كانادادا اپتاپ ىستىق پەن قۇرعاقشىلىق سالدارىنان بولعان جويقىن ورمان ورتتەرى سالدارىنان مانيتوبا پروۆينتسياسىندا توتەنشە جاعداي رەجيمى ەنگىزىلگەن. BILD اگەنتتىگىنىڭ حابارلاۋىنشا, ستيحيالىق اپاتتىڭ اۋقىمى وتە كەڭ. قازىرگى تاڭدا 17 مىڭنان استام ادام ەۆاكۋاتسيالانعان. ال جالىن شارپىعان ورمان كولەمى 200 مىڭ گەكتاردان اسقان, بۇل سوڭعى بەس جىلداعى ورتاشا كورسەتكىشتەن ءۇش ەسە كوپ, دەپ حابارلايدى Egemen.kz.
پروۆينتسيانىڭ پرەمەر-ءمينيسترى ۆابا كينيۋ بۇل جاعدايدى «مانيتوبانىڭ تاريحىنداعى ەڭ ءىرى ەۆاكۋاتسيا» دەپ اتاپ ءوتىپ, ەلدى كليماتتىڭ وزگەرۋىنە جەدەل بەيىمدەلۋگە شاقىرعان.
حابارلانعانداي, فلين-فلون شاحتەرلىك قالاشىعىندا جاعداي وتە كۇردەلى. قالاعا اپاراتىن جالعىز جول كەپتەلىسكە تولى, ال جەرگىلىكتى جانارماي بەكەتتەرىندە وتىن تاۋسىلعان. سوندىقتان ەۆاكۋاتسيا كانادا قارۋلى كۇشتەرىنىڭ اسكەري ۇشاقتارى ارقىلى جۇرگىزىلىپ جاتىر.
اپتاپ ىستىق پەن قۇرعاق اۋا رايى ءورتتىڭ قارقىنىن كۇشەيتىپ وتىر. اۋا تەمپەراتۋراسى +37 گرادۋسقا جەتكەن. پرەريلەردەگى ءشوپ پەن توپىراق ابدەن كەۋىپ, ءورت وشاقتارى بىرىنەن كەيىن ءبىرى تۇتعان.
«بۇرىن ءبىر ايماقتا عانا ءورت بولاتىن, قازىر ءبىر مەزگىلدە بىرنەشە ايماق بىردەي ورتەنىپ جاتىر. بۇل — كليماتتىڭ وزگەرۋىنىڭ ايقىن كورىنىسى», دەدى پروۆينتسيانىڭ پرەمەر-ءمينيسترى.
ماماندار ءورتتىڭ ماسشتابىن ەسكەرىپ, جاعدايدىڭ ودان ءارى ۋشىعۋى مۇمكىن ەكەنىن ەسكەرتەدى.