مەملەكەت باسشىسى جاريالاعان جۇمىسشى ماماندىقتارىنىڭ جىلى اياسىندا جانە كورپوراتيۆتىك الەۋمەتتىك جاۋاپكەرشىلىك شەڭبەرىندە «سامۇرىق-قازىنا» قورى جىلدار بويى ەڭبەك ادامدارىنىڭ مارتەبەسىن كوتەرۋگە ايرىقشا نازار اۋدارىپ كەلەدى. ويتكەنى ەل ەكونوميكاسىنىڭ جۇرەگى – جەر قويناۋىن يگەرىپ, شاحتادا, زاۋىتتا تىنىمسىز ەڭبەك ەتىپ, كۇندەلىكتى تىرشىلىكتىڭ دىڭگەگىنە اينالعان وسى سالا وكىلدەرىنىڭ قولىندا.
بۇگىنگى كۇننىڭ باستى مىندەتى – تەك قازىرگى جۇمىسشىلاردىڭ ءال-اۋقاتىن جاقسارتۋ عانا ەمەس, سونىمەن قاتار ەرتەڭگى ءوندىرىس كوشىن العا سۇيرەيتىن جاس مامانداردى دەر كەزىندە قولداپ, ولارعا ساپالى ءبىلىم مەن كاسىبي دامۋعا ناقتى مۇمكىندىك بەرۋ. بۇل – ەل بولاشاعىنا باعىتتالعان بەرىك ءارى ۇزاقمەرزىمدى ينۆەستيتسيا.
بولاشاق ينجەنەرلەردىڭ جەڭىسى: وتاندىق وقۋشىلار حيۋستوندا توپ جاردى
وتكەن ايدا «سامۇرىق-قازىنا» قولداۋىمەن وتاندىق وقۋشىلار اقش-تىڭ حيۋستون قالاسىندا وتكەن FIRST حالىقارالىق روبوتتەحنيكا چەمپيوناتىندا ەرەكشە ناتيجە كورسەتتى.
6 مەن 18 جاس ارالىعىنداعى كوماندالار ەل نامىسىن ابىرويمەن قورعاپ, Champions Award جانە Inspire Award سىندى بەدەلدى ماراپاتتاردى يەلەندى.
كەيىنگى جىلدارى قازاقستاندا ينجەنەرلىك جانە تەحنيكالىق بىلىمگە قىزىعۋشىلىق ارتىپ كەلەدى. بۇرىن ەلگە نەبارى 4 كۆوتا بولىنسە, بيىل 7 كۆوتا ۇسىنىلىپ, وعان الماتى, استانا, قاراعاندى جانە پاۆلودار قالالارىنان 86 وقۋشى يە بولدى.
1000 توپ پەن 50 000 ادامنىڭ اراسىنداعى بۇل جەڭىس – تەك وقۋشىلار ءۇشىن ەمەس, بۇكىل ەل ءۇشىن ۇلكەن ماقتانىش.
20 جاس ءۇشىن 3 جىل تەگىن: «Samruk Umiti» جوباسى وقۋشىلاردى قولدادى
جۇمىسشى ماماندىقتارىن قولداۋ ماقساتىندا بيىل ءساۋىر ايىندا ىسكە قوسىلعان «Samruk Umiti» باعدارلاماسى پاۆلودار جانە شىعىس قازاقستان وبلىستارىنداعى بالالار ۇيلەرىنىڭ 100 تاربيەلەنۋشىسىن قامتىدى. بۇگىندە ولاردىڭ 28-ءى ءوز بولاشاعىن جۇمىسشى ماماندىقتارىمەن بايلانىستىرۋعا شەشىم قابىلدادى. بۇل – الەۋمەتتىك وسال توپتاعى بالالارعا ومىرلىك جول سىلتەيتىن مۇمكىندىك.
جۋىردا وسكەمەندەگى گەس بويىنشا ۇيىمداستىرىلعان ساپار بارىسىندا «Samruk Kazyna» كومپانيالار توبى اتىنان 20 بالا «ەلەكترەنەرگەتيكا» ماماندىعى بويىنشا قالاداعى جوعارى پوليتەحنيكالىق كوللەدجگە تولىق مەملەكەتتىك گرانتتا وقۋعا جولداما الدى. وقۋ اقىسى مەملەكەت ەسەبىنەن وتەلەدى, ستيپەنديا – 41 مىڭ تەڭگە, جاتاقحانا مەن ءۇش مەزگىل تاماق – تەگىن. ءۇش جىل ىشىندە ستۋدەنتتەر كاسىپورىندا تاجىريبەدەن ءوتىپ, ۇزدىكتەرى تۇراقتى جۇمىس ورنىمەن قامتىلادى دەپ جوسپارلانىپ وتىر.
