ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي كەگەن اۋدانى توعىزبۇلاق اۋىلىنىڭ مادەنيەت ۇيىندە مازمۇنى تەرەڭ تاعىلىمدىق كەش ءوتتى, دەپ جازادى Egemen.kz.
كەشكە كەگەن اۋدانىنىڭ اكىمى نۇرباقىت تەڭىزباەۆ, ونەرتانۋشى, عالىم-ۇستاز, فيلولوگيا عىلىمدارىنىڭ كانديداتى ساعاتبەك مەدەۋبەك ۇلى, پارلامەنت ءماجىلىسىنىڭ دەپۋتاتى جاناربەك سادىحان ۇلى جانە شارانىڭ نەگىزگى ارقاۋىنا اينالعان ساياسي قايراتكەر, بىلىكتى ۇستاز, تالانتتى سازگەر قاپەز بايعابىل ۇلى تۋرالى دەرەكتى فيلم ءتۇسىرىپ, جارىققا شىعارعان جۋرناليست سالتانات باكەەۆا مەن جالاعاش اۋىلدىق وكرۋگىنىڭ اكىمى ايگۇل سادىروۆا قاتىستى.
اسپانتاۋ اياسىنداعى ەسكە الۋ كەش – حالقىمىزدىڭ تاريحىنداعى زوبالاڭ جىلداردىڭ قۇربانىنا اينالىپ, قۋعىن-سۇرگىنگە ۇشىراعان ميلليونداعان جازىقسىق جانداردىڭ رۋحىنا باعىشتالدى. شارا بارىسىندا «ۇلتىن سۇيگەن ۇلى تۇلعا – قاپەز» اتتى دەرەكتى ءفيلمنىڭ تۇساۋى كەسىلىپ, كوزىقاراق كورەرمەنگە جول تارتتى.
«بۇل – ءبىرتۋار تۇلعا قاپەز بايعابىل ۇلىنىڭ ومىرىنە ارنالعان العاشقى دەرەكتى فيلم. ول كىسىنىڭ ءومىرى مەن قايراتكەرلىك جولى, تاعدىرلى كەزەڭى كەڭىنەن كورسەتىلەدى. بۇگىنگى ۇرپاق قاپەز اندەرىن تۇششىنا تىڭدايمىز, بىراق سول اندەردىڭ شىعۋ تاريحى جايلى, كىم جيناقتاپ, زەرتتەپ-زەردەلەگەنى, نوتاعا ءتۇسىرىپ, قازىنانى حالىققا كىم ۇسىنعانى جايلى بىلە بەرمەيمىز, سوندىقتان وسى تاقىرىپتار قامتىلادى. فيلمدە تەك تاريحي دەرەكتەر ەمەس, قاپەز اتامىزدىڭ ازاماتتىق بەينەسى, ۇرپاققا قالدىرعان وسيەتى, مۇراسى ونەر زەرتتەۋشىلەرىنىڭ, ۇرپاقتارىنىڭ دالەلدى دايەگىمەن كورسەتىلەدى. بۇل كۇندە قاپەز بايعابىل ۇلىنىڭ 93 جاستاعى قىزى شوكە اپامىز, نەمەرە, شوبەرەلەرى بار. دەرەكتى ءفيلمدى ءتۇسىرۋ بارىسىندا بايقاعانىم, ءالى دە بولسا ارحيۆ قۇجاتتارىنىڭ جەتكىلىكسىزدىگى. ۇلتىن سۇيگەن ۇلى تۇلعاعا قاتىستى دەرەكتەر ارحيۆ قويناۋىنان تولىق اشىلماعان. وسى ولقىلىقتىڭ ورنىن تولتىرۋ ءۇشىن تاريحشىلاردىڭ ەرەن ەڭبەكتەرى قاجەت», دەيدى دەرەكتى فيلم اۆتورى سالتانات باكەەۆا.
ەسىمى ەلگە كەڭىنەن تانىمال قايراتكەر-اعارتۋشى, حالقىنىڭ بولاشاعىنا قىزمەت ەتكەن قاپەز بايعابىل ۇلى ءوزى تۋىپ-وسكەن ءوڭىردىڭ ءبىلىم-ىلىمىنە سۇبەلى ۇلەس قوسقان قايراتكەر. سونداي-اق ول, اعارتۋشى عانا ەمەس, جىرشى, اقىن, سازگەرلىگىمەن تانىلعان تۇلعا. ونىڭ تەرەڭنەن تولعايتىن «مەركى», «ايحاي», «دۇنيە-اۋ», «قوشتاسۋ» اندەرى ءار جۇرەكتىڭ تۇكپىرىندە تەربەلۋدە.
الماتى وبلىسى