ەلدىك شەڭبەرىنەن شىعىپ, ءسان الەمىنىڭ حالىقارالىق مىنبەرىنە اينالعان EURASIAN FASHION WEEK FW 25/26 بيىل توسىن سىيلار مەن تاماشا جاڭالىقتارعا تولى بولدى. بيىلعى ماۋسىمنىڭ تاقىرىبى – Fluidum – داۋىرلەر تەزىنەن شىققان كوركەم الەمنىڭ ۇزدىكسىز قيمىلى مەن يكەمدىلىگىن پاش ەتىپ, گەندەرلىك شەكتەۋلەر مەن مادەني شەكارالاردى بۇزعان ەركىندىك سيمۆولى ىسپەتتى بولدى. بۇل ءجاي عانا مودا ەمەس – ءسان الەمىن ونەر, بيزنەس پەن الەۋمەتتىك پلاتفورما رەتىندە تانىتا الاتىن, تالانتتى ديزاينەرلەردىڭ باعىن اشاتىن الاڭ دەسەك تە بولادى, دەپ حابارلايدى Egemen.kz.
ايتۋلى وقيعا رەتىندە ايشىقتالعان EURASIAN FASHION WEEK-ءتىڭ 9-ماۋسىمىنا 3 000-داي ادام قاتىسىپ, باق وكىلدەرى مەن ينفليۋەنسەرلەردى, ىسكەرلىك الەمى ءسان يندۋسترياسىنىڭ شەتەلدىك جانە وتاندىق وكىلدەرىن جينادى.
الماتى تورىندەگى سالتاناتتى «Koktobe Hall» سارايىندا وتكەن «EFW 2025» سىيلاعان جارقىن ساتتەردى تىلگە تيەك ەتەتىن بولساق, ازەربايجاندىق برەندتىڭ يەسى Anara Zakirli العاش رەت eurasian مىنبەرىندە سالتانات قۇردى. ول 2018 جىلى ۇلتتىق كىلەم ورنەكتەرىن زاماناۋي كيىم ۇلگىلەرىمەن ۇيلەستىرىپ, ءاربىر ءسان ۇلگىسىن تاريحتىڭ, مادەنيەت پەن تابيعاتتىڭ (وت, سۋ, اۋا, جەر) نىشانىنا اينالدىرا بىلگەن دارىندى ديزاينەر.
باق وكىلدەرىنە ارنالعان EFW باس پروديۋسەرى يرينا بايجانوۆا: ء«بىز ءۇشىن كورشى ەلدەردەن كەلگەن دوستارىمىزدى EFW ساحناسىندا قارسى الۋ –ۇلكەن مارتەبە. ءازىربايجان ەلىنىڭ جۇرەگىن جاۋلاعان برەندتى ءوز ەلىمىزدە تانىستىرۋدىڭ ءساتى كەلگەنىنە قۋانىپ وتىرمىز. وسىلايشا Anara Zakirli برەندىنىڭ جاڭا تاراۋلارى قازاقستاندا اشىلىپ وتىر», دەدى.«بيىلعى ماۋسىمنىڭ تاعى ءبىر ەرەكشەلىگى ەرەكشە كۇتىمدى قاجەت ەتەتىن بالالار مودا مىنبەرىنە شىعىپ, ءسان ۇلگىلەرىن كورسەتتى. وسى ساتتەر ولارعا قۋانىش سىيلاپ قانا قويماي, كيىپ كورسەتكەن ءساندى كيىم ۇلگىلەرىن وزدەرىندە ەستەلىككە قالدىردى. ەڭ باستىسى ونكولوگيالىق دەرتتەرمەن, قان اۋرۋلارىمەن كۇرەسىپ جۇرگەن بالالار قۋانىشتان كۇش-قۋات الدى, ەرەكشە ساتتەردىڭ ءبىر بولشەگىنە اينالدى.
«بيىلعى ماۋسىمدى بالالار كورسەتىلىمىنەن باستاساق – بۇل سانالى تۇردە قابىلدانعان شەشىم. بىزگە ءسان الەمىنىڭ – شابىتتاندىرا الاتىن, قولداۋ كورسەتىپ, بىرىكتىرە الاتىن كۇش ەكەنىن كورسەتۋ ماڭىزدى. EFW ماقساتى ادەتتە كادر سىرتىندا قالىپ قوياتىنداردى كورسەتۋ. ەرەكشە قاجەتتىلىگى بار بالالار مىنبەرگە شىققان كەزدە ءسان – ءجاي يندۋستريا عانا ەمەس, وزگەرىس قۇرالىنا اينالىپ شىعا كەلەدى. بۇل كورسەتىلىمدەر ءبىزدىڭ الەۋمەتتىك جوبالارىمىزدىڭ ءبىر بولشەگى, ءاربىر بالانىڭ تانىمال ديزاينەردەن العان سىيلىعى – ولاردىڭ وسىعان لايىق ەكەندىگىن سەزىندىرەدى», دەيدى يرينا بايجانوۆا.
سونداي-اق EFW-ءتىڭ بيىلعى ماۋسىمىندا BEYNE, Malique, Adi Distance مۇسىلماندىق برەندتەرى العاش رەت ساحناعا شىعىپ, زاماناۋي مۇسىلمان ايەلدەرىنىڭ كەلبەتى مەن ءستيلىن كورسەتتى.ال Sun Sergio, Tasha Kazantseva, Rose & Boujee, ShakerBay, Kenje دەۆياتكو (Lacrimosa توپتاماسى), Bayan Sabazova, Arai Bektursun (ەتنيكا جانە تۇراقتى مودا سينتەزى), Zero سىندى برەندتەر كورەرمەندەردىڭ ەرەكشە ءىلتيپاتىنا بولەندى.جۇرتتىڭ نازارىن اۋدارعان Ethno Fashion Show EFW-ءدى مارەگە جەتكىزىپ, MYRZA, Gulnara Kassym, Gulnaz Zheksembek, POLYRMORT برەندتەرى ەتنيكا مەن تۇراقتى ءسان ۇلگىلەرىنىڭ ۇيلەسىمىن تانىتتى.
مودا الەمىنىڭ ميسسياسى دا سوندا – وتاندىق ءسان الەمىندەگى ايشىقتى كۇندەردى مود (حالىقارالىق كوشى-قون ۇيىمى) مەن Models Production سەرىكتەستىگىمەن ايەلدەرگە تىگىنشىلىك ونەر مەن كاسىپكەرلىككە باۋلۋ باعدارلاماسى جالعاسىن تاباتىندىعىمەن قورىتىندىلاۋعا بولادى. قازىردىڭ وزىندە 100-دەن استام ايەل كاسىپ باستاۋعا مۇمكىندىك الىپ وتىر.