قوستاناي وبلىسى تۇرعىندارىن ساپالى اۋىز سۋمەن قامتاماسىز ەتۋ ماقساتىندا ارناۋلى مەملەكەتتىك قوردان شامامەن 5,4 ملرد تەڭگە قارجى ءبولىندى, دەپ جازادى Egemen.kz.
بۇگىندە توبىل قالاسىندا حالىقتىڭ 87,9%-ى ورتالىقتاندىرىلعان سۋ جۇيەسىنە قوسىلعان. بۇل كورسەتكىشتى 100%-عا جەتكىزۋ ءۇشىن قالادا ۇزىندىعى 100 شاقىرىمنان اساتىن سۋ قۇبىرى جەلىلەرىنىڭ قۇرىلىسى باستالعان. ۇكىمەت بۇل ماقساتقا قوردان 1,4 ملرد تەڭگە ءبولىپ وتىر.
سونداي-اق ارقالىق قالاسىنا سۋ قۇبىرىن تارتۋعا 872 ملن تەڭگە بولىنگەن. جوبا 13 مىڭنان استام تۇرعىنى بار قالانى اۋىز سۋمەن تولىق قامتاماسىز ەتىپ, 2025 جىلدىڭ سوڭىنا دەيىن سۋمەن قامتۋ دەڭگەيىن 96,5%-دان 100%-عا جەتكىزۋگە مۇمكىندىك بەرەدى.
سونىمەن قاتار قارابالىق, دەنيسوۆ, قوستاناي, فەدوروۆ, بەيىمبەت مايلين اۋداندارى اۋىلدارىندا, سونداي-اق ارقالىق قالاسىنداعى جاستار اۋىلىندا جالپى قۇنى 3 ملرد تەڭگەدەن اساتىن سۋ قۇبىرى جەلىلەرىن تارتۋ جوسپارلانىپ وتىر.
ونەركاسىپ جانە قۇرىلىس مينيسترلىگىنىڭ دەرەگىنشە, قازىرگى تاڭدا ورتالىقتاندىرىلعان سۋعا قولجەتىمدىلىك قوستاناي قالاسىندا 99%-دى, ال اۋىلدىق ەلدى مەكەندەردە 90,3%-دى قۇرايدى.