پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا جىلىتۋ ماۋسىمىنىڭ قورىتىندىسى جانە الداعى جىلۋ بەرۋ ماۋسىمىنا دايىندىق بارىسى قارالدى.
وندا ەنەرگەتيكا ۆيتسە-ءمينيسترى سۇڭعات ەسىمحانوۆ, وتىن جەتكىزۋ جانە ينجەنەرلىك ينفراقۇرىلىمنىڭ جاي-كۇيى تۋرالى ونەركاسىپ جانە قۇرىلىس ءمينيسترى ەرسايىن ناعاسپاەۆ, «KEGOC» اق باسقارما توراعاسى ءنابي ايتجانوۆ ۇلتتىق ەنەرگەتيكالىق جۇيەنىڭ جۇمىسى تۋرالى, «سامۇرىق-ەنەرگو» كومپانياسىنىڭ باسقارما توراعاسى قايرات ماقسۇتوۆ ەنەرگيا كوزدەرىندەگى جوندەۋ جۇمىستارىنىڭ بارىسى تۋرالى بايانداما جاسادى.
«وتكەن جىلىتۋ ماۋسىمىندا حالىق پەن كوممۋنالدىق-تۇرمىستىق سەكتور تولىعىمەن كومىرمەن قامتاماسىز ەتىلدى – 7,9 ملن توننا, ونىڭ ىشىندە حالىققا 5,7 ملن توننا كومىر جەتكىزىلدى», دەپ حابارلادى ە.ناعاسپاەۆ. وڭىرلەردەگى قاتتى وتىن قورى شامامەن 350 مىڭ توننانى قۇرايدى. الداعى كۇزگى-قىسقى ماۋسىمعا دايىندىق اياسىندا ەلىمىزدەگى ەلەكتر ستانسالارىندا 10 ەنەرگوبلوك, 63 قازاندىق جانە 39 تۋربيناعا جوندەۋ جۇمىسى جوسپارلانعان. ەنەرگەتيكا مينيسترلىگىنىڭ مالىمەتىنشە, بۇگىندە 4 ەنەرگوبلوك, 19 قازاندىق پەن 10 تۋربينادا ءتۇرلى كەزەڭدەگى جۇمىس جۇرگىزىلىپ, 1 ەنەرگوبلوك, 2 قازاندىق پەن 1 تۋربينادا جۇمىس اياقتالدى. ورتالىقتاندىرىلعان جىلۋمەن قامتۋ ايماعىنداعى 66 قازاندىقتىڭ 44-ءىن رەكونسترۋكتسيالاۋ جوسپارلانىپ وتىر.
پرەمەر-مينيستر وتكەن جىلىتۋ ماۋسىمى قالىپتى دەڭگەيدە وتكەنىن, ال قىستا تەحنولوگيالىق بۇزۋشىلىقتار سانى 10%-عا تومەندەگەنىن اتاپ ءوتتى. قابىلدانعان شارالار جىلۋ ستانسالارىن جاڭعىرتۋ جۇمىستارىن قارجىلاندىرۋدى 44%-عا, جىلۋ جەلىلەرىنە شامامەن 30%-عا ۇلعايتۋعا مۇمكىندىك بەردى.
«مەملەكەت باسشىسىنىڭ تاپسىرماسىمەن ەڭ الدىمەن 19 جىلۋ ورتالىعىن جاڭعىرتۋ جۇمىستارى اياقتالدى. توزىعى جەتكەن قالعان بارلىق جىلۋ ستانسالارى مەن جەلىلەرىن جوندەۋدى جالعاستىرۋ قاجەت. ءبىزدىڭ مىندەتىمىز – حالىقتى جىلۋمەن جانە ەلەكتر ەنەرگياسىمەن ساپالى قامتاماسىز ەتىپ, قولدانىستاعى جابدىقتاردىڭ پايدالانۋ مەرزىمىن قاۋىپتى دەڭگەيگە جەتكىزبەۋ. ال ول ءۇشىن ەنەرگيا كوزدەرى مەن جەلىلەردىڭ نەگىزگى جابدىقتارىن جوندەۋ جانە اۋىستىرۋ جۇمىستارىن تۇراقتى ءارى جوسپارلى تۇردە جۇرگىزۋ قاجەت. جوندەۋ ناۋقانىنىڭ بەلسەندى كەزەڭى ەندى باستالىپ جاتىر, سوندىقتان الداعى جاز ايلارىندا كۇشەيتىلگەن رەجىمدە جۇمىس ىستەۋ قاجەت. ارقانى كەڭگە سالاتىن ۋاقىت جوق. بارلىق جۇمىس بەلگىلەنگەن مەرزىمدە جانە تولىق كولەمدە ورىندالۋعا ءتيىس. تالاپ قاتاڭ بولادى», دەپ اتاپ ءوتتى و.بەكتەنوۆ.
ۇكىمەت تاراپىنان قاجەتتى قولداۋ كورسەتىلىپ جاتقانى باسا ايتىلدى. پرەمەر-مينيستر وسى ايدا استانا, كوكشەتاۋ, ريددەر جانە قىزىلوردا قالالارىنداعى جىلۋ كوزدەرىن جاڭعىرتۋ ءۇشىن رەزەرۆتەن 25 ملرد تەڭگە ءبولۋ تۋرالى قاۋلىعا قول قويدى. ولجاس بەكتەنوۆ ۇكىمەت بۇل قاراجاتتىڭ ءتيىمدى جۇمسالۋىن جانە ودان الىنعان ناتيجەنى باقىلايتىنىن اتاپ ءوتتى.
