ەلىمىزدە ءبىلىم بەرۋ سالاسىنداعى تسيفرلاندىرۋ مەن كادرلىق ىرىكتەۋدى جەتىلدىرۋ باعىتىندا تاعى ءبىر ماڭىزدى قادام جاسالدى. قر وقۋ-اعارتۋ مينيسترلىگىنە قاراستى «ورلەۋ» بىلىكتىلىكتى ارتتىرۋ ۇلتتىق ورتالىعى «كەلەشەك مەكتەپتەرى» ۇلتتىق جوباسى اياسىندا career.orleu.edu.kz تسيفرلىق پلاتفورماسىن ىسكە قوستى, دەپ حابارلايدى Egemen.kz.
وقۋ-اعارتۋ مينيسترلىگىنىڭ حابارلاۋىنشا, بۇل جۇيە – جاڭا فورماتتاعى «كەلەشەك مەكتەپتەرىنە» جاس پەداگوگتەردى جەدەل ءارى ءتيىمدى ىرىكتەۋگە ارنالعان قۇرال. پلاتفورمادا پەداگوگيكالىق جوعارى وقۋ ورىندارىنىڭ تۇلەكتەرىنىڭ ەلەكتروندى پورتفوليولارى جيناقتالعان. قازىردىڭ وزىندە 600-گە جۋىق جاس مامان ارنايى تەستىلەۋدەن ءوتىپ, دەرەكقورعا ەنگىزىلگەن.
«جۇيەدە جاس پەداگوگتاردىڭ ءبىلىمى, ماماندىعى مەن تاجىريبەسىنە قاتىستى مالىمەتتەر جيناقتالىپ, ەلەكتروندى پورتفوليو قالىپتاستىرىلادى. قازىرگى تاڭدا پلاتفورما تەك «كەلەشەك مەكتەپتەرى» ديرەكتورلارى ءۇشىن قولجەتىمدى. ولار كانديداتتاردى ءوڭىرى, ءپانى, بىلىكتىلىگى بويىنشا ءتيىمدى تاڭداي الادى. جۇيە مەملەكەتتىك دەرەكقورلارمەن كىرىكتىرىلگەن, بۇل – مالىمەتتەردىڭ دالدىگى مەن وزەكتىلىگىن قامتاماسىز ەتەدى», دەلىنگەن حابارلامادا.
ايتا كەتەيىك, قازىرگى ۋاقىتتا جۇيە تەك «كەلەشەك مەكتەپتەرى» ديرەكتورلارىنا ارنالعان. بۇل – ساپالى كادرلاردى تاڭداۋدى وڭتايلاندىرىپ, جاس مۇعالىمدەردى جۇمىسپەن قامتۋ پروتسەسىن جەدەلدەتۋگە مۇمكىندىك بەرەدى. جوبا – زاماناۋي ءبىلىم بەرۋ مەكەمەلەرىن كاسىبي ءارى جاڭاشىل كادرلارمەن قامتاماسىز ەتۋدىڭ ءتيىمدى تەتىگى رەتىندە ىسكە اسىرىلىپ وتىر.
پلاتفورمانىڭ نەگىزگى مۇمكىندىكتەرى:
جاس پەداگوگ تۋرالى تولىق ەلەكتروندى كارتا; ديرەكتورلار ءۇشىن قاۋىپسىز كىرۋ جۇيەسى (ەتسق ارقىلى); سمارت سۇزگى: ناقتى ءپان, ءوڭىر جانە ماماندىعى بويىنشا ىزدەۋ; جۇمىسقا ورنالاسقان تۇلەكتەردى اۆتوماتتى تۇردە ەسەپكە الۋ.