ەلىمىزدە جىل سايىن 360 مىڭنان استام ءسابي دۇنيەگە كەلەدى. بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا مالىمدەدى, دەپ حابارلايدى Egemen.kz.
ءمينيستردىڭ ايتۋىنشا, سابيلەر تۋعان ساتىنەن باستاپ 4 مىڭنان استام پەدياتر, 1 مىڭنان استام نەوناتولوگ جانە جەرگىلىكتى دارىگەرلەر تاراپىنان ۇنەمى باقىلاۋدا بولادى. سونىمەن قاتار 7 ميلليوننان استام بالا تەگىن مەديتسينالىق كومەككە قول جەتكىزسە, جىل سايىن 2 ميلليوننان استام بالا سكرينينگتەن وتەدى. سونداي-اق 4,5 ميلليوننان استام بالا پروفيلاكتيكالىق قاراپ-تەكسەرۋمەن قامتىلادى, 1,5 ميلليوننان استام بالاعا يممۋنداۋ جۇرگىزىلەدى.
«بۇگىندە ءاربىر مەكتەپ بەلگىلى ءبىر ەمحاناعا بەكىتىلگەن, وندا 6,5 مىڭنان استام مەديتسينالىق پۋنكت جۇمىس ىستەيدى. بۇل بالالاردىڭ دەنساۋلىعىنداعى ماسەلەلەردى دەر كەزىندە انىقتاپ, كومەك كورسەتىپ, اۋرۋلاردىڭ الدىن الۋعا مۇمكىندىك بەرەدى», دەدى اقمارال ءالنازاروۆا.
ەستەرىڭىزگە سالا كەتەيىك, وسى جىلدان باستاپ مەملەكەت باسشىسىنىڭ تاپسىرماسى بويىنشا قازاقستاندا مەكتەپتەگى تاماقتانۋدىڭ جاڭا ۇلتتىق ستاندارتى ەنگىزىلىپ جاتىر. ول عىلىمي ۇسىنىمدار, ءوسىپ كەلە جاتقان ورگانيزمنىڭ قاجەتتىلىكتەرى مەن سالاۋاتتى ءومىر سالتى قاعيداتتارى نەگىزىندە ازىرلەنگەن.
ء«بىز بالالار دەنساۋلىعى ينفراقۇرىلىمىن دامىتۋ, ەرتە دياگنوستيكانى كۇشەيتۋ, نەوناتالدىق كومەك, ونكوپەدياتريا, وڭالتۋ جانە پاللياتيۆتىك قولداۋعا وزىق تەحنولوگيالاردى ەنگىزۋ جۇمىسىن جالعاستىرىپ كەلەمىز. 2025 جىلدان باستاپ ەمحانالاردا ەرتە ارالاسۋ ورتالىقتارى اشىلادى, ولار كومەككە مۇقتاج بارلىق بالالاردى قولداۋمەن قامتاماسىز ەتۋ ءۇشىن جۇمىس ىستەيدى», دەدى مينيستر.
سونىمەن قاتار «بولاشاققا – ساۋ تىسپەن» باعدارلاماسى شەڭبەرىندە ەلىمىزدەگى بارلىق مەكتەپتەردە مىندەتتى ستوماتولوگيالىق قاراپ-تەكسەرۋ مەن تىسجەگى دامۋىنىڭ الدىن الۋ شارالارى ەنگىزىلگەن.
«مەن, پەدياتر-دارىگەر جانە مينيستر رەتىندە, بالانىڭ دەنساۋلىعى — بۇل ونىڭ تولىققاندى دامۋىنىڭ, ومىردەگى جەتىستىگىنىڭ جانە بۇكىل ۇلتتىڭ ءبىلىمى مەن كۇشىنىڭ نەگىزى ەكەنىن جاقسى بىلەمىن», دەدى دەنساۋلىق ساقتاۋ ءمينيسترى اقمارال ءالنازاروۆا.