جوبا ىسكە قوسىلعانىنا نەبارى بىرنەشە اي عانا بولسا دا, العاشقى ناتيجەسىن كورسەتتى. بۇل – «Samruk Umiti» باستاماسىنىڭ قاجەتتىلىگى مەن تيىمدىلىگىن دالەلدەيتىن ناقتى قادام.
وڭىرگە ورالار بىلىكتى ماماندار: 177 جاس – كاسىپ جولىندا
ماڭعىستاۋ وبلىسىندا جۇمىسشى ماماندىقتارىنىڭ مارتەبەسىن كوتەرىپ, ءوڭىر ەكونوميكاسىن ارتاراپتاندىرۋعا باعىتتالعان بىرەگەي باعدارلاما – جاستارعا ناقتى باعىت بەرىپ, سەنىم ۇيالاتقان باستاما. «Samruk-Kazyna» قورىنىڭ قولداۋىمەن ءۇش جىل ىشىندە 177 ءجاسوسپىرىم ەلىمىزدىڭ 10 وڭىرىندەگى تەحنيكالىق كوللەدجدەرگە وقۋعا ءتۇستى.
2023 جىلى العاشقى 2 تۇلەك وقۋىن ءتامامداسا, بىلتىر بۇل كورسەتكىش 36 ادامعا جەتتى. 38 ديپلوم العان ماماننىڭ 30-ى جوعارى وقۋ ورنىنا ءتۇسىپ, 4-ءى جۇمىسقا ورنالاسىپ ۇلگەردى.
بيىل 72 قاتىسۋشى كوللەدج ديپلومىن الۋعا دايىندالىپ جاتىر. ولاردىڭ تەڭ جارتىسى – جۇمىسشى ماماندىقتار يەگەرى.
باعدارلاما تۇلەكتەرى – بولاشاق ينجەنەرلەر, ەنەرگەتيكتەر, تاۋ-كەن جانە تەحنيكالىق سالا ماماندارى. ال بيىلعى تۇلەكتەردىڭ تاڭداۋى مەديتسينا, ينجەنەريا, كولىك جانە قىزمەت كورسەتۋ سالالارىنا دەيىن كەڭەيىپ وتىر. بۇل – جاستاردىڭ ەڭبەك نارىعىنا بەيىمدەلىپ, سۇرانىسقا ساي شەشىم قابىلداپ جاتقانىن كورسەتەدى.
«Samruk Kazyna» ۇسىنعان باعدارلاما – جاي گرانت ەمەس, جاستارعا كاسىپكە جول اشاتىن, ومىرلىك تاجىريبە بەرەتىن الەۋمەتتىك كوپىر. ءوندىرىس ءۇشىن تەوريا مەن تاجىريبەنى قاتار مەڭگەرگەن مامان – باستى سۇرانىس. بۇل جوبا سول قاجەتتىلىكتى ىشكى رەسۋرسپەن شەشىپ, جاستاردى تۋعان جەردە قالۋعا ىنتالاندىرۋدىڭ ناقتى ۇلگىسىنە اينالدى.
كاسىپكە بەت بۇرعان 68 ءۇمىت
«Samruk-Kazyna Trust» قولداۋىمەن جۇزەگە اسىپ جاتقان ەكى باعدارلاما اياسىندا بۇگىندە 277 بالا بىلىممەن قامتىلىپ وتىر. ونىڭ 68-ءى – ءوز بولاشاعىن جۇمىسشى ماماندىقتارىمەن بايلانىستىرۋدى تاڭدادى.
بۇل – ەلدىڭ وندىرىستىك الەۋەتىنە قوسىلعان 68 تىرەك, ەڭبەك ادامىنا دەگەن شىنايى قۇرمەتتىڭ كورىنىسى.
اتالعان جوبالار – جاڭا تامىر جايىپ كەلە جاتقان باستامالار. ناقتى ناتيجەلەرى ۋاقىت وتە ايقىن كورىنەرى انىق, ويتكەنى ءبىلىم مەن كاسىبي داعدىعا سالىنعان ينۆەستيتسيا – ەڭ تۇراقتى ءارى ۇزاقمەرزىمدى قايتارىم بەرەتىن كاپيتال. بۇگىن بەرىلگەن باعىت پەن مۇمكىندىك ەرتەڭ تەك ءبىر وتباسىنىڭ ەمەس, تۇتاس ءوڭىردىڭ الەۋمەتتىك-ەكونوميكالىق بەينەسىن وزگەرتە الادى. سوندىقتان بۇل باستامالار – ءبىر ساتتىك ءىس-شارا ەمەس, ەل بولاشاعىنا سالىنعان سەنىمدى نەگىز.
ايگەرىم اقشولاقوۆا