما نارىقتا ساتىپ الۋعا بولادى.