شىمكەنت قالاسىنىڭ ماڭىنداعى «اقتاس» وقۋ-جاتتىعۋ پوليگونىندا اسكەري مىندەتتىلەرگە ارنالعان ون كۇندىك جيىن ءوز مارەسىنە جەتتى. قورعانىس مينيسترلىگىنىڭ حابارلاۋىنشا, وقۋ جيىنى اۋماقتىق قورعانىس بريگاداسىنىڭ تاكتيكالىق-ارنايى جاتتىعۋىمەن اياقتالدى, دەپ حابارلايدى Egemen.kz
جيىن بارىسىندا جۇزدەن استام اسكەري مىندەتتى ازامات مەملەكەتتىك-قۇقىقتىق دايىندىق, تاكتيكالىق, ارنايى جانە اتىس دايارلىعى سەكىلدى نەگىزگى باعىتتار بويىنشا بىلىمدەرىن جەتىلدىرىپ, تاجىريبەلەرىن شىڭدادى. جالپى وقۋ 18 ءتۇرلى ءپان بويىنشا جۇرگىزىلدى. ولاردىڭ قاتارىندا بلوك-بەكەتتەردەگى ءىس-قيمىلدار, قاراۋىل قىزمەتىن ورىنداۋ, شارتتى قارسىلاستىڭ شابۋىلىنا توتەپ بەرۋ, ستراتەگيالىق ماڭىزى بار نىسانداردى قورعاۋ مەن قورعانۋ تاسىلدەرى بار.
مۇنداي وقۋ جيىندارى اسكەري مىندەتتىلەردىڭ كاسىبي دەڭگەيىن ارتتىرىپ قانا قويماي, اۋماقتىق قورعانىس جۇيەسىنىڭ نىعايۋىنا دا سەپ بولادى. ءاربىر ساباعى مازمۇندى, ناقتى تاپسىرمالارعا باعىتتالعان, – دەدى شىمكەنت قالاسى اۋماقتىق قورعانىس بريگاداسىنىڭ كومانديرى, پولكوۆنيك باقىتجان ءاشىموۆ.
جيىن سوڭىندا ەرەكشە كوزگە تۇسكەن اسكەري مىندەتتىلەرگە العىس حاتتار مەن ماراپاتتار تابىستالدى. كەيبىر قاتىسۋشىلارعا كەزەكتى اسكەري اتاقتار بەرىلدى.
ايتا كەتۋ كەرەك, وقۋ-جاتتىعۋ جيىنى كەزىندە اسكەري مىندەتتىلەردىڭ نەگىزگى جۇمىس ورنى مەن جالاقىسى ساقتالادى. سونىمەن قاتار ولارعا ارنايى قارجىلاي وتەماقى, كيىم-كەشەك جانە تاماقپەن قامتاماسىز ەتۋ قاراستىرىلعان.
اۋماقتىق قورعانىس – قازىرگى قاۋىپ-قاتەرلەرگە توتەپ بەرۋدىڭ ماڭىزدى تەتىگى. وسىنداي وقۋ-جاتتىعۋ جيىندارى بەيبىت كۇندە ەل تىنىشتىعىن ساقتاۋعا دايىن كادرلاردى ازىرلەۋگە جول اشادى.
ارايلىم مىرزاحان, ەۇۋ 2 كۋرس ستۋدەنتى