استاناداعى ۇلتتىق كىتاپحانادا «Mecenat.kz» ادەبي سىيلىعى تابىستالدى. مادەنيەت جانە اقپارات مينيسترلىگىنىڭ قولداۋىمەن «Freedom Holding Corp.» كومپانياسىنىڭ دەمەۋشىلىگىمەن بيىل ءتورتىنشى رەت وتكىزىلگەن ادەبي بايقاۋ ەلىمىزدىڭ بۇگىنگى ءومىرىن كوركەم تىلمەن بەينەلەيتىن شىعارمالاردى انىقتاپ, تالانتتى اۆتورلاردى ناسيحاتتاۋدى ماقسات ەتىپ كەلەدى.
بيىل بايقاۋعا 21 اۆتور قاتىسسا, قازاق تىلىندە – 9, ورىس تىلىندە – 12 قولجازبا ۇسىنىلىپ, حالىقتىق ونلاين داۋىس بەرۋ ناتيجەسىندە جاس قالامگەر ءاليحان جاقسىلىقتىڭ «تۋرگەنەۆ كوشەسىندەگى ءۇي جۇمىسقا قابىلدايدى» اتتى رومانى ۇزدىك دەپ تانىلدى.
جەڭىمپازعا «Freedom Holding Corp.» كومپانياسىنىڭ ەنشىلەس ۇيىمى – «Freedom Finance Life» ءومىردى ساقتاندىرۋ كومپانياسىنان ءومىر بويى اي سايىن 500 اقش دوللارى مولشەرىندە تولەنەتىن ەرىكتى اننۋيتەتتىك ساقتاندىرۋ ءپوليسى تابىستالدى.
ماراپاتتاۋ راسىمىندە مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتىنىڭ توراعاسى رۋستام ءالي ۇلى قۇتتىقتاۋ ءسوز سويلەپ, ادەبيەتتى قولداۋ شارالارى تۋرالى ايتتى.
«ادەبيەت – ۇلتتىڭ رۋحاني تىرەگى, ول سانا مەن سەزىمدى تاربيەلەپ, وتكەن مەن بۇگىندى ساباقتاستىرىپ, بولاشاققا باعدار بەرەدى. مادەنيەت جانە اقپارات مينيسترلىگى قالامگەرلەرگە قولداۋ كورسەتۋ ماقساتىندا «ايبوز» ادەبي سىيلىعى, پرەزيدەنتتىك ارناۋلى ادەبي سىيلىق, «دارىن» جاستار سىيلىعى سىندى ماڭىزدى باستامالاردى جۇزەگە اسىرىپ كەلەدى. سونىمەن قاتار وتكەن جىلى قازاقستان جازۋشىلار وداعىمەن ستراتەگيالىق ارىپتەستىك اياسىندا 3 جاڭا جوبا ىسكە اسىرىلدى.
مەملەكەت باسشىسىنىڭ 2025 جىلدى «جۇمىسشى ماماندىقتارى جىلى» دەپ جاريالاۋىنا بايلانىستى, جاس قالامگەرلەرگە ارنالعان «ەرلىك پەن ەڭبەك داستانى» اتتى جاڭا بايقاۋ جاريالاندى. مۇنىڭ بارلىعى – ۇلتتىق ادەبيەتتى دامىتۋعا جانە شىعارماشىلىق قاۋىمداستىقتى قولداۋعا باعىتتالعان كەشەندى جۇمىستاردىڭ ناقتى كورىنىسى. بۇگىنگى بايقاۋدىڭ ەرەكشەلىگى – ونىڭ مەملەكەتتىك بيۋدجەتتەن تاۋەلسىزدىگى. ءبىز مۇنداي ازاماتتىق باستامالاردى جوعارى باعالايمىز», دەدى رۋستام ءالي ۇلى.
«Mecenat.kz» جوباسىنىڭ نەگىزىن قالاۋشى ەرلان اسقاربەكوۆ ماۋسىم سايىنعى قاتىسۋشىلار دەڭگەيىنىڭ ارتىپ كەلە جاتقانىن اتاپ ءوتىپ, جەڭىمپاز تۋىندىلاردىڭ بارلىعى شەت تىلدەرىنە اۋدارىلىپ, باسپادان شىعىپ جاتقانىن جەتكىزدى.
ال جوبا مەتسەناتى, «Freedom Holding Corp.» كومپانياسىنىڭ باس اتقارۋشى ديرەكتورى تيمۋر تۋرلوۆ بايقاۋدى قولداۋ – كومپانيانىڭ ادام الەۋەتىن دامىتۋعا باعىتتالعان ۇزاقمەرزىمدى ستراتەگياسىنىڭ ءبىر بولىگى ەكەنىن ايتتى.
اتالعان جۇلدەنى 2022 جىلى «كۇلپەت» رومانىمەن جازۋشى شارحان قازىعۇل جەڭىپ السا, 2023 جىلى «ولگەندەر قايتىپ كەلەدى» رومانىنىڭ اۆتورى تۇرىسبەك ساۋكەتاەۆ, 2024 جىلى ء«ومىر بايتەرەگى» رومانىمەن قازاقستاننىڭ ەڭبەك سىڭىرگەن قايراتكەرى, حالىقارالىق «الاش» ادەبي سىيلىعىنىڭ لاۋرەاتى ساۋلە دوسجان يەلەنگەن.