پرەمەر-مينيستر بىرقاتار وڭىردەگى ەنەرگيا كوزدەرىن جوندەۋ جۇمىسىنىڭ كەشەۋىلدەۋ قاۋپىنە نازار اۋداردى. ماسەلەن, سەمەي قالاسىندا قازاندىقتاردى جوندەۋ جۇمىستارى ءالى باستالعان جوق. ال ماڭعىستاۋ وبلىسىندا «ماەك»-ءتىڭ ەكىنشى جىلۋ ورتالىعىنداعى تۋربينانى جوندەۋ ءتيىستى جۇمىس تاجىريبەسى جوق قۇرىلىس كومپانياسىنا بەرىلگەن. قوستاناي وبلىسىندا رۋدنىي جىلۋ ەلەكتر ورتالىعىنداعى تۋربينانى جوندەۋ دە كەشەۋىلدەپ تۇر. ارقالىق جىلۋ ستانساسىنداعى قازاندىقتا دا وسىنداي جاعداي قالىپتاسىپ وتىر. ۇلىتاۋ وبلىسى ساتباەۆ قالاسىنداعى قازاندىقتاردى جوندەۋ جۇمىسىنىڭ قارقىنى دا تىم باياۋ.
«مۇنداي كەمشىلىكتەر وڭىرلەردىڭ بارىندە دەرلىك كەزدەسەدى جانە ول ءتيىستى باقىلاۋدىڭ جوقتىعىن بىلدىرەدى. اكىمدىكتەر مينيسترلىكتەرگە سىلتەپ نەمەسە قاراجاتتىڭ جوقتىعىن, كونكۋرستاردى سىلتاۋراتىپ, جۇمىستى نازاردان تىس قالدىرۋعا بولمايدى. جىلىتۋ ماۋسىمىنا دايىندىق – اكىمدىكتەردىڭ الداعى ءۇش اي ىشىندەگى نەگىزگى مىندەتى», دەپ اتاپ وتكەن پرەمەر-مينيستر بىرقاتار تاپسىرما بەردى.
ءوڭىر اكىمدىكتەرىنە بارلىق كونكۋرستىق ءراسىمدى ەكى اپتا مەرزىمدە اياقتاپ, جوندەۋ جۇمىسىنا ناقتى كىرىسۋ قاجەتتىگى جۇكتەلدى. بيىل ىسكە قوسۋ جوسپارلانىپ وتىرعان جاڭا جىلۋ نىساندارى بويىنشا بارلىق جۇمىستى تامىز ايىنان كەشىكتىرمەي اياقتاۋ قاجەت.
اكىمدەرگە جىلۋ نىساندارىنا اپتا سايىن بارىپ, جاعدايدى جەكە باقىلاۋعا الۋ, بارلىق تۋىنداعان تاۋەكەلدەر بويىنشا شۇعىل ارەكەت ەتۋ تاپسىرىلدى.
ەنەرگەتيكا جانە ونەركاسىپ مينيسترلىكتەرى, ءوڭىر اكىمدىكتەرى 10 ماۋسىمعا دەيىن جىلىتۋ ماۋسىمىنا دايىندىق جوسپارلارىن ناقتىلاسىن. سولتۇستىك, ورتالىق جانە شىعىس وڭىرلەردە بارلىق ينجەنەرلىك ينفراقۇرىلىم مەن تۇرعىن ءۇي-كوممۋنالدىق شارۋاشىلىق نىساندارى 15 قىركۇيەككە دەيىن, ال قالعان وڭىرلەردە 15 قازانعا دەيىن تولىقتاي ءازىر بولۋعا ءتيىس.
«KEGOC» كومپانياسىنا ەنەرگەتيكا مينيسترلىگىمەن بىرلەسىپ, 15 ماۋسىمعا دەيىن الداعى جىلىتۋ ماۋسىمىندا ۇلتتىق ماڭىزى بار ستانسالارعا ارنالعان جابدىقتاردىڭ جۇمىس رەجىمىن بەكىتۋ تاپسىرىلدى. جوندەۋ مەرزىمىن اۋىستىرۋعا نەمەسە جۇمىس كولەمىن ازايتۋعا جول بەرىلمەيدى. پرەمەر-مينيستر ءاربىر فاكت بويىنشا مەنشىك يەلەرىنە, سول سياقتى باسقارۋشى كومپانيالارعا قاتىستى شارالار قابىلداناتىنىنا نازار اۋداردى.
ەنەرگەتيكا مينيسترلىگى كولىك مينيسترلىگىمەن جانە اكىمدىكتەرمەن بىرلەسىپ, 1 قىركۇيەككە دەيىن جىلۋ كوزدەرى مەن تۇيىقتاردا وتىن قورىن الدىن الا جيناقتاۋدى قامتاماسىز ەتۋى قاجەت.
ۇكىمەت اپپاراتىنا وڭىرلەردىڭ جىلۋ بەرۋ ماۋسىمىنا ازىرلىك بارىسىنا تۇراقتى نەگىزدە باقىلاۋ جاساۋ مىندەتى جۇكتەلدى.