قوعامدا ۆەيپ پەن ەلەكتروندى شىلىمعا اۋەستەنەتىندەردىڭ سانى ارتقان. ولاردىڭ دەنى جاستار مەن جاسوسپىرىمدەر. ادام دەنساۋلىعىنا اسا قاۋىپتى سانالاتىن قولايسىزدىقپەن كۇرەس تۋرالى وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا الماتى قالالىق پسيحيكالىق دەنساۋلىق ورتالىعى ديرەكتورىنىڭ ورىنباسارى روزا تاتيەۆا مالىمدەدى.
قالادا نيكوتين ونىمدەرىنىڭ تارالۋىنا قارسى بىرنەشە جۇيەلى باستاما قولعا الىنعانىمەن, زياندى زاتقا اۋەستەنگەندەردىڭ سانى ازايماي تۇر. سوندىقتان مامان, ۇقىقتىق تەتىكتەردى ءالى دە بولسا بارىنشا كۇشەيتۋ قاجەت دەپ ەسەپتەيدى.
وسى باعىتتا ىسكە اسقان «ۆەيپسىز جاستىق» جوباسى اياسىندا ۆەيپ-شوپتار مەن كاليان-بارلارعا رەيدتەر ۇيىمداستىرىلعان. سوڭعى بىرەر ايدىڭ وزىندە, قوعامدىق ورىندا كاليان شەككەن 100 ادامعا ايىپپۇل سالىنىپتى.
«كەي جاستار كالياندى قاۋىپسىز دەپ قابىلدايدى. الايدا ءبىر رەت كاليان شەگۋ — 100 تەمەكى تارتقانمەن تەڭ. ونىڭ تۇتىنىندە نيكوتين, شايىر جانە اۋىر مەتالداردىڭ مولشەرى تەمەكىدەن 3–5 ەسە كوپ بولۋى مۇمكىن. كالياندى جابىق بولمەدە شەككەندە, ونىڭ ءتۇتىنى ينفەكتسيالىق اۋرۋلاردىڭ تارالۋىنا جاعداي جاسايدى. ال ءبىر مۇشتىكتى بىرنەشە ادامنىڭ قولدانۋى — جۇقپالى اۋرۋلار ءۇشىن تىكەلەي جول. كاليان – اعزانى ۋلايتىن قۇرال عانا ەمەس, جاستاردى تاۋەلدىلىككە يتەرمەلەيتىن الەۋمەتتىك قۇبىلىس. ول تەمەكىدەن دە قاۋىپتى», – دەيدى ر. تاتيەۆا.
ساراپشىلاردىڭ پىكىرىنشە, ادام زياندى ادەتتەن نەعۇرلىم ەرتەرەك باس تارتسا, وعان قايتا ورالۋ ىقتيمالدىعى سوعۇرلىم ازايادى. سوندىقتان جاستاردىڭ سالاۋاتتى ءومىر سالتىن ۇستانۋىنا جاعداي جاساۋ — مەملەكەت پەن قوعامنىڭ ورتاق ءارى ماڭىزدى مىندەتى.