سۋارۋ ماۋسىمى باستالعالى تۇركىستان وبلىسىندا سۋ الۋ مولشەرى - 1,3 ملرد تەكشە مەتردى قۇراپ, 276 مىڭ گەكتار جەر سۋارىلعان. قىزىلوردا وبلىسىندا سۋ الۋ 950 ملن تەكشە مەتردى قۇرادى. سۋارۋدىڭ جالپى اۋدانى 105 مىڭ گەكتارعا جەتكەن, دەپ جازادى Egemen.kz.
سۋ رەسۋرستارى جانە يرريگاتسيا مينيسترلىگىنىڭ مالىمەتىنشە, جامبىل وبلىسىنىڭ «قازسۋشار» فيليالى 31 مىڭ گەكتار ەگىس القابىن سۋارۋ ءۇشىن 107 ملن تەكشە مەتردەن استام سۋ بەرگەن. جەتىسۋ وبلىسىنىڭ شارۋالارىنا 127 ملن تەكشە مەتر سۋ بەرىلىپ, 18 مىڭ گەكتاردان استام جەر سۋارىلىپ, 11 مىڭ گەكتاردان استام جەر ىلعالداندىرىلعان. د.قوناەۆ اتىنداعى «ۇلكەن الماتى كانالى» فيليالى 5210 گەكتاردى سۋارۋعا 33 ملن تەكشە مەتر سۋ بەرگەن.قولايلى اۋا رايى مەن سۋارمالى سۋدىڭ ەرتە بەرىلگەنىنىڭ ارقاسىندا تۇركىستان وبلىسىنىڭ ديقاندارى ءساۋىردىڭ ورتاسىندا قىرىققاباتتىڭ العاشقى ءونىمىن جينادى. ال مامىر ايىنىڭ سوڭعى ونكۇندىگىندە قاۋىننىڭ, ماۋسىم ايىنىڭ العاشقى اپتاسىندا قاربىزدىڭ العاشقى ءونىمىن جينادى.بيىل «قازسۋشار» فيليالدارى شارۋالارمەن سۋارمالى سۋ بەرۋ جونىندە 20 402 كەلىسىمشارت جاساستى. مينيسترلىك «قازسۋشار» فيليالدارى مەكەمەمەن كەلىسىمشارتقا وتىرعان شارۋالارعا عانا سۋارمالى سۋ بەرەتىنىن ەسكەرتكەن.
«مەملەكەت باسشىسىنىڭ تاپسىرماسىنا ساي سۋ رەسۋرستارى جانە يرريگاتسيا مينيسترلىگى سۋدىڭ «كولەڭكەلى» نارىعىمەن كۇرەس جۇرگىزىپ جاتىر. ماسەلەن, ارال-سىرداريا باسسەيندىك ينسپەكتسياسىنىڭ ماماندارى تۇركىستان وبلىسى شاردارا اۋدانىنىڭ جاۋشىقۇم سۋارۋ القابىنان تىركەلمەگەن 24 سورعى قوندىرعىسىن انىقتادى. تەكسەرۋ ناتيجەلەرى ءتيىستى شارالار قابىلداۋ ءۇشىن جەرگىلىكتى اتقارۋشى ورگاندارعا جولداندى. ايتا كەتەرلىگى, جاڭا سۋ كودەكسىندە بۇل ماسەلەگە ەرەكشە كوڭىل ءبولىنىپ, سۋ سالاسىنداعى قۇقىق بۇزۋشىلىقتار ءۇشىن جاۋاپكەرشىلىك كۇشەيتىلگەن. قۇجات 10 ماۋسىمدا كۇشىنە ەنەدى», دەدى سۋ رەسۋرستارى جانە يرريگاتسيا مينيسترلىگىنىڭ رەسمي وكىلى الماس مۇسابەكوۆ.قىرعىز رەسپۋبليكاسىمەن جاسالعان كەلىسىمگە سايكەس, بيىلعى ۆەگەتاتسيالىق كەزەڭدە شۋ وزەنى ارقىلى قازاقستانعا 180 ملن, ال تالاس وزەنى ارقىلى 400 ملن تەكشە مەتر سۋ كەلەدى دەپ كۇتىلىپ وتىر. سىرداريا وزەنى ارقىلى شاردارا سۋ قويماسىنا شامامەن 3,7 ملرد تەكشە مەتر سۋ تۇسەدى دەپ جوسپارلانىپ وتىر.مەجەلى تۇردە تۇراقتى سۋ جەتكىزۋدى قامتاماسىز ەتۋ ماقساتىندا, 30 مامىردا قازاقستان, تاجىكستان جانە وزبەكستان اراسىنداعى «باحري توچيك» سۋ قويماسىنىڭ ماۋسىم-تامىز ايلارىنداعى جۇمىس رەجيمى بويىنشا ۇشجاقتى كەستە بەكىتىلگەن. بۇل قۇجات شەڭبەرىندە قازاقستانعا ۆەگەتاتسيالىق كەزەڭدە دوستىق كانالى ارقىلى كەمىندە 491 ملن تەكشە مەتر سۋ جىبەرىلەدى.ايتا كەتەيىك, ۆەگەتاتسيالىق كەزەڭدى قاۋىپسىز وتكىزۋ ماقساتىندا «قازسۋشار» فيليالدارى 627 شاقىرىم يرريگاتسيالىق كانالدى مەحانيكالىق تاسىلمەن تازالاپ, 488 گيدروتەحنيكالىق قۇرىلىسجايعا جوندەۋ جۇمىستارىن جۇرگىزگەن. بيىل جالپى 517 گيدروتەحنيكالىق قۇرىلىسجايدى جوندەۋ جانە 2 مىڭ شاقىرىمنان استام كانالدى تازالاۋ جوسپارلانىپ وتىر. بۇل كورسەتكىش بىلتىرمەن سالىستىرعاندا ەكى ەسە ارتىق.