الماتى قالاسىنىڭ اكىمى دارحان ساتىبالدى اۋەزوۆ اۋدانى اۋماعىندا ورنالاسقان بىرقاتار الەۋمەتتىك ماڭىزى بار نىسانداردى ارالاپ, جۇرگىزىلىپ جاتقان جۇمىستارمەن تانىستى, دەپ حابارلايدى Egemen.kz
قالا اكىمى الدىمەن سايران شاعىن اۋدانىندا بولدى. بۇل اۋداندا كوركەيتۋ جۇمىستارى 10 مامىردا باستالعان. جوبا شەڭبەرىندە 14 اۋلا جاڭعىرتىلىپ, كولگە اپاراتىن جول سالىنادى. سونداي-اق, جاياۋ جۇرگىنشىلەر جولى مەن سپورت الاڭدارى جاڭارتىلىپ, كوشە شامدارى, بەينەباقىلاۋ قۇرىلعىلارى ورناتىلادى. دارحان ساتىبالدى مۇنداعى تۇرعىندارمەن كەزدەسىپ, ولاردىڭ ۇسىنىستارىنا قۇلاق استى.
قالا باسشىسى اياق تىرەگەن كەلەسى ماڭىزدى نىسان «تيگروحاۋد» ساۋدا ورنى. وندا قايتا جاڭارتۋ جۇمىسى جۇرگىزىلىپ جاتىر. جاقىندا اۋماق كولەمى 7000 شارشى مەترگە دەيىن ۇلعايتىلادى. سونىڭ ناتيجەسىندە شامامەن 300 جاڭا جۇمىس ورنى اشىلادى دەپ جوسپارلانعان.
اۋەزوۆ اۋدانىنداعى ماڭىزدى مادەني ورىنداردىڭ ءبىرى - ن.ساتس اتىنداعى بالالار مەن جاسوسپىرىمدەر تەاترى. تەاتردا جوندەۋ جۇمىستارى بەكىتىلگەن كەستەگە سايكەس جۇرگىزىلىپ جاتىر. جاڭارتۋ بارىسىندا جاڭا ساحنا, زاماناۋي تەحنيكالىق قۇرالدار ورناتىلىپ, تەاتر اۋماعى كوركەيتىلەدى.
سونداي-اق, اۋەزوۆ اۋدانىنداعى قالالىق ەمحانادا دا كۇردەلى جوندەۋ جۇمىستارى جالعاسىپ جاتىر. قازىر 58 مىڭعا جۋىق تۇرعىنعا قىزمەت كورسەتەتىن مەديتسينالىق مەكەمە جوعارى جۇكتەمەمەن جۇمىس ىستەيدى. جوندەۋدەن سوڭ ەمحانا قىزمەتىن پايدالانۋ تۇرعىندار ءۇشىن الدەقايدا وڭتايلى بولماق.
دارحان ساتىبالدى جاۋاپتى ماماندارعا بارلىق جوبا ۋاقىتىلى ورىندالۋىن, جۇمىستاردىڭ ساپالى جۇرگىزىلۋىن, سونداي-اق نىسانداردىڭ بارلىق ساناتتاعى ازاماتتار ءۇشىن قاۋىپسىز ءارى قولجەتىمدى بولۋىن قامتاماسىز ەتۋدى تاپسىردى.
داميرا تولەگەن
ەۇۋ ستۋدەنتى