استانادا مەكتەپ وقۋشىلارى اراسىندا «Robotek Grand Tournament» اتتى حالىقارالىق روبوتتەحنيكا چەمپيوناتى ءوتتى. ونى الەمگە تانىمال «Robotek» كومپانياسى ۇيىمداستىردى.
ايتۋلى جوبانى ەلوردا اكىمدىگى مەن رەسپۋبليكالىق عىلىمي-پراكتيكالىق «دارىن» ورتالىعى جانە «استانا دارىنى» ورتالىعىمەن بىرلەسىپ, ىسكە اسىردى. وسى ورايدا «استانا دارىنى» ورتالىعىنىڭ ديرەكتورى جانار بەيسەنباەۆانىڭ ايتۋىنشا, بۇل جوبا باس شاھاردىڭ برەندىنە اينالىپ, ءار ەلدەن كەلگەن جاس روبوتتەحنيكتەردىڭ ءوزارا تاجىريبە الماساتىن الاڭ ەكەنىن اتاپ ءوتتى.
بۇل ءبىلىم دوداسى مەكتەپ وقۋشىلارى اراسىندا روبوتتەحنيكا سالاسىن جەتىك مەڭگەرگەن ۇزدىكتەردى انىقتاۋعا باعىتتالعان. 2022 جىلى قالالىق دەڭگەيدە باستالعان تۋرنير, قازىر حالىقارالىق دەڭگەيگە كوتەرىلدى. العاش رەت چەمپيوناتقا اقش, بولگاريا, ازەربايجان, مولدوۆا, وزبەكستان, قىرعىزستان, تاجىكستان ەلدەرىنەن كەلگەن 25-تەن اسا شەتەلدىك كوماندا قاتىسقان ەدى. بۇگىندە بىرەگەي بايقاۋدىڭ تانىمالدىلىعى ارتىپ, اۋماعى كەڭەيگەن.
وسى ورايدا, WRO ازەربايجان بويىنشا ۇلتتىق ۇيىمداستىرۋشىسى كەنان كاريموۆ الدىمەن جوبا جەتەكشىلەرىنە ريزاشىلىعىن ءبىلدىردى.
ء«بىز قازاق ەلىنە كەلگەن كۇننەن جىلىلىقتى سەزىندىك. شىن مانىندە, روبوتتەحنيكا — مەحانيزمدەر تۋرالى عىلىم عانا ەمەس. بۇل — جاستار مەن بالالار ءۇشىن وتە جاقسى پلاتفورما. سەبەبى روبوتتەحنيكامەن اينالىسقاندا سەن جاڭا دوستار تاباسىڭ, سولارمەن بىرگە جاڭا يدەيالار ىزدەيسىڭ. مەنىڭشە, جاستاردىڭ باستامالارى مەن يدەيالارى ءوز ەلدەرىمىز بەن بولاشاق ۇرپاقتىڭ دامۋىنا ۇلەس قوسادى دەپ سەنەمىن», دەدى ول.
جالپى العاندا, تۋرنيگە 9-17 جاس ارالىعىنداعى 350-گە تارتا مەكتەپ وقۋشىسى 7 سانات بويىنشا باق سىنادى. ءار باعىتتىڭ ءوز ەرەكشەلىگى مەن ەرەجەسى بار. سونى بۇلجىتپاي ورىنداعاندار توپ جارىپ, جۇلدەلى ورىنداردى يەلەندى.
سونىمەن, چەمپيوناتتىڭ باس جۇلدەسى, ياعني قازاقستان-بريتان تەحنيكالىق ۋنيۆەرسيتەتىنىڭ اقپاراتتىق تەحنولوگيالار جانە ينجەنەريا مەكتەبى گرانتىن الماتىلىق وقۋشىلار ەرنۇر ەرەجەپ پەن اسلان قابدۋللوۆ جەڭىپ الدى. ال جارىسقا اباي وبلىسى ءۇرجار اۋدانىنان كەلگەن دميتري پولەجاەۆ الماتى ەنەرگەتيكا جانە بايلانىس ۋنيۆەرسيتەتىنىڭ بولاشاق ستۋدەنتى اتاندى. ال «ۇزدىك شەتەلدىك كوماندا» اتالىمى وزبەكستاننان كەلگەن جەتكىنشەكتەرگە بۇيىردى. سونداي-اق تۋرنيردە ەرەكشە كوزگە تۇسكەن وقۋشىلارعا دا باعالى سىيلىقتار مەن ديپلومدار تابىس ەتىلدى.
فاريزا ءىزباساروۆا,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى