ەلباسى نۇرسۇلتان نازارباەۆ وتپەلى كەزەڭدەگى قىرعىز رەسپۋبليكاسىنىڭ پرەزيدەنتى روزا وتۋنباەۆاعا جەدەلحات جولدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
جەدەلحاتتا قازاقستان قىرعىز رەسپۋبليكاسىندا رەفەرەندۋمنىڭ وتكىزىلۋىمەن قۇتتىقتايدى جانە جۇرتشىلىق تالعامىنىڭ قورىتىندىلارى ەلدە قوعامدىق-ساياسي ۇدەرىستەردىڭ باستالۋى مەن الەۋمەتتىك-ەكونوميكالىق تۇراقتانۋىنا قىزمەت ەتەتىنىنە سەنىم بىلدىرەدى, دەپ اتاپ وتىلگەن.
“قازاقستان كورشىلەس مەملەكەتتەگى احۋال قالىپتى كۇيگە تۇسكەنىنە شىنايى تۇرعىدان مۇددەلى جانە ەكونوميكا مەن ساياساتتا, قوعامدىق ءومىردىڭ وزگە سالاسىنداعى رەفورمالاردى جۇرگىزۋدە ءوز تاجىريبەسىن ءبولىسۋگە جانە باۋىرلاس ەلگە كومەك كورسەتۋگە دايىن.
ءبىز قىرعىزستاننىڭ ساياسي كۇشتەرىن ەلدىڭ ەكونوميكالىق جاڭارۋى مەن حالىقتىڭ ماڭىزدى الەۋمەتتىك پروبلەمالارىن شەشۋ ءۇشىن كۇش-جىگەرىن بىرىكتىرۋگە شاقىرامىز”, — دەلىنگەن جەدەلحاتتا.